Yesu e aeqnilhael yoqhhaeq'ae maeq xiangxinl biq'ae
7
Silqinq xihael aeqnaol, Yesu Ja'lillil milcaeq vae haeqvae lael'ee myel deel'ae, Yoqtail milcaeq'ae maq yil goq biq'ae, Yoqtail cholyaeq yoqhhaeq yaol xyeq goq biq kaol'ae. 2 Tyuqfu, Yoqtail cholyaeq e Haelcul'ae Zhol Zaeqnao keellael goqbiq vae, 3 Yesu e aeqnilhael yoqhhaeq'ae gee biq: "Nol saeqvae lye deelsae hheikaol Yoqtail milcaeq'ae da'li, xilnye laol, noq e laqcaqhael eiq nol haelzongl e silqinq mael hhae mol wae; 4 Ochoq'ae bi mol goq feiq, yotyel maqdumyel qiq hhaeq maeq zongl kaol'ae. Nol silqinq xihael zongl vae laol, milcaeq taq e cholyaeqhael'ae noq yaol bi loq." 5 Yoqhhaeq e aeqnilhael dyel'eiq yoqhhaeq'ae maeq xiangxinl biq hhae. 6 Kaol Yesu yoqhhaeteel'ae gee biq: "Ngaeq e shiqshen maeq keel'ae siq, ngeelfeiq, noteel e shiqshen laoq haeqfu eiq hhaeq'ae. 7 Milcaeq taq e cholyaeqhael noteel'ae neema maq su zaq lalkiq'ae, ngeelfeiq, ngaeq'ae laoq neema zhee su zaq hhae, ngaeq lye yoqhhaeteel e xinqweiq mael duqlaq hhae lye geedu hhei biq kaol'ae. 8 Noteel laefuq da'li kaol zaeqnao zaeq li gil, ngael yaeqmeel zaeqnao xilmael maq gol li siq, ngaeq e shiqshen maeq keel siq kaol'ae." 9 Yesu saeziq xihael gee aeqnaol, Ja'lillil vae zhol wae siq.Yesu Haelcul'ae Zhol Zaeqnao zaeq fu geemyeq gil biq
10 Ngeelfeiq, yoqhhaeq e aeqnilhael zaeqnao zaeq li e aeqnaol, yoqhhaeq eiq da'li vae, aeqsul eiq mol gae'lael aeqmyel yil maeqngeel'ae, yotyel maqdumyel da'li hhae. 11 Zaeqnao zaeq gil fu, Yoqtail cholyaeqhael Yesu'ae saelpo gil'ae, gee: "Cholyaeq tyutaeq haeqvae zhol hhaemaeq?" 12 Cholyaeqhael yoqhhaeq gae'lye gee bonggaebyel'ae, qiq miq laoq gee: "Yoqhhaeq laoq meeq e cholyaeq'ae." Qiq miq yol gee: "Maeqngeel'ae, yoqhhaeq laoq cholyaeqhael'ae zaqgiqgiq hhae." 13 Ngeelfeiq, yoqhhaeteel Yoqtail cholyaeq'ae gu biq, kaol aeqsul eiq bael gaeq gae'lael aeqmyel vae lye yoqhhaeq'ae qiq hhaeq eiq maeq gee'ae.
14 Zaeq'ongl longlci fu, Yesu sholhaol vae da'li, kaol cholyaeqhael'ae geemyeq gil biq. 15 Kaol Yoqtail cholyaeqhael gaqmaqzuq li gil biq, gee: "Cholyaeq xitaeq maq xoqxiq gol feiq, haelmillyekaol Momil e Suqhhaq taq'ae gee mael zhee loq biq hhaemaeq?" 16 Yesu gee: "Ngael geemyeq mael ngaeq e maeqngeel'ae, ngaeq yaol moqheilheil duyi laq e tyutaeq ae'lye lael hhae. 17 Cholyaeqhael Momil e zhiqyil mael laoqmyel zongl yil nae kaollaoq, geemyeq xilmael laoq Momil ae'lye lael, paelsilmyel ngael aeqyoyoq e yilsi lye gee hhae lye hhae loq'ae. 18 Aeqyoyoq e yilsi lye gee e tyutaeq laoq, aeqyoyoq e rongqyaol mael saelpozaeq hhae; ngeelfeiq, yoqhhaeq yaol moqheilheil duyi biq e tyutaeq e rongqyaol mael'ae saelpozaeq e tyutaeq laoq, zaqgiq maqgiq cholyaeq'ae, yoqhhaeq e onglci'ae duqlaq myel maqza'ae. 19 Moxi lye noteel'ae lilfaq mael geegaeq gaeyi laeq maeqngeel maeq? Noteel laoq lilfaq mael qiq hhaeq eiq maeq zongl yil. Noteel aeqcheekaol ngaeq yaol haelmillye hha xyeq congl maeq lye zongl gil lilmaeq?" 20 Cholyaeqhael geehoq biq: "Noq'ae niqhaeq guqzaeq li biq e she, aeqsul noq yaol xyeq maoqlye zongl kaollaeq?" 21 Yesu gee: "Ngael silqinq qiq mal zongl laol, noteel gilzuqmyel gaqmaqzuq gil biq'ae. 22 Moxi lye noteel'ae yeqgae gui'liq mael geegaeq gaeyi biq, (ngeelfeiq, yeqgae gui'liq mael Moxi lye heil gaeyi maeqngeel'ae, aeqpyuq aeqdae lye heil gaeyi hhae), tyulkaol, noteel anxiqriq vae cholyaeq'ae yeqgae gui'liq zongl biq. 23 Moxi e lilfaq mael zongl maoq gae'lye, cholyaeq anxiqriq'ae yeqgae gui'liq zongl kaollaoq, aelmaol, ngael anxiqriq'ae cholyaeq qiq hhaeq'ae bi meeqsholyil gae'lye noteel ngaeq'ae faqhoqkei laeq lilmaeq? 24 Cholyaeq e nildu'ae fu hhei'laol haelmillye cholyaeq'ae lye haeq gee, ochoq'ae haelmillye cholyaeq'ae lye gee biq mael saeqsaeldye'lye ngeel maoqhhae."
Xitaeq Jidu maeq
25 Tyuqfu, Ye'lulsa'lenq e cholyaeq qiq miq laoq gee: "Xitaeq laoq yoqhhaeteel xyeq maoqlye e cholyaeq maeqngeel maeq? 26 Nol fu, yoqhhaeq cholyaeqhael mol gae'lael aeqmyel saeziq gee wae siq, qiq hhaeq eiq yoqhhaeq'ae qiqgiq maeq gee gil biq, zhiqmoqhael eiq aeqdilmyel xitaeq laoq Jidu'ae lye kei biq oqlolyaeq? 27 Aedeeteel cholyaeq xitaeq haeqvae lye lael hhae lye loq'ae, ngeelfeiq, Jidu lael fu, yoqhhaeq laoq haeqvae lye lael hhae lye qiq hhaeq eiq maeq loq'ae." 28 Tyuqfu, Yesu sholhaol vae cholyaeqhael'ae geemyeq gil biq, yotyel ha'lye gee: "Noteel ngael laoq aeqsul'ae lye kaol haeqvae lye lael hhae lye, aeqdilmyel loq lilmaeq? Ngael aeqyoyoq e yilsi lye lael e maeqngeel yil, ngeelfeiq, ngaeq yaol moqheilheil duyi laq e tyutaeq laoq aeqdilmyel hhae, noteel yoqhhaeq yaol maeq loq'ae. 29 Ngeelfeiq, ngael yoqhhaeq yaol loq lil, ngael laoq yoqhhaeq e tyuqvae lye yi aeqlil, kaol ngaeq yaol moqheilheil duyi laq qiq hhaeq laoq yoqhhaeq kaol'ae." 30 Tyulkaol, yoqhhaeteel yoqhhaeq yaol deiqtyeq goq biq hhae, ngeelfeiq, qiq hhaeq eiq maeq deiqtyeq biq'ae siq, yoqhhaeq e naohaeq maeq keel siq kaol'ae. 31 Ngeelfeiq, cholyaeqhael onglci e haelnaeqmyel cholyaeq yoqhhaeq'ae xiangxinl vae. Yoqhhaeteel gee: "Jidu lael fu, yoqhhaeq haelzongl e shenqjiq mael, xitaeq haelzongl mael taq'ae hhael naeq kiq'ae siq maeq?"
Cholyaeq qiq miq laoq Yesu yaol deiqtyeq goq biq hhae
32 Faqlilsail cholyaeq laoq cholyaeqhael Yesu'ae gee bonggaebyel e gaeq hhei biq, jilsizhangqhael kaol Faqlilsail cholyaeqhael lye songlqyezaq e cholyaeqhael yaol, Yesu yaol deiqtyeq yil lye moqheilheil du hhei. 33 Tyulkaol, Yesu gee: "Ngael noteel nyegael baelzhol e naohaeq maeq naeq vae, ngael ngaeq yaol moqheilheil duyi laq e tyutaeq e tyuqvae hoqli maoq vae. 34 Kaol noteel ngaeq yaol saelpo maoqlye hhae, ngeelfeiq, maeq saelpopuq hhei ongl'ae; ngael yil maoqlye vae noteel maeq keelli ongl'ae." 35 Yoqtail cholyaeqhael hhaellaelmyel geegaeq gil: "Cholyaeq xitaeq haeqvae yil maoqlye oqlolyaeq, kaol aedeeteel yaol yoqhhaeq'ae maeq bi saelpopuq ongl laeq? Yoqhhaeq laoq Xi'lal vae zholsanq deelyil e Yoqtail cholyaeqhael tyuqvae yil, kaol Xi'lal cholyaeqhael'ae geemyeq yil biq maoqlye vae laoq? 36 Yoqhhaeq gee e 'Noteel ngaeq yaol saelpo maoqlye hhae, ngeelfeiq, maeq saelpopuq hhei ongl'ae; ngael yil maoqlye vae noteel maeq keelli ongl'ae' lye saeziq xilmael aeqchee yilsi maeq?"
Aeqyil e eelcuq
37 Zaeqnao e aeqnaol naolli qiq nao laoq zaeqnao fu cholyaeq hhael naeq qiq nao'ae, tyu qiq nao, Yesu haoqtul deelhhei kaol yotyel ha'lye gee: "Aeqsul suq kaollaoq, ngaeq'ae saeqvae dol lael! 38 Ngaeq'ae xiangxinl e cholyaeq laoq, Momil e Suqhhaq taq'ae gee laoqmyel, yoqhhaeq e oqma onglci ae'lye aeqyil e eelcuq mael lolbaeq laoqmyel yul duyi maoqlye hhae." 39 Yoqhhaeq gee e saeziq xilmael laoq, yoqhhaeq'ae xiangxinl e cholyaeqhael senllinq mael hhamul maoqlyekaol gee hhae, tyuqfu, senllinq maq biqga hhei wae siq, Yesu'ae rongqyaol maq hhamul hhei biq siq kaol'ae.
Cholyaeqhael Yesu gae'lye geegae tullaeq
40 Cholyaeqhael onglci e qiq miq gaeq hhei'laol xilnye gee: "Xitaeq aeqdilmyel xianzhi tyutaeq she!" 41 Qiq miq laoq yol gee: "Yoqhhaeq laoq Jidu'ae." Ngeelfeiq, qiq miq laoq yol gee: "Jidu haelmillyekaol Ja'lillil ae'lye du'lal kiq laeq? 42 Momil e Suqhhaq taq'ae Jidu laoq Dalweil e houldail'ae, kaol Dalweil dyeqlal e Boqlilhenq ae'lye du'lal hhae lye gee maeqngeel maeq?" 43 Tyulkaol, cholyaeqhael Yesu gae'lye geegae tullaeq vae. 44 Yoqhhaeteel onglci e cholyaeq qiq miq laoq Yesu yaol deiqtyeq goq biq hhae, ngeelfeiq, deiqtyeq maoqlye aqlaq qiq hhaeq eiq maeq tyuqdu hhei siq.
Yoqtail cholyaeq e yoheeqhael Yesu'ae maeq xinlzaeq'ae
45 Songlqyezaq e cholyaeqhael laoq jilsizhangqhael kaol Faqlilsail cholyaeqhael e tyuqvae hoq keellael. Kaol yoqhhaeteel songlqyezaq e cholyaeqhael'ae naelhaeq biq: "Noteel aeqcheekaol yoqhhaeq yaol maeq sheeqlaeq lilmaeq?" 46 Songlqyezaq e cholyaeqhael yoqhhaeteel'ae geehoq biq: "Yoqhhaeq laoqmyel saeziq gee e cholyaeq qiq hhaeq eiq maeq zhol'ae!" 47 Faqlilsail cholyaeq gee: "Noteel eiq yoqhhaeq lye giqhezaq laq wae maeq? 48 Zhiqmoq yoheeqhael kaol Faqlilsail cholyaeqhael onglci'ae yoqhhaeq'ae aeqsul xiangxinl kaollaeq? 49 Ngeelfeiq, lilfaq mael maeq loq e cholyaeq xi qiq miq'ae laoq doqchiq hhae bi gee hhei ngeelvae." 50 Yoqhhaeteel onglci'ae cholyaeq qiq hhaeq zhol'ae, xitaeq laoq, yilkaefu Yesu'ae mol lael e Niqgediqmuq ngeelvae, yoqhhaeq yoqhhaeteel'ae gee biq: 51 "Yoqhhaeq gee mael laefuq maeq naelhaeq fufu, kaol yoqhhaeq haelzongl e silqinq mael eiq maeq loq kaollaoq, aedeeteel e lilfaq mael haelmillyekaol yoqhhaeq'ae golsiq za'ae lye gee biq laeq?" 52 Yoqhhaeteel yoqhhaeq'ae geehoq biq: "Nol eiq Ja'lillil ae'lye du'lal lilmaeq? Nol yinqjiu yil laol Ja'lillil ae'lye xianzhi maq du'lal yo'ae lye hhae loq wae." 53 Tyulkaol, haetaeq eiq laoqhaol vae hoq byel yil vae.