Potulisi ri leru to nikita Magau Belsyazar
5
Naria saeo Magau Belsyazar a nombagaga sanjobu mbaꞌa pangga betena ala marata ri posusa bete bo manginu anggur mpasanggani-nggani. 2 Tempo Magau Belsyazar dananginu-nginu anggur, iꞌa nompakau batuana malau mangala panombo-panombo bulawa ante salaka to niago puena Magau Nebukadnezar nggariara Sapo Mpepue ri Yerusalem. Patuju Magau Belsyazar ala i‘a bo pura-pura pangga betena, rongo-rongona bo samaruena manginu nggari panombo-panombo etu. 3 Pade nikeni iramo panombo-panombo etu ri jaꞌina. Naopu etu magau, pangga betena, rongo-rongona bo samaruena nanginu anggur nggari parewa-parewa mpanginu etu. 4 Tempo ira dananginu-nginu, ira nantoiya pinoito-pinoito wiata to nikawia nggari bulawa, salaka, tambaga, ase, kayu ante watu.5 Sampegoli natekitamo pale manusia notulisi sangele ri leru sapo magau ri petoꞌo to neliu nggaremena to niwanta reme nu poindo, sampe nanoto mpuꞌu nikita magau. 6 Tempo iꞌa nanggita etu nangguni mpaamo lenjena bo naeka mpuꞌumo rarana, sampe kadana nalente bo wukotuna nolalete. 7 Ante nongare iꞌa nerapi ala sando, tau-tau to nadea pangginjanina, bo tau-tau to nataꞌu nanggita betuꞌe rapokio. Tempo ira narata, notesamo magau, “Isema-sema mamala mombabasa potulisi etu ante mantesa batuana ka aku, iꞌa kuwaika pakea kamagau to nakamumuna, pade bili bulawa kupasua ri tambolona tandai pebilaku ri jaꞌina. Pade iꞌa woꞌu kana kuonggotaka majadi tau katolumbaꞌana to nakuasa riara poparentaku.”
8 Pade nalaumo pura-pura tau topande nanggita potulisi etu, tapi daꞌa kamba sambaꞌa nompakule nombabasa bo nombabatua potulisi etu ka magau. 9 Nawulesa mpuꞌu rara Magau Belsyazar, bo nangguni mpaa mpuꞌumo lenjena. Pade naingu puramo pangga-pangga betena.
10 Tempo nangepe wamba tau nongare-ngare iwetu, nesuamo indo magau ri posusa etu. Pade niulina ka magau, “Perapi doa mandate umuru komi. Pakasanamo pekiri komi. Neꞌe mana mawiora rara sampe mangguni mpaa. 11 Sabana riara poparenta komi naria sambaꞌa langgai to nipesua karampua-karampua to nagasana. Tempo puemu Magau Nebukadnezar noparenta, nanotomo tau etu napande mpu'u, nata'u bo nanoto ewa kanoto nu karampua-karampua. Pade iꞌa nionggotaka puemu najadi topanggeniaka topeanto, sando, tau-tau to nadea pangginjani, bo tau-tau to nataꞌu nanggita betuꞌe. 12 Iꞌa neliu nggapande bo nanoto mpuꞌu nantesa pangipi, nompakanoto to natetabuniaka bo nompakanoto to nakajana mpuꞌu. Sangana i Daniel, tapi magau nompoposanga iꞌa i Beltsazar. Pokiomo iꞌa weꞌi-weꞌi, pade iꞌa kana mompopanjani ka komi nuapa batuana potulisi eꞌi.”
Daniel nombabatua potulisi ri leru
13 Pade i Daniel nikeni mantingayo magau. Pade nekutanamo magau ri jaꞌina, “Komimo to nosanga ka i Daniel, tau to Yahudi to nisoko nikeni pueku nggari bagia Yehuda mpaka wemai? 14 Niepeku iko nipesua karampua-karampua to nagasana, pade iko tau to napande bo nataꞌu bo to neliu ngganotona. 15 Pura-pura topande bo tau to nadea pangginjanina nompembai nombabasa potulisi eꞌi bo mantesa batuana ka aku, tapi ira daꞌa namala. 16 Tapi niepeku iko namala mompopanjani anu to natetabuniaka bo nompakanoto to nakajana. Ane iko mamala mombabasa potulisi eꞌi bo mantesa batuana ka aku, iko kuwai ka pakea kamagau to nakamumuna, pade bili bulawa rapasua ri tambolomu tandai pebila. Ntanina nggari etu iko kana kuonggotaka majadi tau katolumbaꞌana to nakuasa riara poparentaku eꞌi.”
17 Nesonomo i Daniel ka magau, “Magau, daꞌa paraluu komi mombawai hadia-hadia etu ka aku, waimo ka tau ntanina. Tapi aku kana mombabasa potulisi etu ka komi bo mantesa batuana.
18 Magau to nibilaku, Alatala to Neliu Nggalanga nangonggotaka pue komi Magau Nebukadnezar najadi magau to neliu nggalangana to naria kuasa to nabetena, bo pebila bo kagayana to natolele. 19 Nabete mpuꞌu kuasana sampe tau-tau nggari pura-pura ngata bo basa nawiora bo naeka ri jaꞌina. Ane iꞌa madota mompatesi tau, nipatesina tau etu. Tapi ane iꞌa madota mompakasalama tau, natantumo tau etu kana nipakasalamana nantuki dotana. Pade iꞌa woꞌu namala mompakalanga bara mompakaede sema-sema nantuki dotana mboto. 2O Tapi tempo iꞌa najadi nasombo, nakoꞌo rarana bo nasoa, iꞌa nitaꞌuraka nggari pekatokona ewa magau sampe nalipomo kakuasana. 21 Iꞌa nipopalai nggari tatongo manusia, pade pekirina najadi nasimbayu ewa pekiri binata. Iꞌa natuwu nosanggani ante keledai nggakayu, nanggoni kawoko ewa japi, pade naturu ranggarawana sampe nasii pura nikanawu loi betuꞌe. Kaopuna iꞌa nompangaku Alatala to Neliu Nggalanga to nakuasa riara poparenta manusia, pade poparenta etu niwai-Na ka isema-sema to nipelisi-Na.
22 Tapi komi, Magau Belsyazar to najadi makumpuna mboto, daꞌa madota mompakaede raramu, naupa komi nangginjani pura-pura etu. 23 Komi nompakalanga raramu ri jaꞌi Pue ri suruga. Nabia komi nompakau tau manggeni mpesua panombo-panombo to niago nggari Sapo Mpepue-Na. Pade komi ante pangga-pangga betemu, pura-pura rongo bo samarue komi woꞌu nanginu nggari panombo-panombo etu. Komi nombatoiya pinoito-pinoito wiata to nikawia nggari bulawa, salaka, tambaga, ase, kayu bo watu to daꞌa namala manggita bara mangepe bara mangginjani nuapa-nuapa. Tapi komi daꞌa nombabila Alatala to nakuasa nompakatantu katuwu bo kamate bo jala nggatuwu komi. 24 Etumo sabana Alatala nompopokita ka komi pale to nantulisi potulisi etu.
25 Iweꞌimo potulisi etu:
“MENE, MENE, TEKEL, UPARSIN.” b
26 Pade iweꞌimo batuana:
“Mene:” c batuana tempo komi noparenta nireke Alatalamo pade nipakaopu-Namo.
27 “Tekel:” d batuana komi nitimba riara potimba, pade nireke daꞌa masipato moparenta.
28 “Peres:” e batuana poparenta komi nibagi bo niwai ka tau to Media bo Persia.”