Nebukadnezar noparenta ala pura-pura todea mombasomba pinoito bulawa
3
Naria sanggani Magau Nebukadnezar nanggawia saongu pinoito bulawa, kalangana rompulu papitu metere, karembana tolongu metere. Pinoitu etu nibanguna ri Lemba Dura ri propinsi Babel. 2 Naopu etu niparentanamo pura-pura pangga bete ri bagia ngata etu, ala marata mantuki posukuru ka pinoito to nibangu etu. 3 Jadi nasiromumo pura-pura wakele magau, gubernur, bupati, topombawai tesa ka magau, topomboli doi magau, topotangara, tau nataꞌu nangginjani atura, pade pangga-pangga bete ntanina mantuki posukuru ka pinoitu to nibangu magau etu. Wetu ira pura-pura narata nekanggore ri ngayo pinoito etu, 4 nongaremo sambaꞌa topojagai magau ante wamba namangga, niulina, “Sampesuwu-sampesuwu nggari pura-pura ngata bo basa, epemo parenta magau eꞌi. 5 Ane kololio, sasuli, keronjo, bo oni-oni ntanina momoni,a potimbakotumo komi mombasomba pinoito to nibangu Magau Nebukadnezar etu. 6 Sema-sema daꞌa motimbakotu mombasomba pinoito etu, iꞌa kana ratajiaka riara apu pompalabu bata to neliu nggajelana.”7 Jadi tempo ira nangepe oni-oni parewa musi etu, notimbakotumo tau-tau nggari pura-pura ngata bo basa nombasomba pinoito bulawa etu.
Tolumbaꞌa roa Daniel daꞌa nantuki parenta magau
8 Tempo etu woꞌu naratamo bara sakuya mbaꞌa to Babel b madota mompakajaꞌa tau-tau to Yahudi. 9 Nangulimo ira ka Magau Nebukadnezar, “Perapi doa mandate umuru komi. 10 Komi mbotomo noparenta ane tempo pura-pura musi rapopomoni pura-pura tau kana motimbakotu mombasomba pinoito bulawa etu, 11 pade isema-sema daꞌa motimbakotu mombasomba pinoito etu kana ratajiaka riara apu pompalabu bata to neliu nggajelana. 12 Tapi naria bara sakuya mbaꞌa tau to Yahudi to daꞌa nantuki parenta komi. Ira tau to niwai komi ka kuasa moparenta ri propinsi Babel, etumo i Sadrak, i Mesak bo Abednego. Ira daꞌa nadota mepue ka pue-pue to nipesomba komi, pade ira woꞌu daꞌa nadota notimbakotu nombasomba pinoito bulawa to nipowia komi.”
13 Wetu nangepe tesa etu narau mpu'umo rara magau, pade niulina, “Keni wemaimo ira mantingayo aku!” 14 Tempo ira narata ri setu nangulimo magau ka ira, “Sadrak, Mesak, bo Abednego, nakono mpuꞌu komi daꞌa nadota mepue ka pue-pue to nisombaku, bara motimbakotu mombasomba pinoito bulawa to nipowiaku etu? 15 Jadi weꞌi-weꞌi ane komi madota mantuki parentaku etu, tempo komi mangepe oni pura-pura parewa musi, komi kana motimbakotu mombasomba pinoito etu. Tapi ane komi daꞌa madota, komi kana ratajiaka riara apu pompalabu bata to neliu nggajelana. Pade wiata nggari umba mamala manggabasaka komi nggariara mpaleku?”
16 Pade nangulimo i Sadrak, i Mesak, bo Abednego ka Magau Nebukadnezar etu, “Magau, daꞌa paraluu kami mombasono pompekutana komi etu. 17 Alatala to nisomba kami mamala mompakasalama kami nggari apu pompalabu bata to neliu nggajelana bo nggariara mpale magau. 18 Tapi naupa Iꞌa daꞌa mompakasalama kami, kana ranjani komi kami daꞌa ntoto madota mepue ka pue-pue to nisomba komi, bara mombasomba pinoito bulawa to nibangu komi etu.”
Sadrak, Mesak bo Abednego nitajiaka riara apu pompalabu bata
19 Nangepe tesa etu nanggarau mpuꞌumo magau nanggita i Sadrak, i Mesak, bo Abednego, sampe lenjena nambulei saka. Pade nipakauna tau nompakajela apu pompalabu bata pitu nggani kapanena nggari biasana. 20 Naopu etu nipakauna bara sakuya mbaꞌa tantarana to narosona mpuꞌu mombasoko bo mombapoꞌu i Sadrak, i Mesak, bo Abednego, pade mombatajiaka ira mpaka riara apu to najela-jela etu. 21 Jadi tantara etu nompoꞌu ira tolumbaꞌa, pade nitajiaka riara apu to najela-jelana ante pakea to naganana.c 22-23 Nipowia iramo apu etu neliu nggapane nggari biasana, sabana narau mpuꞌu rara magau. Jadi tantara-tantara to nantajiaka i Sadrak, i Mesak, bo Abednego namate niwero nu apu. Tapi ira tolumbaꞌa to nipoꞌu etu nanawu riara apu to najela-jelana.
24 Sampegoli nekanggoremo Magau Nebukadnezar ante natikaja. Nekutanamo iꞌa ka pangga-pangga bete ri setu, “Iwenumo, daꞌa tolumbaꞌa ira to nipoꞌu bo nitajiakata mpaka riara apu etu?”
Nesonomo ira, “Iyo, nakono magau.”
25 Pade notesa woꞌumo magau, “Ane iwetu, nokuya nikitaku naria patambaꞌa ira nolumako riara apu etu? Ira daꞌa nipoꞌu pade ira daꞌa nakuya-kuya. Pade kapatambaꞌana etu nolenje mpowiata!”
26 Pade nalaumo Magau Nebukadnezar nompakamosu apu pompalabu bata etu pade nongare, “Sadrak, Mesak, Abednego, batua-batua Alatala to Neliu Nggalanga! Pesuwumo nggariara apu etu!”
Jadi nesuwumo ira. 27 Pura-pura wakele magau, gubernur, bupati, bo pangga-pangga bete ntanina nantalili ira tolumbaꞌa etu, pade nikita ira daꞌa ria kamba sakedi ira nikoni nu apu. Woꞌo ira daꞌa napapu, pakea ira daꞌa naboa, pade ira woꞌu daꞌa nesoa rangasu.
28 Pade nangulimo Magau Nebukadnezar, “Ratoiyata Alatala to nisomba i Sadrak, i Mesak bo Abednego. Iꞌa nompakau malaeka-Na nantulungi tolumbaꞌa batua-Na to nomparasaya ri jaꞌi-Na. Nisapuaka iramo parentaku, pade nipokono irapa mamate pade mombasomba pue-pue ntanina. Aga Alatala ira mboto rasomba bo rapepue ira. 29 Sabana etu aku momparenta butu mbaꞌa tau nggari pura-pura ngata bo basa to motesa manjapuaka Alatala to nisomba i Sadrak, i Mesak, bo Abednego, ira kana ratamba nggaoya, pade sapona kana ragero mpakaopu. Sabana daꞌa ria pue ntanina to namala manggawia nuapa to nikawia Alatala etu.”
30 Naopu etu nipopeponenamo pangga i Sadrak, i Mesak, bo Abednego, sampe ira nionggotaka najadi pangga-pangga bete ri propinsi Babel.