Daniel nosambaya ka todeana
9
1-2 Ri mpae pamulana i Darius to Media ana Ahasywerosa najadi magau Babel,b aku Daniel nombabasa riara buku-buku to nagasa. Aku nantondoaka tesa i PUE ka nabi Yeremia to nanguli kota Yerusalem kana magero pitumpulu mpae kasaena.c3 Pade nosambayamo aku ante mpuꞌu-mpuꞌu ka i PUE Alatala, nerapi asi mata-Na. Aku woꞌu napuasa ante nompake kae karu nekatoko ri bunggu sowu, tandai kasusa raraku nantora silaka to Israel. 4 Nosambayamo aku ri jaꞌi PUE Alatalaku, pade silaka todeaku nipangakuku ri jaꞌi-Na.
Niuliku, “PUE Alatala, Komi to nakuasa, Komi to nibila kami. Komi batena nompakadupa pojanji-Mu, bo nompakanoto towe-Mu to daꞌa ria kaopu-opuna ka tau to nompotowe Komi bo to nantuki parenta-Mu. 5 Nasilakamo kami. Kami nowia sala. Kami noinggu najaꞌa, pade nangewa Komi bo nombaliunaka parenta-Mu bo daꞌa nantuki Atura-atura-Mu. 6 Kami daꞌa nangepe tesa nabi-nabi to najadi batua-Mu to notesa riara sanga-Mu ka magau-magau kami, ka pura-pura topanggeniaka kami, ka pura-pura totuꞌa kami bo ka pura-pura todea kami.
7 O Pue, Komimo to nanoana, tapi kamimo to naeya matana, etumo kami pura-pura to netoꞌo ri bagia Yudea bo ngata Yerusalem bo pura-pura tau sangata ante kami to niposimpotatare-Mu ri ngata-ngata nakawao bo namosu, sabana daꞌa natundu ri jaꞌi-Mu. 8 O PUE, kami bo magau-magau kami, pura-pura topanggeniaka bo totuꞌa kami nggaulu masipato maeya, sabana kami nowia silaka ri jaꞌi Komi. 9 Komi batena naasi mata ri jaꞌi kami bo nombaꞌampungi kami naupa kami nangewa Komi.
10 O PUE Alatala kami, tempo Komi nompakau kami mantuki atura-atura to nitesa nabi-nabi to najadi batua-Mu, kami daꞌa nantuki tesa-Mu etu. 11 Pura-pura to Israel nombaliunaka atura-atura-Mu, pade daꞌa madota mantuki pantesa-Mu. Nasilakamo kami ri jaꞌi-Mu. Jadi etumo sabana pejanjiaka bo pesuku to nitulisi riara buku batua-Mu i Musa nipawela ka kami.d 12 Nipakadupa-Mu tesa-tesa to niboto nantesa kami bo topanggeniaka kami ante nompakawela ka kami kasusa to nabetena eꞌi. Ngata Yerusalem nisuku Komi neliu nggari pesuku to nipawela ka pura-pura ngata ntanina ri dunia. 13 Pura-pura pesuku to nitulisi riara buku i Musa nipawela-Mu ka kami. O PUE Alatala kami, naupa iwetu kami daꞌa nadota mompakadamba rara Komi. Kami batena daꞌa nadota mompalasi silaka kami bo daꞌa nompariara ntaꞌi pepatuduki-pepatuduki-Mu. 14 Komimo PUE Alatala kami to nombasuku kami ante kasusa to nipakasadia-Mu. Powia-Mu batena nanoa, tapi kami daꞌa nantuki Tesa-Mu.
15 O Pue Alatala kami, nipakanoto-Mu kuasa-Mu tempo nanggeni todea-Mu nesuwu nggari tana Masir, pade kuasa-Mu etu batena nitora sampe weꞌi-weꞌi. Nasilakamo kami, nasalamo kami. 16 O PUE, tempo nggaulu Komi naoso nanjaliku kami. Sabana etu neꞌe mana manggarau ngata Yerusalem, ngata-Mu mboto, ri bulu-Mu to nagasa. Nggari silaka kami bo kajaꞌa totuꞌa kami nggaulu sampe ngata Yerusalem bo todea-Mu nisauru pura-pura tau ri ntalili.
17 Jadi Pue Alatala kami, epemo posambaya bo pomperapiku. Toramo Sapo-Mu to nageromo etu, ala ranjani ntau pura-pura Komimo Alatala. 18 O Pue Alatala, epemo kami, kitamo kami pade pariara ntaꞌimo kami ante kagero ngata to nipetowe-Mu. Kami nosambaya ri jaꞌi Komi daꞌa sabana kami tau to nowia to nanoana, tapi sabana nabete mpuꞌu asi mata-Mu. 19 O Pue, epemo kami! O Pue, ampungimo kami! O Pue, pariara ntaꞌimo kami bo tulungimo kami masalisa! O Pue Alatalaku, neꞌe rapakasae ala pura-pura tau mangginjani aga Komimo Alatala. Kawiamo etu sabana ngata-Mu Yerusalem bo todea-Mu etu mpuꞌu-mpuꞌu bagia-Mu.”
Malaeka Gabriel nanggeni tesa ka i Daniel
20 Aku batena nosambaya nompangaku silakaku bo silaka todeaku Israel ante nerapi ka Pue Alatalaku ala mompakabelo Sapo-Na to nagasa.e 21 Tempo aku danosambaya, i Gabriel to nikitaku riara mpanggitaku bopia etu, nembua ante nagasi mpaka ri jaꞌiku tempo tau nombawai pesomba ngguwiana. 22 Pade notesamo iꞌa nompakanoto ka aku iweꞌi: “Daniel, aku narata ala mantulungi iko mangginjani tesa nabi to nipekirimu etu. 23 Tempo iko nompamula nerapi ka Alatala, Iꞌa nombasono iko. Pade aku narata nompakasampe pesono-Na etu ka iko, sabana iko mpuꞌu-mpuꞌu nipotowe-Na. Epemo mpakabelo-belo tempo aku mantesa batuana tesa bo panggita iweꞌi.
24 Pitu nggani pitumpulu mpaef etumo tempo to nipakatantu Alatala ala manggabasaka todea-Mu bo kota-Mu to nagasa nggari silaka bo kajaꞌana. Pura-pura silaka kana raampungi, bo kanoana to daꞌa ria kaopu-opuna kana rakawia, sampe panggita bo tesa to niboto etu mpuꞌu-mpuꞌu majadi. Pade Sapo Mpepue kana rapakagasa mpanjili ala mamala rapake bali mombasomba Alatala.
25 Kana ranjani bo rapekiri mpakanoto tesa eꞌi: Mompamula nggari tempo parenta rasuwuraka mombabangu bali ngata Yerusalem sampe marata sambaꞌa Topanggeniaka to nipelisi Alatala,g maria pitu nggani pitu mpae pade pitu nggani onompulu bo rompae.h Ngata Yerusalem bo jala-jalana ante tembo-tembona kana rabangu mpanjili. Tapi etu rakawia tempo madea kasusana.i j
26 Naopu pitu nggani onompulu bo rompae etu, Topanggeniaka etu kana rapatesi naupa daꞌa ria sala-Na. Pade kana marata tantara nu magau to narosona mompakaropu ngata Yerusalem ante Sapo Mpepue. Karopuna etu kana majadi ante daꞌa ninjani-njani ntau ewa ue nanggabuntu.k Pade kana maria posibali bo posipatesi sampe kaopu dunia ewa to nipakatantu Alatala. 27 Magau to naroso etu kana mompowia pojanji to naroso ante tau dea pitumpae kasaena. Karantongona pitumpae etu, iꞌa kana mompopenonto pewai bo pesomba. Pade sangele to nompakaeka to niuli ‘Kajaꞌana to Mompakagero’ kana rapopetoꞌona ri Sapo Mpepue. Pade etu kana maria ri saꞌa sampe iꞌa to nombabolina mamate ewa to nipakatantu Pue mamimo ka iꞌa.”