Daniel nisuaraka riara bololia singa
6
Tempo Magau Belsyazar namate nipatesi, Darius tau to Media nanjambei iꞌa najadi magau.a Tempo etu umuruna onompulu bo rompae. 2 Iꞌa nombabagi poparentana najadi satu rompulu propinsi, pade ri butu-butu propinsi etu nipakatantuna sambaꞌa gubernur moparenta. 3 Daniel ante rombaꞌa tau ntanina nionggotakana ala mombajagai pura-pura gubernur etu.b Gubernur etu kana mantesa pakanoto bago ira ka i Daniel bo rombaꞌa tau ntanina etu, ala magau neꞌe rapakarugi. 4 Pokarajaa i Daniel neliu nggabelopa nggari pura-pura gubernur bo topojagai-topojagai ntanina, sabana iꞌa neliu nggataꞌu. Sabana etu magau madota mangonggotaka i'a majadi tau to nakuasana ri njumaongu poparentana.5 Nangepe etu pura-pura gubernur bo topojagai-topojagai nompasimbuku mangelo kasala i Daniel tempo iꞌa noparenta. Tapi daꞌa namala, sabana i Daniel tau nanoa rarana bo natutu riara bagona, pade daꞌa sanggani iꞌa nowia sala nuapa-nuapa. 6 Kaopuna nangulimo ira, “Kita mamala mombarata kasala i Daniel aga nosinggawela ante pomparasayana ka Alatalana!”
7 Naopu etu nalaumo ira nantingayo magau pade nanguli, “Umba komi Magau Darius, perapi doa mandate umuru komi! 8 Pura-pura kami to nombaurusi poparenta magau, nabelo ka topojagai, nabelo ka gubernur, wakele-wakele gubernur bo pangga-pangga bete ntanina nasintuwu mompakasampe tesa ka komi, ala komi mompowia sura parenta to ratuki ante mpuꞌu-mpuꞌu. Agina komi momparenta ka todea ala riara tolumpulu eo daꞌa sambaꞌa tau rapaloga mekakai ka wiata-wiata bara manusia, tapi aga ka komi mboto. Sema-sema mombaliunaka parenta etu kana ratijaka mpaka riara bololia singa. 9 Kami merapi ala komi moteke sura etu ala majadi atura to Media bo Persia to daꞌa namala rabali.” 10 Nangepe etu niteke Magau Dariusmo sura parenta etu.
11 Tempo i Daniel nangepe tesa nanguli sura etu nipowia magaumo, nanjilimo iꞌa mpaka ri sapona ri tombi kalangana to naria tilalabana nantingayo mpaka ri Yerusalem. Pade ewa kabiasana iꞌa nosambaya ka Alatalana bo nantoiya Iꞌa tolunggani saeo ante notimbakotu ri ngayo tilalaba to natibea etu.
12 Nalaumo bali-bali Daniel mpaka ri sapona pade nikita ira i Daniel nosambaya nerapi ri jaꞌi Alatalana. 13 Jadi nalaumo ira pura-pura nosirata ka magau mompangadu i Daniel ante nanguli, “Magau, nakono komi nombateke sura parenta to nombatagi pura-pura tau tolumpulu eona daꞌa mamala mekakai ka pue ira atau manusia tapi aga ka komi? Pade isema-sema mombaliunaka parenta etu kana ratijaka riara bololia singa?”
Nesonomo magau, “Iyo, parenta etu najadi atura-atura to Media bo Persia to daꞌa mamala rabali.”
14 Pade nanguli woꞌumo ira ka magau, “Daniel sambaꞌa tau to nisoko bo nikeni weimai nggari bagia Yehuda, iꞌa daꞌa nantuki parenta komi bo nanjauru komi. Iꞌa batena nosambaya tolunggani saeo.”
15 Nangepe etu nasusa bo nakini mpuꞌu rara magau. Sampe njaneo iꞌa nangelo akala mompakasalama i Daniel. 16 Naopu etu nalau wo'umo tau-tau etu mpaka ri ja'i magau ante nanguli, “Magau, kana ratora komi, nantuki atura-atura to Media bo Persia, parenta to niteke magau mana namala rabali!”
17 Kaopuna magau nomparenta ala i Daniel rasoko pade ratijaka riara bololia singa. Notesamo magau ka i Daniel, “Perapi Alatala to nisombamu etu mompakasalama iko.” 18 Naopu etu saongu watu bete nirumpi ka pewobo bololia etu. Pade magau nombamere watu etu ante mere kamagauna bo mere pangga-pangga betena, ala daꞌa ria sambaꞌa mamala manggabasaka i Daniel nggari singa-singa etu. 19 Naopu etu nanjilimo magau mpaka ri sapona. Iꞌa daꞌa madota manggoni bara rapakasana rarana. Pade njambengi ntua iꞌa daꞌa namala naturu.
20 Ri tempo kampadondo njiina nembangumo magau pade nalau nasalisa-lisa mpaka ri bololia singa. 21 Tempo iꞌa narata ri saꞌa, nongaremo iꞌa ante nakini rarana, “Daniel, batua nu Alatala to Natuwuna! Iwenumo? Namalamo Alatala to nisombamu ante mpuꞌu-mpuꞌu manggabasaka iko nggari singa-singa etu?”
22 Pade nesonomo i Daniel, “Iyo magau. Perapi doa mandate umuru komi sampe ri kasae-saena. 23 Alatala to nisombaku nompakau malaeka-Na nombalamu sumba singa-singa, sampe singa-singa etu daꞌa nombakuya-kuya aku. Sabana aku daꞌa nasala ri jaꞌi Alatala pade aku woꞌu daꞌa nowia to najaꞌana ri jaꞌi komi.”
24 Nangepe etu nasana mpuꞌumo rara magau pade niparentana ala i Daniel rasuwuraka nggari bololia singa etu. Tempo i Daniel nisuwuraka nggari setu daꞌa kamba sakedi nabela, sabana iꞌa nomparasaya Alatala. 25 Naopu etu magau nomparenta ala manjoko tau-tau to nompangadu i Daniel. Pade nosanggani-nggani ante ana-ana bo rongo-rongo ira nitijaka riara bololia singa etu. Da'apa natudu ri tana riara bololia etu, ira nisoko singa-singa bo nipakaoya wuku-wuku ira.
26 Naopu etu Magau Darius nompakatu sura ka tau-tau ri pura-pura ngata bo basa ri njumaongu dunia iweꞌi: “Tabe, perapi doa katuwu komi mantambai kabelona. 27 Ante sura eꞌi aku moparenta ala pura-pura tau to naria riara poparentaku kana maeka bo mombabila Alatala to nisomba i Daniel.
Iꞌamo Alatala to natuwuna,
Iꞌa naroo sampe ri kasae-saena.
Poparenta-Na daꞌa ria maropu
bo kakuasa-Na daꞌa ria kaopuna-opuna.
28 Iꞌa nompakasalama bo nanggabasaka.
Iꞌa nowia kabaraka bo tandai-tandai to nipogumaa ri langi bo dunia.
Iꞌamo to nompakasalama i Daniel
nggari pesoko nu singa-singa.”
29 Naopu etu Daniel bate-batena naria pekatoko to nalanga riara poparenta Magau Darius bo poparenta Magau Koresh to Persia etu.