Shiqtuq Xinqzhuanl
Laqcaqhael senllinq mael'ae doq deelhhei hhae
1
1-2 Tiq'afei'loq o,Ngael laefuq qiq pu cu hhei e suqhhaq onglci'ae gee mael laoq, Yesu zhoqmyel zongl hael kaol geemyeqhael ae'lye mael, yoqhhaeq senllinq ae'lye saelpodu hhei e shiqtuqhael'ae moqheilheil biq laol, aeqyoq yaol bi sheeq da'li e naohaeq'ae keellye peqlal e gilzuqmyel e silqinqhael'ae. 3 Yoqhhaeq sil e aeqnaol'ae, haelnaeqmyel e zenljul maellye shiqtuqhael'ae aeqyoq dyeqdeel lil lye zenlminq biq, yuqqyel nao onglci'ae shiqtuqhael'ae bi molli, kaol yoqhhaeteel'ae Momil e Goqja e silqinq mael geegaeq gil biq hhae. 4 Yesu yoqhhaeteel nyegael aelhoq qiqgael zaeq gil fu, yoqhhaeteel'ae Ye'lulsa'lenq vae lye haeq deelsae hhei lye moqheilheil gil biq hhae, gee: "Noteel laoq mqmae Aeqdae biq laqngeel lye gee mael'ae doq deelhhei gil maoqhhae, xilmael laoq noteel gaeq gol e ngael noteel'ae geegaeq gol biq mael ngeelvae, 5 Yoqhanl laoq eelcuq maellye cholyaeqhael'ae shelxiqzongl biq, ngeelfeiq, mee'nae nao lye laol noteel Momil e yohael maellye shelxiq maoqlye hhae."
Yesu mqmae'ae da'li vae
6 Shiqtuqhael zhol'eeq deelhhei fu, Yesu'ae naelhaeq biq: "Hhaoqsongl o, nol laoq yaeqmeel Yiqsellyel e goqja mael laefuq laoqmyel bi peqhoqlal maoqlye lilmaeq?" 7 Yesu yoqhhaeteel'ae gee biq: "Aeqdae aeqyoq e laqtaq maellye gee deelhhei e shiqshen, kaol naohaeq mael noteel maeq loq kael'ae. 8 Ngeelfeiq, senllinq mael noteel'ae loq dayi fu, noteel onglzaeq mael hhamul'ae, Ye'lulsa'lenq, Yoqtail kaol Saqmaqlilyal halza milcaeq, kaol mqdongq mqjyel vae keellye, ngaeq e bael mol e cholyaeq geiq maoqhhae." 9 Yesu saeziq xihael gee byel hhei'laol, yoqhhaeteel chifu deelhhei siq fu, mqdul qiq congq lye yoqhhaeq yaol sheeq da'li biq, kaol yoqhhaeq yaol maeq mol laelkiq vae. 10 Yoqhhaeq da'li fu, yoqhhaeteel deelhae'lye mqmae'ae chifu fu, qiqlaqmyel aelhongq pullye dum hhei e cholyaeq niq nulhhaeq, yoqhhaeteel e dongqpyeq vae haoqtul deelhhei, 11 Kaol gee: "Ja'lillil cholyaeqhael o, noteel aeqcheekaol haoqtul deelhhei myel mqmae'ae chifu gil lilmaeq? Noteel ae'lye deelsae e mqmae'ae sheeq da'li e Yesu xitaeq laoq, noteel laoq yoqhhaeq mqmae'ae haelmillye da'li hhae lye mol laol, yoqhhaeq eiq tyulnye hoqyi maoqlye hhae."
Maqtiqyal yaol saelpodu hheikaol shiqtuq bi geiq
12 Aeqnaol, yoqhhaeteel Zhoqcae Geeqzhoq ae'lye Ye'lulsa'lenq vae hoq keelyil gil vae. Geeqzhoq tyulmael laoq Ye'lulsa'lenq vae niqli aeqmyel hhae, anxiqriq fu qiq nao hhae deel e gaelmae dyul kaeq hhae.a 13 Yoqhhaeteel milmae heeqmyel'ae do'li, kaol laoqhaol qiq ssul e haoqtaq'ae da'li gil'ae, tyuqvae zhol gil hael laoq: "Biqdeq, Yoqhanl, Yaqgel, Andeqlyel, Fei'lil, Domaq, Bado'loqmaiq, Maqtail, Yallelfei e yaqyo Yaqgel, jijinldangq e Ximenq, kaol Yaqgel e yaqyo Yoqdal'ae. 14 Cholyaeq xihael kaol cholhae aeqmae mee'nae hhaeq, Yesu e aeqmae Maqlilyal kaol Yesu e aeqnilhael neemae qiq siq laoqmyel maqqyemyel heeldoq gee gil hhae. 15 Tyuqfu, cholyaeq qiqhael niqqyel (120) hhaeq zoqlal maoqmyel zhol'eeq deelhhei hhae. Biqdeq laoq aqsseq aeqnilhael onglci'ae haoqtul lael, kaol gee: 16 "Aqsseq aeqnilhael o, Momil e Suqhhaq taq'ae cu deelhhei e saeziq mael aeqdilmyel peqlal vae. Senllinq mael laoq Dalweil e myeqbongq ae'lye laefuqmyel gee gol e cholyaeqhael sheeq hheikaol Yesu'ae deiqtyeq lael e Yoqdal tyutaeq laoq, 17 Laefuq laoq aedeeteel onglci e qiq hhaeq'ae, kaol aedeeteel nyegael shiqtuq e zaeqhhael mael bael zaeq hhae. 18 Yoqdal maeqmeeqmyel zonglzaeq laeq e dyuqbaq maellye haeldye qiq koq vul hhei, oqbaq congq'lye jyegae yil, kaol oqma jyepa hheikaol vulhaeq yuldu beq yi. 19 Xilmael laoq Ye'lulsa'lenq vae zhol e cholyaeqhael gilzuqmyel loq vae, tyulkaol, tyuqvae milcaeq e saeziq maellye haeldye tyu qiq koq'ae Yalgeqdalmaq lye gul biq hhae, xilmael e yilsi laoq 'siq haeldye' lye hhae. 20 Shipian taq'ae xilnye cu deelhhei kaol'ae:
'Yoqhhaeq zhol e milcaeq vae
laoqhaol nulba bi peqyil hhei,
tyuqvae cholyaeq qiq hhaeq eiq
maeq zhol myel peqyil biq lye nyuqlil.' Yol gee:
'Yoqhhaeq e zaeqhhael mael ochoq lye zaeqchiq biq lye nyuqlil.'
21-22 Tyulkaol, Yoqhanl shelxiqzongl gil biq fu ae'lye mael, Hhaoqsongl aedeeteel ae'lye deelsae hheikaol bi sheeq da'li tyu qiq nao keellye, Hhaoqsongl Yesu aedeeteel nyegael qiqgael duyil do'lal e naohaeq'ae, aedeeteel nyegael duqlye baelzhol e cholyaeq tyuhael onglci ae'lye qiq hhaeq duyi maoqhhae, kaol ngaeteel nyegael Yesu dyeqhoqlal mael e bael mol e cholyaeq geiq maoqhhae." 23 Tyulkaol, yoqhhaeteel lye Yoqsel kaol Maqtiqyal yaol saelpodu hhei, Yoqsel'ae Basaba kaol Yoqshildu lye eiq gul biq hhae. 24 Kaol heeldoq gee: "Hhaoqsongl o! Nol laoq haelzhol cholyaeq e neemae onglci'ae nyuq mael loq'ae, kaol noq'ae xi niq nulhhaeq onglci ae'lye haetaeq laoq noq lye saelpodu hhei e qiq hhaeq'ae lye tyuqmyeq gil laeq, 25 Kaol yoqhhaeq'ae shiqtuq zaeqhhael kaol mulhhael mael bi mul lye geezaeq lil. Zaeqhhael xilmael laoq Yoqdal maq mul vae, kaol aeqyoyoq e milcaeq'ae yil vae kaol'ae." 26 Cholyaeqhael yoqhhaeteel gae'lye suqhhaq o gil'ae, kaol Maqtiqyal yaol opuq hhei biq'ae; kaol yoqhhaeq eiq shiqtuq qyel qiq hhaeq nyegael shiqtuq bal geiq vae.