Panggita to nantesa bimba tuamana bo towau tuamana
8
Sangga nagana tolumpae Magau Belsyazar noparenta,a aku Daniel nombarata panggita karongganina.b 2 Riara mpanggita etu aku nanggita korobataku ri petoꞌo pekalendu ri kota Susan, ri propinsi Elam. Aku nenggore namosu Binangga Ulai. 3 Pade ri wiwi binangga etu naria saongu bimba tuamana to nandate tanduna robingga.c Tapi sabingga tanduna neliu kandatena, pade tanduna to nandate etu natuwu nggapurina nggari tandu ntanina. 4 Aku nanggita bimba etu nanggarumpa mpaka ri kasolona, mpaka ri tasina bo mpaka ri puluna.d Daꞌa ria saongu binata to nompakule mangewa iꞌa, pade daꞌa woꞌu ria to nakabasaka nggari kakuasana. Iꞌa nowia nantuki dotana mboto, pade najadi nakuasa mpuꞌu.5 Tempo aku danombalele mata, nikitaku saongu towau tuamana nangowa-ngowa nggari kasolona, noliu ri njumaongu dunia. Nagasi mpuꞌu pangowana sampe kadana daꞌa natudu tana. Pade ri olo matana natuwu saongu tandu to neliu kandatena.e 6 Towau tuamana etu nompakamosu bimba tuamana to naria tanduna to nikitaku ri wiwi binangga etu. Pade nangowamo iꞌa ala mombarumpa bimba tuamana etu ante kasoana. 7 Tempo aku nanggita nipakamosunamo bimba tuamana etu, pade nirumpana ante nasoa mpuꞌu, sampe tandu bimba tuamana etu nakoto robingga-bingga. Bimba tuamana etu daꞌa nompakule nangewa towau tuamana, aga nidungganaka pade nilonggo-longgo towau tuamana etu. Daꞌa ria to nompakule manggabasakana.
8 Towau tuamana etu nantambai kabete kuasana. Tapi tempo iꞌa najadi neliu nggakuasa, nakotomo tandu to nabetena. Pade ri walea tanduna etu natuwu pataongu tandu to nontani nggari tandu ntanina, to nantujuraka patanjulapa langi.
9 Nggari saongu tandu natuwumo tandu nggedi to najadi neliu nggabete, pade kakuasana tunggai nantambai sampe ri sabingga puluna, sabingga kamataeona bo sampe narata ri Tana Naramba.f 10 Tandu etu nantambai naroso sampe nangewa tantara nggari suruga, etumo betuꞌe-betuꞌe,g pade naria bara sakuya tantara etu to nitijakana mpaka ri tana bo nilonggo-longgona. 11 Pade daꞌa aga etu iꞌa woꞌu nangewa Balengga Tantara Suruga,h bo nantagi tau manggeni pesomba eo-eo ka Balengga Tantara etu. Pade Sapo Mpepue nipakagerona. 12 Tandu nggedi etu nompakau tantarana lau mompopenonto tau nombawai pesomba eo-eo.i Pade podade to nakonona mana ntoto nipowia. Pura-pura nuapa to nikawia tandu etu najadi.j
13 Naopu etu niepeku sambaꞌa malaeka notesa ka roana ntanina, “Sampe sakuya kasaena to nikita riara mpanggita etu majadi? Sampe nepia silaka bete etu mombasambei pesomba eo-eo? Sampe nepia Sapo Mpepue bo tantara suruga ralonggo-longgo?”
14 Nesonomo malaeka ntanina, “Sampe ronjobu toluatu nggani pesomba ngguwiana bo pesomba mpadondona.k Naopu etu pade Sapo Mpepue rapakabelo bali.”
Malaeka Gabriel nompakanoto batuana panggita Daniel
15 Tempo aku nompasimbuku mangginjani nuapa batua panggita to nikitaku etu, sampegoli nenggoremo ri ngayoku sambaꞌa nolenje mpolanggai. 16 Niepeku suara nongare nggari Binangga Ulai, niulina, “Gabriel, tesa ka iꞌamo batua mpanggitana etu.” 17 Pade i Gabriel to nenggore ri ngayoku nompakamosu aku. Naeka bo nawiora mpuꞌumo raraku sampe aku nadungga ntuobo.
Nangulimo i Gabriel ka aku, “Umba iko ana manusia, kana munjani panggitamu etu nosinggawela ante kajadia ri kaopu nu dunia.” 18 Tempo iꞌa danotesa nalipomo raraku sampe nadungga ntuobo. Tapi iꞌa nombasoko bo nantulungi aku nenggore bali.
Pade niulina, 19 “Aku kana mompopanjani ka iko nuapa to majadi banepia tempo rau rara Alatala rasuwuraka. Sabana panggitamu etu nosinggawela ante kaopu nu dunia.
20 Bimba tuamana to nikitamu etu nombagambara magau-magau poparenta Media bo Persia. 21 Towau tuamana etu nombagambara magau poparenta Yunani, pade tandu to nabetena to natuwu ri olo matana etu nombagambara magau Yunani pamulana.l 22 Pataongu tandu to neumba nanjambei tandu pamulana to nakotona etu, batuana poparenta Yunani kana matibagi-bagi majadi patabagia.m Tapi daꞌa nasimbayu karosona ante poparenta pamulana.
23 Tempo ntora maopumo poparenta-poparenta etu, pade tempo kajaꞌana mpuꞌu-mpuꞌu meliu nggadea, kana meumba sambaꞌa magau to nasingi lenjena to mataꞌu mebagiu.n 24 Iꞌa kana majadi maroso mpuꞌu tapi daꞌa nopuꞌu nggari karosona mboto. Iꞌa kana mompatesi madea mpuꞌu tau ante kajaꞌana, pade nuapa to rapodotana kana majadi. Iꞌa kana mompatesi tau-tau to nakuasana bo todea nu Alatala. 25 Madea tau mamala rabagiuna, sabana nadea akalana nebagiu. Iꞌa kana mompakalanga rarana pade ante daꞌa ninjani-njani tau iꞌa kaliu-liu mompatesi tau dea. Pade daꞌa aga etu, iꞌa mabia mangewa Magau to Neliu Nggakuasa.o Tapi iꞌa kana rapakaropu, aga daꞌa ante kuasa manusia.p
26 Panggita ewa pesomba ngguwiana bo mpadondona to nitesa ka iko etu mpuꞌu-mpuꞌu kana majadi. Tapi ne'e ratesa ka isema-sema, sabana etu kana majadi ri tempo marata banepiana.”
27 Naopu etu nalente mpuꞌumo koroku pade najuꞌamo aku bara sakuya eo kasaena. Naliu etu aku bate-batena nompapola bagoku ka magau. Tapi nawulesa mpuꞌu raraku nompekiri panggita-panggita itu. Daꞌa namala kunjani batuana.