Pangipi Magau Nebukadnezar karongganina
4
Eꞌimo tewai Magau Nebukadnezar to nipakatuna ka tau-tau ri pura-pura ngata bo basa ri njumaongu dunia. “Perapi doa mantambai kabelo katuwu komi! 2 Aku madota mantesa tandai to nipogumaa bo kabaraka to nikawia Alatala to Neliu Nggalanga ka aku.3 Neliu nggabete kabaraka to nipowia-Na!
Neliu nggakuasa tandai nipogumaa to nipowia-Na!
Iꞌa magau sampe ri kasae-kasaena.
Poparenta-Na daꞌa ria kaopu-opuna!
4 Aku netoꞌo nasana bo nagana riara njapoku. 5 Tapi naria sambengi, tempo aku naturu, aku nangipi pade nanggita to nompakawiora raraku. 6 Jadi nipokioku pura-pura topande to naria ri ngata Babel ala mombabatua pangipiku etu. 7 Tapi tempo pura-pura topeanto, sando, tau to nadea pangginjanina, bo tau to nataꞌu nanggita betuꞌe, narata pade aku nantesa pangipiku ka ira, daꞌa ria kamba sambaꞌa namala nombabatua pangipiku etu. 8 Kaopuna naratamo i Daniel to nidae Beltsazar nantuki sanga wiata to nipesombaku. Iꞌa nipesua karampua-karampua to nagasana. Pade nitesaku ka iꞌa pangipiku. Niuliku, 9 “E, Beltsazar, topanggeniaka tau-tau topande, ninjaniku iko nipesua karampua-karampua to nagasana, sampe daꞌa ria to daꞌa ninjanimu. Epemo pangipiku pade tesamo ka aku batuana.
10 Iweꞌimo panggita to nikitaku tempo aku naturu. Nikitaku sampuꞌu kayu natuwu ri tatongo dunia to nalanga mpuꞌu. 11 Kayu etu nantambai kalangana, batana nabete bo naroso. Lolona narata ri langi sampe namala nikita pura-pura tau ri dunia. 12 Tawa-tawana nagaya bo wuana nadea mpuꞌu, nagana rakoni pura-pura to naria ri njumaongu dunia. Binata-binata naila nekaulu ri wayona bo tonji-tonji nojumu ri rangga-ranggana. Pade pura-pura to natuwuna nanggoni wuana.
13 Riara panggita to nikitaku tempo aku naturu, nikitaku sambaꞌa malaeka nanaꞌu nggari suruga. Iꞌa malaeka topojaga to nainga-inga. 14 Pade nongaremo iꞌa ante suara namangga, ‘Towomo kayu etu pade kotomo rangga-ranggana, rarontomo tawa-tawana, pade kamburakamo wua-wuana. Kaliwumo binata-binata to nekaulu ri wayona bo tonji-tonji to nojumu ri rangga-ranggana. 15 Tapi pakambamo patuꞌana maboli riara ntana. Poꞌumo ante rante ase bo tambaga, pade kabasakamo ranggarawana. Pakambamo iꞌa rabangga loi betuꞌe, bo matuwu mpasanggani-nggani ante binata-binata ranggawoko. 16 Waikamo pekirina ewa manusia mabali majadi ewa pekiri binata sampe pitu mpaea kasaena. 17 Etumo kabotu i Pue to nipasimbayu kami malaeka-malaeka-Na. Patuju-Na ala tau-tau ri umba-umba mangginjani Alatala to Neliu Nggalanga nakuasa ri poparenta manusia, pade poparenta etu niwai-Na ka isema-sema to nipelisi-Na, naupa ka tau to naede katuwuna.’
18 Etumo pangipi to nikitaku. Jadi Beltsazar, we'i-we'i tesa ka akumo batuana, sabana daꞌa kamba sambaꞌa tau topande ri poparentaku namala nombabatua pangipiku etu. Tapi iko namala, sabana iko nipesua karampua to nagasana.”
Daniel nombabatua pangipi magau
19 Nangepe etu natikajamo i Daniel to nidae Beltsazar, bo pekirina nompakawiora rarana bara sakuya kasaena. Jadi aku, Magau Nebukadnezar, nanguli ka iꞌa, ‘Beltsazar, neꞌe iko matikaja sabana pangipi bo batuana etu.’
Nesonomo i Beltsazar, ‘Magauku, nabelopa pangipi bo kajadia-kajadia to niboto pangipi etu majadi ri jaꞌi bali-bali magau, daꞌa majadi ri jaꞌi magauku. 20 Kayu to nikita magauku etu nalanga mpuꞌu, lolona narata sampe ri langi, pade namala nikita ntau pura-pura ri dunia. 21 Tawa-tawana nagaya bo nadea mpuꞌu wuana, sampe nagana nikoni pura-pura to natuwuna ri dunia. Binata-binata naila nekaulu ri wayona, bo tonji-tonji nojumu ri rangga-ranggana. 22 Magauku, komimo kayu to nalanga bo naroso etu. Kabete kuasa magauku nantambai sampe ri langi, bo poparenta komi naluo sampe ri tampa nu dunia.
23 Nikita komi woꞌu sambaꞌa malaeka nanaꞌu nggari suruga ante nanguli, ‘Towo mpakaopumo kayu eꞌi, tapi pakambamo patuꞌana maboli riara ntana. Poꞌumo ante rante ase bo tambaga pade palasimo ranggarawana. Pakambamo iꞌa rabangga nu loi betuꞌe bo matuwu mosanggani-nggani ante binata-binata sampe pitu mpae kasaena.’
24 Magauku, iweꞌimo batua panggita komi etu, pade eꞌimo to nipakatantu Alatala to Neliu Nggalanga ewa katuwu komi mboto. 25 Komi kana rapasuma nggari tatongo manusia, pade matuwu ri tatongo binata-binata ranggarawana. Pitu mpae kasaena komi kana manggoni kawoko ewa japi, pade maturu ranggarawana sampe rabangga loi betuꞌe. Maopu etu pade komi kana mompangaku Alatala to Neliu Nggalanga to nakuasa riara poparenta manusia, pade poparenta etu niwai-Na ka isema-sema to nipelisi-Na. 26 Parenta malaeka ala patuꞌa nu kayu etu rapakamba maboli riara ntana, batuana komi kana majadi magau mpanjili. Etu kana majadi tempo komi mompangaku Alatalamo to nombakuasai njumaongu dunia. 27 Sabana etu kuperapi, tukimo popatora batuamu eꞌi. Neꞌe mana mowia silaka, tapi kawiamo nuapa to nabelo bo nanoa, pade potowemo tau nakasiasi. Bara ante iwetu komi batena matuwu masana.’ ”
28 Pura-pura etu najadi ri jaꞌi Magau Nebukadnezar. 29 Sampulu rombula kaliuna tempo iꞌa nolumako-mako ri ata sapo magau to nadelena ri ngata Babel, 30 niulina, “Neliu mpuꞌu kabete ngata Babel! Akumo to nombabangu ngata eꞌi majadi ngata magau, ala mompakanoto kakuasa bo karosoku, kagaya bo kabeteku!”
31 Daꞌapa naopu iꞌa notesa, natiepemo suara nggari langi iweꞌi, “Magau Nebukadnezar, epemo tesa eꞌi! Kakuasamu ewa magau nialamo nggari jaꞌimu. 32 Iko kana rapasuma nggari tatongo manusia, pade matuwu ri tatongo binata-binata ranggarawana. Pitu mpae kasaena iko kana manggoni kawoko ewa japi. Maopu etu iko kana mompangaku Alatala to Neliu Nggalanga to nakuasa riara poparenta manusia, pade poparenta etu niwai-Na ka isema-sema to nipelisi-Na.”
33 Tempo etu woꞌu tesa-tesa etu najadi mpuꞌu ri jaꞌina. Magau Nebukadnezar nipasuma nggari tatongo manusia, pade nanggoni kawoko ewa japi. Korona nibangga loi betuꞌe, woꞌona nantambai nandoe ewa wulu lowe, bo kalupana nandate ewa kalupa ntonji.
Magau Nebukadnezar nantoiya Alatala
34 Sangga naliu tempo pitu mpae etu, aku Magau Nebukadnezar nantingoa ri langi, pade nanoto balimo raraku. Nitoiyaku Alatala to Neliu Nggalanga. Nibilaku bo nipakabeteku sanga Alatala to natuwu sampe ri kasae-saena. Niuliku,
“Kuasa Alatala naroo sampe ri kasae-saena,
Poparenta-Na daꞌa ria kaopu-opuna!
35 Topetoꞌo ri dunia daꞌa ria batuana riara mpanggita-Na.
Iꞌa noparenta malaeka ri suruga bo manusia ri dunia.
Daꞌa ria sambaꞌa namala mangewa patuju-Na,
daꞌa ria to nabia mompekutana ka Iꞌa, ꞌNuapa nipowia-Mu?’ ”
36 Tempo nanoto bali raraku, pura-pura kakuasaku bo kagaya poparentaku nipopatingguli ka aku. Aku nitomunaka wakele-wakeleku, pade aku nipopatingguli ri poparentaku. Pade neliu nggabetepa kakuasaku weꞌi-weꞌi pade bopia.
37 Jadi weꞌi-weꞌi aku Nebukadnezar nompakalanga bo nantoiya Magau ri suruga. Pura-pura powia-Na nakono bo nanoa, pade Iꞌa nompakule nompakaede tau to nalanga rarana.”