Daniel nanggita pataongu binata riara mpangipina
7
1-2 Naria sambengi, tempo mpae pamulana Belsyazar najadi magau ri Babel,a aku Daniel nangipi ri paturuku bo nombarata panggita. Pade pangipi etu nitulisiku. Iweꞌimo isi to napokona panggitaku etu.Riara mpanggitaku wengi etu naria poiri naramboso neburu nggari patanjulapa langi, sampe tasi najadi nobalumba bete. 3 Tempo etu neumbamo pataongu binata to neliu nggabete nggariara ntasi. Binata etu daꞌa nasimbayu lenjena. 4 Binata pamulana lenjena ewa singa, tapi iꞌa nokapi ewa tonji lowe.b Tempo aku danombalele mata, sampegoli nirebumo kapina sampe nakabasaka. Pade iꞌa nionggotaka nggari tana bo nipopekanggore robingga kadana ewa manusia, pade niwai ka pompekiri manusia.
5 Binata karongelena nolenje mpoberuang. Iꞌa nenggore njabingga,c pade nanggeni tolumpeka wuku usu ri olo ngisina. Pade niepeku suara nanguli ka iꞌa, “Kamaimo, konimo bau mpakadea damo aga dotamu!”
6 Tempo aku danombalele mata, neumbamo binata ntanina. Lenjena ewa macan tutul, tapi ri bengona naria patabingga kapi nu tonji, pade iꞌa nobalengga ampa.d Iꞌa niwai ka kuasa moparenta.
7 Tempo aku danombalele mata, neumbamo binata kapataonguna. Iꞌa mpuꞌu-mpuꞌu naroso bo nipokaeka bo nipowiora ntau. Iꞌa nongisi nabete nggari ase bo iꞌa nanggoni mpakaoya sokona bo nombalonggo-longgo labina. Nosisala iꞌa ante binata-binata to neumba ri koluna, pade iꞌa notandu sampulu.e
8 Tempo aku danompariara ntaꞌi tandu-tanduna, sampegoli neumbamo saongu tandu ntanina ri olona. Tandu etu nanggedi tapi namala nompakapongga tolongu tandu pamulana. Tandu nggedi etu naria matana ewa mata manusia, bo sumbana to notesa nasombo.
Panggita nantesa i Pue to Natuwu Mpeliu
9 Tempo aku dananggita, bara sakuya ongu pekatoko magau niboli. Pade nekatokomo i Pue to Natuwu Mpeliu ri saongu pekatoko ri setu. Pakea-Na bo woꞌo-Na nabula bo nagasa ewa kapa. Pade pekatoko-Na bo roda-rodana najela puramo ewa apu. 10 Pade apu bete nesuwu nggari ngayo-Na ewa ue noili. Njobu-njobu tau nombatande Iꞌa, pade juta-juta tau nenggore ri ngayo-Na. Tempo etu nipamulamo potangara ante nombatimpa buku-buku.f
11 Tempo aku danombalelemata, niepeku woꞌu tandu nggedi etu nangoa ante kasombona. Naopu etu binata kapataonguna etu nipatesi, bo watabakuna nitijaka mpaka riara apu sampe naropu. 12 Binata-binata ntanina nikaliakamo kuasana moparenta, tapi ira daniwaipa matuwu sampe marata tempo to nipakatantu.
13 Riara mpanggitaku wengi etu, nikitaku sambaꞌa to nasimbayu ewa Ana Manusia.g Iꞌa narata nibungu nu kulimuh pade nalau nompakamosu i Pue to Natuwu Mpeliu, pade nipoposintingayo ante Iꞌa. 14 Ana Manusia etu niwai ka pebila bo kakuasa ewa magau, sampe tau-tau nggari pura-pura ngata bo basa ri njumaongu dunia nombasomba Iꞌa. Kakuasa-Na kana maroo sampe ri kasae-saena, bo poparenta-Na daꞌa mamala rapakaropu.
Batua panggita nipakanoto
15 Aku i Daniel nawiora bo naingu nanggita panggita etu. 16 Jadi nipakamosuku sambaꞌa tau to nekanggore ri saꞌa pade niperapiku ala iꞌa mompakanoto ka aku batuana pura-pura etu. Pade iꞌa nompopanjani batuana etu ka aku. 17 Niulina, “Pataongu binata to neliu nggabete to nikitamu, etumo patangele poparenta to meumba ri dunia. 18 Tapi todea nu Alatala to Neliu Nggalanga kana rawai ka kuasa ala moparenta, pade poparentana maroo sampe ri kasae-saena.”
19 Naopu etu aku madota mangginjani batua nu binata kapataonguna etu, to nosisala ante binata ntanina to nompakaeka, ante ngisi asena bo kalupa tambagana to nompakaoya bo nanggoni sokona, pade nombalongo-longo labina. 20 Aku woꞌu madota mangginjani batuana sampulu tandu ri balenggana bo tandu nggedi to neumba nggapurina, pade nompakapongga tolongu tandu pamulana etu. Tandu nggedi etu naria matana bo sumba to nangoa bo nasombo. Iꞌapa mpuꞌu-mpuꞌu nipokaeka nggari tandu-tandu ntanina.
21 Tempo aku nombalelemata, tandu nggedi etu nosibali ante todea nu Alatala pade nombadagi ira. 22 Naopu etu naratamo Pue to Natuwu Mpeliu nantangara bo nombabutusi bo nantakono todea Alatala to Neliu Nggalanga. Naratamo tempona ira mantarima kuasa ala moparenta.
23 Eꞌimo pantesa to nipakanotona ka aku, “Binata kapataonguna etumo poparenta kapatangelena to maria ri dunia. Pade poparenta etu kana mosisala ante poparenta-poparenta ntanina. Poparenta etu kana mombakuasai bo mompakagero njumaongu dunia pade mombalonggo-longgo labina. 24 Sampulu tandu etumo sampulu mbaꞌa magau to meumba nggari poparenta etu. Naopu etu sambaꞌa magau ntanina kana meumba. Iꞌa mosisala mpuꞌu ante magau-magau pamulana pade iꞌa kana mombadagi tolumbaꞌa magau. 25 Iꞌa kana motesa mangewa Alatala to Neliu Nggalangana bo mompandasa todea nu Alatala. Iꞌa kana mompasimbuku mombabali atura-atura bo eo-eo bete agama todea Alatala, pade ira kana raparentana tolumpae santongo kasaenai.
26 Maopu etu topotangara nggari suruga kana masiromu, pade kakuasana kana raala nggari jaꞌina pade rapakaropu sampe mana ntoto ria. 27 Pade kakuasa bo kabete pura-pura poparenta ri njumaongu dunia kana rawai ka todea nu Alatala to Neliu Nggalanga. Kuasa ira moparenta daꞌa ria kaopuna, bo pura-pura topoparenta ri dunia kana matundu ri jaꞌi ira.”j
28 Sampe ri seꞌimo pantesa eꞌi. Aku i Daniel nawulesa mpuꞌu raraku sampe nangguni mpaa lenjeku. Tapi pura-pura etu aga niboliku riara ntaꞌiku, daꞌa nitesaku ka isema-sema.