Yesu lye shiqtuq qyelniq hhaeq yaol moqheilheil du hhei
9
Yesu lye shiqtuq qyelniq hhaeq yaol gul'eeq laeq, kaol yoqhhaeteel'ae haelzhol e niqhaeq yaol zongltyeq ongl, kaol halza e naelgol zonglmeeq ongl e onglzaeq mael kaol laqtaq biq hhei biq. 2 Yoqhhaeteel yaol moqheilheil du hheikaol Momil e Goqja e fuqyin mael bi geegaeq yil, kaol cholnael bi zonglmeeq yil. 3 Yesu yoqhhaeteel'ae gee biq: "Noteel yil fu, qiqgiq eiq haeq heil gil, zaeqngeeq haq baq, palbye haeq pi, zaeq e haeq heil, dyuqbaq haeq pi, onglci'ae dum do e poljye niq ko eiq haeq heil. 4 Aeqsul toq'ae do'li laol, tyuqvae milcaeq ae'lye deelsae hoq fu keellye, tyutoq'ae zholgae hhei gil maoqhhae. 5 Noteel'ae maeq sheeqcaq laq hael laoq, noteel tyuqvae milmae heeqmyel ae'lye deelsae hoq fu, aeqkeel mael'ae su e haeqlyel mael nuqhael gae hhei, xilnye zongl mael laoq, yoqhhaeteel haelzonglhael maq hoq'ae lye aeqyoteel'ae bi loq maoqlye kaol'ae." 6 Tyulkaol, yoqhhaeteel duyil vae, pusiq qiqgael qiqgael lye deel dyu byel hhei, kaol haeqvae lael'ee myel fuqyin geegaeq gil biq kaol cholnael zonglmeeq biq.Xi'lyul e neemae mael'ae maeq nyuq byel ongl biq'ae
7 Xi'lyul zongmae silqinq xihael gaeq hhei biq laol, neemae mael'ae maeq nyuq byel ongl biq'ae, cholyaeq qiq miq xilnye gee kaol'ae: "Yoqhanl cholsil onglci ae'lye dyeqhoqlal vae." 8 Cholyaeq qiq miq yol gee: "Yiqlilyal mol du'lal vae." Qiq miq laoq yol gee: "Yilkaeaeqnao e xianzhi qiq hhaeq dyeqhoqlal vae." 9 Xi'lyul gee: "Ngaeq lye Yoqhanl e vuqduq mael dega wae. Ngeelfeiq, xitaeq aeqsul oqlolyaeq? Ngaeq'ae haelmillyekaol yoqhhaeq haelzongl e silqinqhael gaeqlael hhaemaeq?" Tyulkaol, yoqhhaeq Yesu yaol zhee mol goq biq'ae.
Aqba ngaeq mael kaol ngaeqdyel niq yaeq e shenqjiq
10 Shiqtuqhael hoqlal laol, yoqhhaeteel haelzongl e silqinqhael Yesu'ae geedu hoqlal biq. Yesu yoqhhaeteel yaol sheeq hheikaol, ochoq yaol maeq bi loq myel Boqsaildal milmae nilmyel'ae yil vae. 11 Ngeelfeiq, cholyaeqhael lye loqzaeq biq kaol cho'lyeq li vae. Yesu yoqhhaeteel'ae zhaofu biq, yoqhhaeteel'ae Momil e Goqja e fuqyin mael geegaeq gil biq, kaol naelgol zonglmeeqzaeq maoqlye hael vae eiq zonglmeeq gil biq.
12 Mqkiqkiq gayi goqbiq fu, shiqtuq qyelniq hhaeq yoqhhaeq zael'ae lael, gee: "Yaeqmeel aedeeteel zhol myel vae laoq byelcongq'ae, cholyaeqhael'ae hoqyil oqlye gee biq, yoqhhaeteel yaol saeqvae dongqpyeq e pusiq'ae kaol pusiq siqyaeq vae haqhhael, kaol zaeq e bi saelpozaeq yil gil." 13 Yesu gee: "Noteel yoqhhaeteel'ae bi zaeq hhei gil!" Yoqhhaeteel gee: "Ngaeteel'ae halzahael laoq aqba ngaeq mael kaol ngaeqdyel niq yaeq wae, aedeeteel cholyaeq xihael'ae zaeq e vul yil biq kaolmaoqlaol maq lo'ae." 14 Tyuqfu haqyoyaeq ngaeqca (5000) hhaeq zoqlal maoqmyel zhol hhae. Yesu laqcaqhael'ae gee biq: "Yoqhhaeteel'ae qiq miq qiq miq lye bi zholgae hhei gil, qiq miq laoq ngaeqqyel hhaeq zoqlal maoqmyel hhae." 15 Laqcaqhael yoqhhaeq gee e saeziq laoqmyel zongl'ae, kaol cholyaeqhael'ae bi zholgae hhei gil vae. 16 Yesu aqba ngaeq mael kaol ngaeqdyel niq yaeq mael heilqei hhei, mqmae'ae chifu deelhhei kaol meeqyaevae lye gee laol, aqba mael heiqpa hheikaol laqcaqhael'ae heilmoq hhei biq, kaol cholyaeqhael e yiqsiboq'ae baqdeel hhei lye gee biq. 17 Cholyaeqhael zaeq vae, zaeqdye hhei dyul maeqcil, heiqpa yo feiq maeq zaeq byel ongl hael heil'eeq hoqlaeq hael qyelniq guqlanq zoq'ae.
Biqdeq laoq Yesu Jidu'ae lye gee
18 Qiqzael laoq, Yesu qiq hhaeq myel heeldoq gee fu, laqcaqhael eiq yoqhhaeq tyuqvae baelzhol hhae. Yesu yoqhhaeteel'ae naelhaeq biq: "Cholyaeqhael ngael aeqsul'ae lye gee hhaemaeq?" 19 Yoqhhaeteel geehoq biq: "Qiq miq laoq shelxiqzongl e Yoqhanl'ae lye gee, qiq miq laoq Yiqlilyal'ae lye gee, qiq miq laoq yilkaeaeqnao e xianzhi qiq hhaeq dyeqhoqlal hhae lye gee." 20 Yesu yoqhhaeteel'ae yol naelhaeq biq: "Aelmaol noteel laoq? Noteel gee ngael aeqsul maeq?" Biqdeq geehoq biq: "Momil e Jidu'ae!"
Yesu yoqhhaeq sil kaol dyeqhoqlal mael laefuq fuqli qiq pu geedu
21 Yesu aeqlyeq maeqlyeq myel yoqhhaeteel'ae moqheilheil biq, silqinq xilmael qiq hhaeq eiq haeq geedu yil lye minllinl biq. 22 Yol gee: "Cholyaeq Yaqyo'ae aeqdilmyel haeldyul dyulmae hhae bi zonglkyuq hhae, zhangqlaoqhael, jilsizhangqhael kaol Momil e saeziq mael loq e laqkiqhael lye maq mul lye bi zongl, kaol bi xyeq hhei, suq nao laol dyeqhoqlal maoqlye hhae."
23 Yesu yoqhhaeteel'ae yol gee biq: "Cholyaeq qiq hhaeq ngaeq'ae cho'lyeq maoqlye kaollaoq, aeqyoyoq yaol beiqgae hhei, kaol naochomyel aeqyoyoq e shiqziljal mael pi hheikaol ngaeq'ae cho'lyeq lael maoqhhae. 24 Aeqsul aeqyoq e aeqyil mael dyeqdeel maoqlye nyuq kaollaoq, aeqyil mael hhae sil ngeelvae; ngeelfeiq, ngaeq gae'lye aeqyil maqza vae kaollaoq, aeqyil mael haeqfu eiq hhae dyeqdeel ngeelvae. 25 Cholyaeq qiq hhaeq milcaeq taq e halzahael gilzuqmyel zonglzaeq laeq ongl feiq, aeqyoq e aeqyil mael maeq za vae, paelsilmyel hhae sil kaollaoq, aeqchee meeqyo'lael kiq siq maeq? 26 Aeqsul ngael kaol ngaeq e saeziq mael miqyil daoqcheeq yae lye kei kaollaoq, Cholyaeq Yaqyo laoq aeqdae e rongqyaol onglci'ae lye, senljyeq mqmae yosonglhael nyegael qiqgael lael fu, yoqhhaeq vae eiq miqyil daoqcheeq e cholyaeq'ae lye fu biq maoqlye hhae. 27 Ngael aeqdilmyel noteel'ae geegaeq laeqngeel, saeqvae haoqtul deelhhei e cholyaeqhael, qiq miq laoq sil mael maeq yo'li biq fu ae'lye, Momil e Goqja mael hhae mol'ae."
Yesu laefuq laoqmyel maeq dul myel peqlal
28 Saeziq xihael gee hhei aeqnaol heiq nao laellye fu, Yesu laoq Biqdeq, Yoqhanl kaol Yaqgel yaol sheeq hheikaol, geeqzhoq vae heeldoq gee li. 29 Yesu heeldoq gee siq fu, yoqhhaeq laefuq laoqmyel maeq dul myel peqlal vae, aelhongq mael pulchi'lye zheelniqlye hhae. 30 Cholyaeq niq nulhhaeq qiqlaqmyel yoqhhaeq nyegael saeziq gee'naeq, yoqhhaeteel laoq Moxi kaol Yiqlilyal'ae. 31 Yoqhhaeteel zheelniqlye aeqcael onglci'ae lye mol du'lal, kaol Yesu hhae sil e silqinq mael gee gil hhae, yoqhhaeq Ye'lulsa'lenq vae zonglbyel maoqlye e silqinq mael ngeelvae. 32 Biqdeq kaol yoqhhaeq e yelchoq laoq yuqxul hhae. Nyuq lael fu, yoqhhaeq e rongqyaol, kaol yoqhhaeq nyegael qiqgael bael haoqtul deelhhei e cholyaeq niq nulhhaeq yaol mol hhei biq. 33 Yoqhhae niq nulhhaeq deelsae hoq maoq fu, Biqdeq Yesu'ae gee biq: "Laoqsi, aedeeteel saeqvae zhol zhee meeq yae! Ngaeteel saeqvae haeqpael haelcul suq ssul diqkaeq hhei hhaeq, qiq ssul laoq noq'ae, qiq ssul laoq Moxi'ae, qiq ssul laoq Yiqlilyal'ae." Yoqhhaeq aeqchee gee yae lye aeqyoq maeq loq biq'ae. 34 Yoqhhaeq saeziq xihael gee siq fu, mqdul qiq congq du'lal kaol yoqhhaeteel yaol congqkaeq biq, yoqhhaeteel mqdul onglci'ae do'li laol, zhee gu li gil biq'ae. 35 Mqdul onglci ae'lye yotyel gaeq duyi, gee: "Xitaeq ngaeq e yaqyo'ae, ngaeq lye saelpodu hhei aeqlil. Noteel yoqhhaeq gee mael naelhaeq maoqhhae!" 36 Yotyel cil li fu, Yesu qiq hhaeq myel zhol mol lael. Tyuqfu naohaeq'ae, laqcaqhael yotyel maq du'ae. Yoqhhaeteel'ae mol hhei biq e silqinq mael, qiq hhaeq eiq maeq geedu yil'ae.
Yesu lye niqhaeq guqzaeq li biq e yaeqguq yaol zonglmeeq biq
37 Aeqnaol qiq nao, yoqhhaeteel geeqzhoq ae'lye gae hoqyi vae, cholyaeq qiq miq yoqhhaeteel tyuboq'ae deelpol laeq. 38 Cholyaeqhael onglci'ae cholyaeq qiq hhaeq gul tullaeq: "Laoqsi, ngaeq e yaqyo'ae qiqlaq bael fu lael laeq lye noq'ae geezaeq lil, ngaeq'ae yaqyo xitaeq maoq maeq zhol laeq'ae. 39 Maeqshol e yohael lye yaeqguq yaol eetyeq biq, kaol qiqlaqmyel gul tullaeq, maeqshol e yohael mael yoqhhaeq'ae ssukiqssu'nyel myel bi ssu tullaeq, myeqbongq mael'ae haqmeq pyeqdu hhae, maeqshol e yohael mael yoqhhaeq'ae xilnye zonglkyuq biq hhae, yoqhhaeq ae'lye maeq deelsae nae'ae. 40 Ngael noq e laqcaqhael'ae maeqshol e yohael mael bael lyeqdu laeq lye geezaeq yo biq wae, ngeelfeiq, yoqhhaeteel maeq lyeqdu ongl biq'ae." 41 Yesu gee: "Ei! Yaeqmeel dyeqdeel e cholyaeqhael o, aeqcheekaol Momil'ae maeq xiangxinl kaol xinqlalmyel zongl gil lilmaeq? Ngael noteel nyegael qiqgael baelzhol, kaol noteel'ae haeq fu keellye renqnail keel laeq? Noq e yaqyo yaol saeqvae sheeqlaeq." 42 Yaeqguq xitaeq deel laeq fu, niqhaeq lye yoqhhaeq yaol zonglleeq biq, kaol yoqhhaeq'ae ssukiqssu'nyel myel bi ssu. Yesu maeqshol e yohael mael'ae vuq biq, kaol yaeqguq yaol zonglmeeq biq, kaol yoqhhaeq e aeqdae vae sheeqmoq hoq hhei biq vae. 43 Gilzuqmyel cholyaeqhael Momil e onglzaeq gae'lye gaqmaqzuq li gil biq'ae.
Yesu yoqhhaeq sil kaol dyeqhoqlal mael dil'el cil geedu hhei
Cholyaeqhael Yesu haelzongl e silqinq mael'ae gaqmaqzuq gil biq siq fu, Yesu laqcaqhael'ae gee biq: 44 "Aeqgael Cholyaeq Yaqyo yaol cholyaeqhael e aqlaq mael'ae eemoq biq maoqlye hhae, kaol noteel saeziq xihael naelhaeq do hhei gil maoqhhae." 45 Laqcaqhael saeziq xihael aeqchee mael'ae gee hhae lye maeq loq gil biq'ae. Yoqhhaeteel'ae maeq bi loq lyekaol, saeziq xihael laoq yoqhhaeteel'ae geehhaq biq wae siq, yoqhhaeteel eiq Yesu vae maeq naelhaeq peq biq'ae.
Hhaelheeq heeqli e qiq hhaeq aeqsul'ae lye mael
46 Laqcaqhael yoqhhaeteel onglci'ae hhaelheeq heeqli e qiq hhaeq aeqsul'ae lye geezil geezae gil'ae. 47 Yesu yoqhhaeteel e neemae mael'ae nyuq mael loq biq, kaol yaeqguq guqyaeq qiq hhaeq cheelpol hheikaol aeqyoq e dongqpyeq'ae bi haoqtul deelhhei. 48 Kaol yoqhhaeteel'ae gee biq: "Aeqsul ngaeq gae'lye yaeqguq xitaeq'ae sheeqcaq biq kaollaoq, ngaeq'ae sheeqcaq ngeelvae; aeqsul ngaeq'ae sheeqcaq laq kaollaoq, ngaeq yaol moqheilheil duyi laq e qiq hhaeq'ae sheeqcaq biq hhae. Noteel onglci'ae hhaelnil nilli e qiq hhaeq laoq, yoqhhaeq laoq hhaelheeq heeqli e qiq hhaeq ngeelvae."
Noteel boq'ae haoqtul cholyaeq
49 Yoqhanl geehoq biq: "Laoqsi, ngaeteel cholyaeq qiq hhaeq mol aeqwae. Yoqhhaeq noq e cholmil maellye niqhaeq lyeqdu hhae. Yoqhhaeq ngaeteel nyegael noq'ae maeq bael cho'lyeq nae'ae, tyulkaol, yoqhhaeq'ae diqqye yo biq wae." 50 Yesu Yoqhanl'ae gee biq: "Yoqhhaeq'ae haeq diqqye biq, noteel'ae maeq hhaeq'ae lye maeq gee hael laoq, noteel boq'ae haoqtul ngeelvae."
Saqmaqlilyal cholyaeq Yesu'ae maeq sheeqcaq biq'ae
51 Yesu yaol mqmae'ae sheeq da hoqli e naohaeq keellael goqbiq vae, yoqhhaeq aeqdilmyel nyuqmeeq hhei kaol Ye'lulsa'lenq vae yil vae. 52 Yesu lye cholyaeqhael yaol moqheilheil du hheikaol laefuq'ae bi yil. Yoqhhaeteel yil vae, Saqmaqlilyal e pusiq qiqgael'ae do'li, kaol yoqhhaeq'ae laefuqmyel paeqgaelsael meeq deelhhei yil biq maoqlye hhae. 53 Yoqhhaeq Ye'lulsa'lenq vae yil maoqlye zongl hhae, kaol Saqmaqlilyal cholyaeqhael yoqhhaeq'ae maeq sheeqcaq biq'ae. 54 Laqcaq Yaqgel kaol laqcaq Yoqhanl mol hhei biq, kaol gee: "Hhaoqsongl o, nol ngaeteel yaol aeqzaeq doq mael'ae mqmae ae'lye loq gayi kaol yoqhhaeteel yaol pe mye biq lye moqheilheil biq maeq?" 55 Yesu zipol hoqlael kaol yoqhhaeteel'ae vuq biq. 56 Aeqnaol, yoqhhaeteel baeqjyelboq e pusiq vae yil vae.
Yesu'ae cho'lyeq maoqlye fu zongl maoq mael
57 Yoqhhaeteel gaelmae deel fu, cholyaeq qiq hhaeq yoqhhaeq'ae gee biq: "Nol haeqvae yil laol, ngael eiq noq'ae cho'lyeq maoq!" 58 Yesu yoqhhaeq'ae gee biq: "Honglsaelnyulpyu laoq gonglbyu za, mqmae e haeqzil laoq byelbeeq za, ngeelfeiq, Cholyaeq Yaqyo laoq vuq'ongq'ongq hhael eiq maqza'ae." 59 Yoqhhaeq baeqjyelboq e cholyaeq qiq hhaeq'ae gee biq: "Nol ngaeq'ae cho'lyeq lael!" Yultaeq gee: "Hhaoqsongl o! Ngaeq'ae laoqhaol vae laefuq bi hoqli laq, aeqgael ngaedae yaol baqduqm maoqlye oqyilsiq." 60 Ngeelfeiq, Yesu yoqhhaeq'ae gee biq: "Sil e cholyaeq yaol yoqhhaeteel e cholsil'ae bi baqduqm yil! Ngeelfeiq nol laoq, Momil e Goqja e fuqyin geegaeq yil gil biq." 61 Cholyaeq qiq hhaeq gee: "Hhaoqsongl, ngael noq'ae cho'lyeq maoq, ngeelfeiq, ngael laefuq laoqhaol vae hoqyil, kaol ngatoq e cholyaeqhael'ae deel maoqlye geehoq yil biq maoq yae." 62 Yesu gee: "Aqlaq mael nuqqeiq mael'ae zoqtyeq deelhhei, kaol naolfufu hoq e cholyaeq laoq, Momil e Goqja'ae do'li maeq zae'ae."