11
Aku mboto to nantulungi bo nanjaliku iꞌa tempo mpae pamulana poparenta Magau Darius to Media etu.”
Magau nggari tasina bo magau nggari puluna
2 Nangulimo tau to nolenje mpomanusia etu ka i Daniel, “Kuuli ka iko tesa to nakonona. Kana meumba tolumbaꞌapa magau moparenta ri Tana Persia.a Maopu etu kana meumba magau kapatambaꞌana to meliu nggasugi nggari magau ntanina etu.b Ri tempo iꞌa makuasa nggari kasugina etu, i'a kana mompasimbuku ante mpu'u-mpu'u mangewa poparenta Yunani.
3 Pade meumba woꞌumo sambaꞌa magau to marosona. Iꞌa kana moparenta saongu poparenta to neliu nggabetena, pade iꞌa kana mowia nantuki dotana mboto.c 4 Tapi tempo iꞌa mpuꞌu-mpuꞌu nakuasa, poparentana kana magero pade matibagi-bagi majadi patabagia nantuki patanjulapa dunia. Magau-magau daꞌa mulina kana manjambei iꞌa moparenta, pade ira daꞌa masimbayu karosona ewa iꞌa.d
5 Magau nggari puluna kana majadi maroso.e Tapi maria sambaꞌa nggari olo tadulakona majadi meliu nggarosopa pade iꞌa.f Pade tadulako etu kana moparenta poparentana mboto to nabete mpuꞌu. 6 Bara sakuya mpae kaliuna magau nggari puluna kana manggawia sintuwu ante magau nggari tasina, pade mompoporongo anana besig ante magau nggari tasina.h Tapi kasintuwu etu daꞌa maroo, pade ngana besi etu kana rapatesi. Iwetu woꞌu rongona langgai bo anana bo pura-pura batua to nanggeni iꞌa mpaka ri setu.
7 Daꞌa masaeka nggari setu, sambaꞌa nggari sampesuwu magau besi etu kana majadi magau.i Iꞌa kana mangewa magau nggari tasina,j pade mombagero tembo pekalendu sampe iꞌa padagi. 8 Tempo iꞌa matingguli mpaka ri Masir iꞌa kana manggeni parantau to nipepue balina, pade parewa bulawa bo salaka to nipake ira mepue ka pue-pue ira. Bara sakuya kasaena iꞌa daꞌa mosibali ante magau nggari tasina. 9 Maopu etu magau nggari tasina kana mangewa magau nggari puluna. Tapi magau nggari tasina kana radagi pade matingguli ri ngatana mboto.
10 Maopu etu ana-ana langgai magau nggari tasinak kana mompakasadia tantara to nadeana ala mosibali ka magau nggari puluna. Maria sambaꞌa nggari olo ira etu to malau mangewa iꞌa ante maroso nasimbayu ewa ue nanggabuntu. Pade tempo iꞌa malau karongganina, iꞌa kana mombasuaki tembo pekalendu nu balina. 11 Mangepe etu manggaraumo magau nggari puluna,l pade iꞌa kana malau mosibali ka magau nggari tasina.m Iꞌa kana mompakule mombadagi tantara to madeana to rapakasadia magau nggari tasina.n 12 Maopu etu iꞌa kana mompakalanga rarana sabana iꞌa padagi bo namala mompatesi bara sakuya mpulu njobu balina. Tapi iꞌa daꞌa masae majadi padagi.
13 Pade karongganina magau nggari tasina kana mompakasadia tantara to madeana, meliu nggadeapa nggari pamulana. Maopu bara sakuya mpae, iꞌa kana malau ante tantara to madeana ante parewa mposibali to maganana. 14 Tempo etu kana madea tau mangewa magau nggari puluna.o Kana maria bara sakuya mbaꞌa tau to nasoa nggari ngatamu, Daniel, mangewa magau nggari puluna ante patuju mompakadupa saongu panggita to nikita ira. Tapi ira kana radagi. 15 Maopu etu magau nggari tasina kana mombatatiku bo mangago saongu ngata to naria tembo pekalenduna. Tantara nggari puluna daꞌa mompakule mantaꞌamaka, pade tantara-tantara to neliu nggaroso woꞌu daꞌa mompakule meꞌewa. 16 Magau nggari tasina etu kana mowia nuapa-nuapa to rapodotana ante daꞌa ria tau mangewa iꞌa. Iꞌa woꞌu kana metoꞌo ri Tana to Narambap bo mombakuasai pura-pura tana etu.
17 Maopu etu magau nggari tasina kana mompakasadia pura-pura tantarana ala mangewa magau nggari puluna. Pade ante patuju mombakuasai pura-pura poparenta nu balina, iꞌa kana mompowia sintuwu ante mompoporongo anana besi ante magau nggari puluna etu.q Tapi niana etu daꞌa majadi. 18 Maopu etu iꞌa kana mosibali ka ngata-ngata ri wiwi ntasi, pade madea to radagina. Tapi kana maria sambaꞌa tadulako nggari ngata ntanina mompopenonto powiana to nasombona etu, pade mombabalasi kasombona etu.r 19 Maopu etu magau nggari tasina etu kana matingguli mpaka ri ngata-ngata to naria tembo pekalendu ri tanana mboto, tapi iꞌa kana radagi pade mana ria lelena ewa iꞌa.
20 Maopu etu iꞌa kana rasambei sambaꞌa magaus to mompakau topomperapi balasitee mompasuꞌu tau mombabayari balasitee ala mantambai kasugi poparentana. Pade daꞌa masaeka magau etu kana rapatesi, tapi daꞌa rapatesi riara mposibali, tapi aga rapatesi nggalino.”t
Magau nggari tasina to najaꞌau
21 Nanguli woꞌumo tau nolenje mpomanusia etu, “Magau nggari tasina nggapurina to moparenta iꞌa sambaꞌa tau najaꞌa to daꞌa masipato majadi magau.v Tapi iꞌa kana marata ante daꞌa ninjani-njani manjambei magau ante nadea akala bo pebagiuna. 22 Pura-pura tantara to mangewa iꞌa, bo sambaꞌa topanggeniaka to nowia pojanji ante iꞌa rapatesina pura. 23 Maopu iꞌa mowia pojanji etu, iꞌa kana mebagiu. Pade iꞌa mantambai maroso naupa todeana da'a nadeaka. 24 Ante daꞌa ninjani-njani ntau iꞌa kana mangago tana-tana to naboyana tempo todea ri setu nombarasai naꞌama. Iꞌa kana manggawia anu daꞌapa sanggani nikawia totuꞌana nggaulu. Pade kana rabagina ka roa-roana pura-pura mbara-mbara bo pura-pura kakalumana to raagona riara mposibali. Iꞌa woꞌu mompowia akala ala mosibali ka ngata-ngata to naria tembo pekalenduna, tapi aga sampalai lau.
25 Pade ante karoso bo kabiana kana rapakasadiana tantara to madeana ala mangewa magau nggari pulunaw to masadia-dia mangewa iꞌa ante tantara to maroso bo madea mpuꞌu. Tapi magau nggari puluna daꞌa mompakule mantaꞌamaka sabana iꞌa kana rapanawu ana buana mboto. 26 Tau to niparasayana to namosu ante iꞌa kana mompakanawu iꞌa. Tantara-tantarana kana radagi bo madea kana rapatesi. 27 Pade rombaꞌa magau etu kana mekatoko ri saongu meja pade manggoni mpasanggani. Tapi nia ira majaꞌa, pade ira kana mosibagiu. Nia ira daꞌa majadi sabana tempona daꞌapa narata. 28 Pade magau nggari tasina kana matingguli mpaka ri ngatana ante mbara-mbara to raagona. Iꞌa kana monia mompakagero agama to niparasaya todea Alatala. Iꞌa mowia nuapa-nuapa to nipodotana pade matingguli mpaka ri ngatana mboto.
29 Ri tempo to nipakatantu Alatala iꞌa kana mangewa ngata ri bagia puluna woꞌumo, tapi aselena nontani nggari tempo pamulana. 30 Sabana tau-tau to Kitimx ante sakaya-sakaya mposibalina kana marata nggari Lewuto Siprus ala mangewa iꞌa, sampe iꞌa majadi maeka. Pade iꞌa kana matingguli ante mpuꞌu-mpuꞌu marau bo mompasimbuku mombagero agama todea Alatala. Pade iꞌa kana mabelo rara ri jaꞌi ntau to nokanggaura nomparasaya agama etu.
31 Pade kana rapakauna tantara-tantarana mompakatantoru Sapo Mpepue. Ira kana mantagi tau manggeni pesomba eo-eo pade mompopetoꞌo ri setu sangele to mompakaeka to niuli ‘Kajaꞌana to Mompakagero.’y 32 Pade ante bagiu bo akalana magau etu kana mompasimbuku mompakanawu tau-tau to nompalasi agama ira. Tapi tau to natundu ri jaꞌi Alatala kana mabia mangewa iꞌa. 33 Tau-tau to manoto kana mompatuduki todea. Tapi bara sakuya tempo kasaena ira kana rapatesi riara mposibali atau riara apu. Pade bara sakuya mbaꞌa woꞌu kana raala mbara-mbarana pade rakeni rapajadi batua. 34 Tempo tau-tau rapatesi iwetu todea Alatala kana mombarata petulungi sakedi. Pade madea tau mosigalo ante ira, tapi aga mompekiri koro ira mboto. 35 Sabagia nggari tau-tau to nanoto etu kana mamate, tapi etu mombauji todeana sampe ira kana majadi magasa pokaingguna. Etu batena majadi sampe kaopu nu dunia, etumo tempo to nipakatantu Alatala.”
Magau to mompakalanga korona mbotoz
36 Nanguli woꞌumo tau to nolenje mpomanusia, “Magau nggari tasina kana mowia nuapa-nuapa nantuki dotana mboto. Ante masombo iꞌa kana manguli iꞌa meliu nggabete nggari wiata nggari umba-umba, pade iꞌa kana manguli sinjaꞌi Alatala to Neliu Nggalangana. Iꞌa kana mowia iwetu sampe rau rara Alatala maopu rasuwuraka, sabana nuapa to nipakatantu Alatala kana majadi ntani ruru. 37 Magau etu daꞌa momparasaya pue to nipesomba totuꞌana nggaolu, pue to nitoiya pura-pura besi bo pue-pue nggari umba-umba. Iꞌa daꞌa momparasaya pue-pue etu sabana nisarumakana koronapa neliu nggabete nggari ira. 38 Tapi iꞌa aga mombasomba pue to daꞌapa sanggani nisomba totuꞌana nggaolu, etumo pue to nanggalendu tembo-tembo. Iꞌa kana mombawai bulawa, salaka, watu to nasulina, bo pesomba-pesomba to nagaya ntanina ka pue etu. 39 Ante petulungi pue ntanina etu iꞌa kana mombagero ngata-ngata nikalendu tembo-tembo to narosona. Sema to mompangaku pue etu kana rawai ka pebila to nabetena bo pekatoko to nalangana, pade rawai woꞌu ka tana majadi gajina.
40 Ri tempo namosu kaopu nu dunia magau nggari puluna kana marata mangewa magau nggari tasina. Pade magau nggari tasina kana malau mosibali ka magau ri puluna ante kabiana ewa karoso poiri naramboso. Madea kareta mposibali rakenina, ante tantara-tantara nojara bo madea sakaya mposibali. Iꞌa kana mosibali ewa ue nanggabuntu, pade madea ngata mamala ka iꞌa. 41 Tana to Narambaa woꞌu raagona, pade mpulu njobuna tau kana rapatesina. Tapi poparenta Edom, Moab, bo topanggeniaka poparenta Amon kana masalama. 42 Tempo iꞌa mombadagi madea poparenta tana Masir woꞌu daꞌa maboli. 43 Kana raagona woꞌu mbara-mbara Masir, etumo bulawa bo salaka ante mbara-mbara ntanina to nasuli olina. Iꞌa kana ratulungi to Libia bo to Etiopia. 44 Tapi lele nggari sabingga kamataeona bo tasina kana mompakatikaja iꞌa sampe iꞌa malau mosibali ante marau mpuꞌu rarana, pade madea tau rapatesina. 45 Pade rapatakana tenda poparentana ri olo tasi bo bulu petoꞌo Sapo Mpepue. Tapi kaopuna iꞌa kana mamate, pade daꞌa kamba sambaꞌa tau mamala mantulungi iꞌa.”