Panggita Daniel ri Binangga Tigris
10
Sangga nagana tolumpae Magau Koresha noparenta Persia, naria saongu tewai to nipasimbayu ka i Daniel to nidae Beltsazar. Tewai etu nakono pade nantesa posipatesi to najaꞌana. Batua nu tewai etu nipakanoto ka iꞌa riara mpanggita.2 Tempo etu aku, Daniel nombarasai kasusa raraku sampe nompakaede koroku tolu ntipa kasaena. 3 Riara tempo etu aku daꞌa nanggoni panggoni to narasa atau bau koyo, aku daꞌa nanginu anggur, bo daꞌa nompake minya wongi.
4 Ri tanggal rompulu bo ampa wula pamulanab aku nenggore ri wiwi Binangga Tigris to nabetena. 5 Nibangutakaku balengga nikitaku sambaꞌa to nompake pakea nggari kae nabula to nalusuna bo sulepena nggari bulawa to daꞌa ria galona. 6 Korona nenggila-nggila ewa watu ratna cempaka to nangguni ewa bulawa. Lenjena nareme ewa kila, pade matana najela-jela ewa apu. Palena bo kadana nenggila ewa tambaga to nigese, pade suarana ewa suara ntau dea.
7 Aga aku mboto nanggita panggita etu. Tau-tau nosanggani ante aku daꞌa nanggita, tapi nawiora mpuꞌu rara ira sampe nangowa netabuni. 8 Aku nipalasi ri setu njambaꞌaku nompekiri panggita to nompakatikaja etu. Tempo aku nanggita panggita etu lenjeku nangguni mpaa pade mana ria karoso koroku. 9 Tempo aku nangepe suarana notesa, nalipomo raraku pade nadungga ntuobomo aku ri tana. 10 Naopu etu naria pale nanjoko aku nantulungi aku nembangu nompatuko ante pale bo wukotuku.
11 Nangulimo iꞌa ka aku, “Daniel, iko nipotowe Alatala. Pekanggoremo pade epemo tesaku eꞌi mpakabelo-belo, sabana weꞌi-weꞌi aku eꞌi nipakau mpaka ri jaꞌimu.” Tempo iꞌa nanguli wetu nekanggoremo aku ante nolalete.
12 Pade nangulimo iꞌa ka aku, “Daniel, neꞌe maeka. Posambayamu niepe Alatalamo nompamula nggari eo pamulana iko nompasimbuku mangginjani tewai etu pade nompakatantu nompakaede koromu ri jaꞌi Alatalamu. Karataku eꞌi ewa tandaina posambayamu nitarimamo. 13 Tapi malaeka to najaꞌana nombakuasai poparenta Persia nangewa aku rompulu bo saeo kasaena. Pade sambaꞌa nggari tadulako-tadulako malaeka to nosanga ka i Mikhael narata nantulungi aku. Pade iꞌa nipalasiku ri Persia ri saꞌa.c 14 Aku narata ala mompakanoto ka iko nuapa to majadi ri jaꞌi todeamu tempo marata, sabana panggita etu nantesa anu majadi ri eo-eo nggapurina.”
15 Tempo iꞌa nanguli wetu notunggoumo aku pade daꞌa namala notesa. 16 Pade to nolenje mpomanusia etud nangulunjaka palena nanggabe sumbaku sampe aku namala notesa woꞌumo. Nangulimo aku ka iꞌa, “Tua, panggita eꞌi nompandasa aku sampe nalente mpuꞌumo aku. 17 Aku ewa sambaꞌa batua to nenggore ri ngayo magauna. Iwenumo aku motesa ka komi, Tua? Nalentemo wukuku bo napiimo nosaku.”
18 Pade sangganipa iꞌa nanjoko aku, pade nirasaiku nantambai bali karosoku. 19 Niulina ka aku, “Alatala nompotowe iko, sabana etu neꞌe mana makini bo maeka, kajadimo iko maroso.”
Tempo iꞌa nanguli wetu, naroso balimo aku pade nanguli, “Potesamo komi, Tua, sabana komi nompakaroso aku bali.”
20-21 Pade nekutanamo iꞌa, “Ninjanimu nuapa sabana aku narata ri jaꞌimu? Patujuna ala manguli ka iko nuapa to nitulisi riara Buku to Nakonona. Pade aku kana matingguli mangewa malaeka to najaꞌana to nombakuasai poparenta Persia. Maopu etu malaeka to najaꞌana to nombakuasai poparenta Yunani kana marata. Daꞌa ria sambaꞌa to namala mantulungi aku mangewa ira, aga i Mikhael, malaeka topanggalendu todeamu to Israel.