Kaopu nu dunia
12
Notesa woꞌumo tau to nolenje mpomanusia etu, “Tempo etu kana marata malaeka to nakuasana to nosanga ka i Mikael. Iꞌamo to nanggalendu todeamu to Israel. Maliu etu kana marata kasusa bete to daꞌapa sanggani najadi, nompamula nggari tempo manusia nompake basa to nosisala. Tapi pura-pura tau nggari todeamu to nitulisi sangana riara buku Alatalaa kana rapakasalama. 2 Madea nggari tatongo ira to namatena kana matuwu bali. Santongo matuwu sampe ri kasae-saena, pade santongo kana mombarasai kasusa bo kapari to najaꞌana sampe ri kasae-saena. 3 Pura-pura tau to nanotona kana mareme ewa reme nu langi. Pade ira to mompatuduki tau manggawia to nabelona bo nanoa kana mareme ewa betuꞌe sampe ri kasae-saena.”4 Pade nangulimo tau etu ri jaꞌiku, “Daniel, tutumo buku etu weꞌi-weꞌi, pade patakamo segel ala matetutu sampe ri kaopu nu dunia. Madea tau mompasimbuku mangginjani nuapa to majadi, pade pangginjani kana mantambai kadeana.”
5 Naliu etu aku i Daniel nanggita naria rombaꞌa malaeka ntanina, sambaꞌa nenggore ri wiwi binangga sabingga guseꞌi bo sambaꞌapa nenggore ri wiwi binangga sabingga gusaꞌa. 6 Nekutanamo sambaꞌa nggari ira etu ka tau to nopakea kae nabula to nalusuna to nekanggore namosu ulu binangga, b“Nepia kajadia-kajadia to nipogumaa eꞌi maopu?”
7 Tau etu nangonggotaka robingga palena mpaka ri langi. Niepeku iꞌa nojanji ante nanguli sanga Alatala to Natuwu Mpeliu, niulina, “Kajadia-kajadia etu kana majadi tolumpae santongo kasaena. Ane maopumo pepandasa todea Alatala, maopu woꞌumo kajadia-kajadia to nipogumaa etu.”c
8 Pura-pura to nitesana etu niepeku tapi daꞌa ninjaniku patujuna. Jadi nekutanamo aku ka tau etu, “Uma, iwenumo kaopu pura-pura kajadia etu?”
9 Nesonomo tau etu, “Daniel, kalaumo weꞌi-weꞌi, sabana tesa-tesa eꞌi kana ratabuniaka bo daꞌapa rapopanjani sampe ri kaopu nu dunia. 10 Madea tau kana rauji bo rapakagasa pokaingguna. Tapi tau to naja'a batena mowia to naja'ana. Ira da'a ntoto mangginjani, tapi ira to nanotona kana mangginjani.
11 Nggari tempo pesomba eo-eo etu rapopenonto, pade sangele to mompakaeka to niuli “Kajaꞌana to Nompakagero” etu rapopetoꞌo ri Sapo Mpepue, kana maliu sanjobu roatu siompulu eo. 12 Masana mpuꞌu ira to mantaꞌamaka sampe sanjobu toluatu tolumpulu bo alima eo.
13 Tapi iko, Daniel, taꞌamakamo sampe kaopuna. Iko kana mamate tapi iko kana matuwu bali ala mantarima tambomu to nipakatantu ka iko ri tempo kaopu nu dunia.”