Yesu lye ngaeqca (5000) hhaeq yaol bi zaeqdye e shenqjiq
6
Silqinq xihael aeqnaol, Yesu Ja'lillil eeldeel deelmae'ae guq li, eeldeel deelmae xilmael laoq Tiqbiqliyal eeldeel deelmae ngeelvae. 2 Haelnaeqmyel cholyaeq laoq Yesu cholnael zonglmeeq e shenqjiq mol gol vae, tyulkaol, yoqhhaeq'ae cho'lyeq vae. 3 Yesu geeqzhoq vae da'li, kaol laqcaqhael nyegael tyuqvae zholgae hhei. 4 Tyuqfu, Yoqtail cholyaeq e Yuq'yeqjyeq keellael goqbiq wae. 5 Yesu vuqduq baqtul hheikaol chifu, kaol haelnaeq naeqmaemyel cholyaeq yoqhhaeq boq'ae deel laeq mol hhei biq, kaol Fei'lil'ae gee biq: "Aedeeteel haeqvae lye aqba vul laq kaol cholyaeq xihael'ae bi zaeq laeq?" 6 Yoqhhaeq saeziq xilmael gee mael laoq, Fei'lil'ae shilfu biq hhae, aeqyoq laoq haeqfu'ae'lye haelmillye zongl maoqhhae lye loq kaol'ae. 7 Fei'lil geehoq biq: "Niqhael (200) pulziq e aqba vul laq kaol qiq hhaeq'ae teel byel biq kaol'eiq maq lo'ae." 8 Ximenq Biqdeq e aeqnil, Andeqlyel lye gul biq e laqcaq qiq hhaeq Yesu'ae gee biq: 9 "Saeqvae yaeqguq guqyaeq qiq hhaeq'ae dalmeq aqba ngaeq mael, kaol ngaeqdyel niq yaeq heil hhei'ae; ngeelfeiq, xuldyulmyel cholyaeq'ae byel biq e aeqchee eeldidi kaollaeq?" 10 Yesu yoqhhaeteel'ae moqheilheil biq, gee: "Noteel cholyaeqhael'ae zholgae hhei lye gee biq." Tyuqvae milcaeq'ae haelsaeq zhee dyeq'ae, kaol cholyaeqhael zholgae hhei vae, haqyoyaeq dyel'eiq ngaeqca (5000) hhaeq laellye zoq hhae. 11 Yesu aqba mael heilqei hhei, kaol Momil'ae meeqyaevae lye gee biq laol, zhol deelhhei e cholyaeqhael'ae byel hhei biq; ngaeqdyel byel mael eiq xilnye hhae, kaol cholyaeqhael haeldyul mul maoqlye laol haeldyul byel biq hhae. 12 Yoqhhaeteel zaeqdye hhei aeqnaol, Yesu laqcaqhael'ae gee biq: "Heiqpa yo feiq maeq zaeq byel ongl hael maeq heil'eeq hoq hhei kaollaoq laeqdaeqmyel wae." 13 Laqcaqhael lye cholyaeqhael heiqpa yo feiq maeq zaeq byel ongl biq e dalmeq aqba mael heil'eeq hoq hhei vae, kaol qyelniq guqlanq heilbong hhei vae, aqba xihael laoq ngaeq mael e aqba ae'lye heiqpa ga hhei hael ngeelvae. 14 Cholyaeqhael Yesu zongl e shenqjiq mael mol hhei biq laol, gee: "Xitaeq laoq aeqdilmyel milcaeq taq'ae yi maoqlye e xianzhi ngeelvae." 15 Yesu laoq cholyaeqhael maeqnaelhaeq maeqzaeqmyel yoqhhaeq yaol zongmae bi geiq maoqlye hhae lye loq'ae, kaol yoqhhaeq deelsae hheikaol qiq hhaeq myel geeqzhoq'ae yil vae.Yesu eeldeel deelmae taq'ae deel
16 Kiqsulkiqxeiq fu, yoqhhaeq e laqcaqhael eeldeel deelmae deeljyel'ae gaeyil vae. 17 Yoqhhaeteel hoq mael'ae da'li vae, kaol eeldeel deelmae'ae he guq yil kaol Jabaiqnongq'ae yil maoqlye hhae. Tyuqfu, mqkiqkiqqye wae, ngeelfeiq, Yesu yoqhhaeteel tyuqvae maeq keellael wae siq. 18 Qiqlaqmyel, eeldeel deelmae taq'ae zaeqxil xilmae bo tullaeq, kaol eeldiqdiq tullaeq. 19 Laqcaqhael hoq mael ngaeq koq gong'liq laellye he du'li vae, yoqhhaeteel Yesu eeldeel deelmae taq'ae deel, kaol hoq mael'ae deelniq laeq mol hhei biq, kaol yoqhhaeteel gu tul gil laeq biq. 20 Kaol Yesu yoqhhaeteel'ae gee biq: "Ngael lil, maq gu gil kael." 21 Tyulkaol, yoqhhaeteel Yesu yaol hoq mael'ae ee da hhei biq, kaol hoq mael qiqlaqmyel yoqhhaeteel yil maoqlye e milcaeq'ae keelyil vae.
Yesu laoq aeqyil e zaelsiq'ae
22 Aeqnaol qiq nao, eeldeel deelmae yulboq'ae haoqtul deelhhei e cholyaeqhael, tyuqvae hoq e hoqyaeq qiq mal maoq maqza mol hhei biq, kaol yoqhhaeteel laoq Yesu yoqhhaeq e laqcaqhael nyegael hoq mael'ae qiqgael maq bal da'li, kaol laqcaqhael yil dyul wae lye loq'ae; 23 Ngeelfeiq, Tiqbiqliyal vae lye hoq mee'nae mal he laq, kaol Hhaoqsongl meeqyaevae lye gee hhei'laol, cholyaeqhael'ae aqba bi zaeq e milcaeq'ae niqli myel vae he deelhhei. 24 Cholyaeqhael laoq Yesu kaol laqcaqhael tyuqvae maeq zhol'ae lye mol hhei biq, kaol hoq mael'ae da'li, kaol Jabaiqnongq vae Yesu'ae saelpo yil vae.
25 Kaol yoqhhaeteel eeldeel deelmae yulboq vae Yesu yaol saelpopuq hhei vae, kaol yoqhhaeq'ae naelhaeq biq: "Labiq, nol saeqvae haeqfu keellael lilmaeq?" 26 Yesu geehoq biq: "Ngael aeqdilmyel noteel'ae geegaeq laeqngeel, noteel ngaeq'ae saelpo mael laoq, shenqjiq mol hheikaol maeqngeel'ae, noteel aqba hhae zaeqdye hhei biq kaol'ae. 27 Noteel buq gayil kiq e zaeqzael gae'lye haeq mulzaq gil, ngeelfeiq, cholyaeq'ae haeqfu eiq zadeel e aeqyil bi za lalkiq e zaeqzael gae'lye mulzaq maoqhhae. Zaeqzael xilmael laoq Cholyaeq Yaqyo noteel'ae biq laqngeel lye mael ngeelvae, Aeqdae Momil lye gailzangkei da hheikaol zenlminq du hhei vae kaol'ae." 28 Cholyaeqhael yoqhhaeq'ae yol naelhaeq biq: "Momil e mulhhael mael mul maoqlye kaollaoq, ngaeteel aeqchee zongl maoqhhae maeq?" 29 Yesu geehoq biq: "Momil lye moqheilheil duyi e qiq hhaeq'ae xiangxinl laol, Momil e mulhhael mael mul ngeelvae." 30 Tyulkaol, yoqhhaeteel Yesu'ae gee biq: "Nol aeqchee shenqjiq zongl du hhei, kaol ngaeteel'ae bi mol hhei laeq laol noq'ae xiangxinl lael laeq? Nol aeqdilmyel aeqchee zongl kiq lilmaeq? 31 Ngaeteel e aeqpyuq aeqdae diqsheelleeldye vae maqnaq zaeq gol vae, suqhhaq taq'ae cu deelhhei laoqmyel: 'Yoqhhaeq lye mqmae ae'lye lael e zaeqzael mael yoqhhaeteel'ae biq biq kaol bi zaeq.'" 32 Tyulkaol, Yesu yoqhhaeteel'ae gee biq: "Ngael aeqdilmyel noteel'ae geegaeq laeqngeel, mqmae ae'lye lael e zaeqzael mael Moxi lye noteel'ae biq biq maeqngeel'ae, ngaedae lye mqmae ae'lye lael e aeqdilmyel e zaeqzael mael noteel'ae biq biq hhae; 33 Momil e zaeqzael mael laoq mqmae ae'lye gayi e cholyaeqhael'ae aeqyil biq biq e tyutaeq ngeelvae."
34 Tyulkaol, yoqhhaeteel Yesu'ae gee biq: "Hhaoqsongl o, nol xilnye zaeqzael mael duqlye ngaeteel'ae biq hhei laq lye geezaeq lil." 35 Yesu yoqhhaeteel'ae gee biq: "Ngael laoq aeqyil e zaeqzael ngeelvae, ngaeq e saeqvae lael e cholyaeq laoq aeqdilmyel maq myeq wae, ngaeq'ae xiangxinl e cholyaeq laoq qiqzael eiq maq suq wae. 36 Ngeelfeiq, ngael noteel'ae geegaeq laeqngeel, noteel ngaeq yaol mol hhei feiq maeq xiangxinl'ae. 37 Aeqdae lye ngaeq'ae biq hhei laq e cholyaeq haetaeq eiq ngaeq'ae saeqvae lael'ae; ngaeq'ae saeqvae lael e cholyaeq laoq, ngael yoqhhaeq'ae aeqdilmyel maeq lyeqsae biq yil. 38 Ngael mqmae ae'lye gaeyi mael laoq, ngaeq e yilsi lye zongl maoqlye maeqngeel yil, ngaeq yaol moqheilheil duyi laq e tyutaeq e zhiqyil mael laoqmyel zongl yil maoqlye kaollil. 39 Ngaeq yaol moqheilheil duyi laq e tyutaeq e zhiqyil laoq: Yoqhhaeq lye ngaeq'ae biq hhei laq e cholyaeqhael, ngael qiq hhaeq yaol eiq maeq bi gabu yil, kaol milcaeq e aeqnaol naolli qiq nao ngael yoqhhaeteel yaol bi dyeqhoqlal maoq. 40 Ngaedae e zhiqyil laoq Yaqyo yaol mol kaol xiangxinl e cholyaeqhael'ae haeqfu eiq zadeel e aeqyil mael bi mul maoqlye hhae, kaol milcaeq e aeqnaol naolli qiq nao ngael yoqhhaeteel yaol bi dyeqhoqlal maoq."
41 Yoqtail cholyaeq laoq Yesu "ngael laoq mqmae ae'lye biq gayi e zaeqzael lil" lye gee gol gae'lye yoqhhaeq'ae geezil geezae gil'ae. 42 Yoqhhaeteel gee: "Xitaeq laoq Yoqsel e yaqyo Yesu maeqngeel maeq? Yoqhhaeq e aeqdae aeqmae yaol aedeeteel aeqsul eiq loq maeqngeel maeq? Yaeqmeel yoqhhaeq haelmillyekaol 'ngael laoq mqmae ae'lye gaeyi lil' lye gee hhaemaeq?" 43 Yesu geehoq biq: "Noteel qiqhhaeq qiqhhaeq'ae geezil geezae myel haeq zongl gil. 44 Ngaeq yaol moqheilheil duyi laq e Aeqdae lye cholyaeq yaol ngaeq e saeqvae maeq sheeqlaeq kaollaoq, ngaeq e saeqvae qiq hhaeq eiq maeq keellael ongl'ae; ngaeq e saeqvae keellael e cholyaeq laoq, milcaeq e aeqnaol naolli qiq nao ngael yoqhhaeq yaol bi dyeqhoqlal maoq. 45 Xianzhi e suqhhaq taq'ae cu deelhhei: 'Momil haelzhol cholyaeq'ae geemyeq'ae.' Kaol Aeqdae e geemyeq mael gaeq hhei'laol xoqxiq e cholyaeqhael laoq, ngaeq e saeqvae lael'ae. 46 Xilnye gee mael laoq, aeqsul Aeqdae yaol mol gol vae lye gee maeqngeel yil; Momil tyuqvae lye lael e qiq hhaeq maoqlaol, Aeqdae yaol maeq mol gol'ae. 47 Ngael aeqdilmyel noteel'ae geegaeq laeqngeel, xiangxinl e cholyaeq laoq haeqfu eiq zadeel e aeqyil mael za'ae. 48 Ngael laoq aeqyil e zaeqzael lil, 49 Noteel e aeqpyuq aeqdae diqsheelleeldye vae maqnaq zaeq gol feiq oq sil hhei. 50 Xilmael laoq mqmae ae'lye gaeyi e zaeqzael'ae, cholyaeq zaeq hhei'laol maeq sil yilkiq wae. 51 Ngael laoq mqmae taq ae'lye loq gayi e aeqyil e zaeqzael lil, cholyaeqhael zaeqzael xilmael zaeq hhei kaollaoq, haeqfu keellye hha dyeqdeel'ae. Ngael biq maoqlye zaeqzael mael laoq ngaeq e saeqzil mael ngeelvae, milcaeq taq e cholyaeqhael e aeqyil gae'lye biq lil."
52 Tyulkaol, Yoqtail cholyaeqhael hhaellaelmyel geegae gil, gee: "Cholyaeq xitaeq haelmillyekaol yoqhhaeq e saeqzil mael aedeeteel'ae bi zaeq laeq laeq?" 53 Yesu yoqhhaeteel'ae gee biq: "Ngael aeqdilmyel noteel'ae geegaeq laeqngeel, noteel Cholyaeq Yaqyo e saeqzil mael maeq zaeq, Cholyaeq Yaqyo e siq mael maeq dol kaollaoq, aeqyil mael noteel onglci vae maqza'ae. 54 Ngaeq e saeqzil mael zaeq, ngaeq e siq mael dol hael laoq, haeqfu eiq zadeel e aeqyil mael za'ae, ngael milcaeq taq e aeqnaol naolli qiq nao, yoqhhaeq yaol bi dyeqhoqlal maoq; 55 Ngaeq e saeqzil mael laoq aeqdilmyel zaeq hhaeq'ae, ngaeq e siq mael laoq aeqdilmyel dol hhaeq'ae. 56 Kaol ngaeq e saeqzil mael zaeq, ngaeq e siq mael dol e cholyaeq laoq, ngaeq e onglci'ae zhol, ngael eiq yoqhhaeq e onglci'ae zhol. 57 Aeqyil biq e Aeqdae lye ngaeq yaol moqheilheil duyi laq, kaol ngael Aeqdae gae'lye dyeqdeel; kaol qiqsheel ngeelvae, ngaeq e saeqzil mael zaeq e cholyaeq eiq ngaeq gae'lye hha dyeqdeel'ae. 58 Xilmael laoq mqmae ae'lye loq gayi e zaeqzael ngeelvae, zaeq hael laoq haeqfu keellye dyeqdeel'ae, maqnaq laoqmyel maeq dul'ae, aeqpyuq aeqdaehael tyulmael zaeq gol feiq oq sil hhei." 59 Saeziq xihael laoq, Yesu Jabaiqnongq e huiltangq vae cholyaeqhael'ae geemyeq gil biq fu gee hhae.
Haeqfu eiq zadeel e aeqyil e saeziq
60 Yoqhhaeq e laqcaqhael onglci'ae, qiq miq laoq gaeq vae, gee: "Saeziq xilmael laoq maeq yael'ae, aeqsul naelhaeq dozaq hhei ongl laeq?" 61 Yesu e neemae onglci'ae laqcaqhael xilmael gae'lye geezil geezae gil hhae lye loq'ae, kaol yoqhhaeteel'ae gee biq: "Saeziq xilmael noteel e aeqkeel'ae pyetoq e haqlo peqyil laeq hhaemaeq? 62 Noteel Cholyaeq Yaqyo aeqyoq laefuq zhol myel vae da'li mol kaollaoq, haelmillye nyuq gil lilmaeq? 63 Cholyaeq yaol bi dyeqdeel mael laoq senllinq'ae, aeqhhaol maeqngeel'ae. Ngael noteel'ae haelgee biq e saeziq mael laoq yohael kaol aeqyil'ae. 64 Ngeelfeiq, noteel onglci'ae maeq xiangxinl e cholyaeq zhol'ae." Yesu laoq zhoqmyel fu ae'lye maeq xiangxinl hael laoq aeqsul, kaol yoqhhaeq yaol yotyel maqdumyel ongqzaeq maoqlye e qiq hhaeq aeqsul'ae lye loq'ae. 65 Yesu yol gee: "Tyulkaol, ngael noteel'ae gee gol biq, Aeqdae lye biq e maeqngeel kaollaoq, cholyaeq qiq hhaeq eiq ngaeq e saeqvae maeq keellael ongl'ae."
66 Tyuq ae'lye aeqnaol, yoqhhaeq e laqcaqhael onglci'ae deelsae hhei e cholyaeq zhee naeq wae, kaol yoqhhaeq nyegael maeq bael deel vae. 67 Tyulkaol, Yesu laqcaq qyelniq hhaeq'ae gee biq: "Noteel eiq deelsae goq yae maeq?" 68 Ximenq Biqdeq Yesu'ae geehoq biq: "Hhaoqsongl o, noq'ae haeqfu eiq zadeel e aeqyil e saeziq za'ae, ngaeteel aeqsul'ae cho'lyeq yil siq laeq? 69 Ngaeteel xiangxinl aeqwae, kaol nol laoq Momil e senljyeq qiqhhaeq'ae lye loq wae." 70 Yesu gee: "Ngaeq lye noteel qyelniq hhaeq yaol saelpodu hhei maeqngeel maeq? Ngeelfeiq, noteel onglci e qiq hhaeq laoq niqhaeq haeqmae'ae." 71 Yesu e saeziq xilmael laoq, Ja'lyul cholyaeq Ximenq e yaqyo Yoqdal'ae gee hhae, yoqhhaeq laoq laqcaq qyelniq hhaeq onglci e qiq hhaeq'ae, ngeelfeiq, Yesu yaol yotyel maqdumyel ongqzaeq biq maoqlye hhae.