Senllinq mael loq gayi
2
Vuqxunq Zaeqnaoa keellael vae, yoqhhaeteel gilzuqmyel qiqgael zhol'eeq deelhhei gil hhae. 2 Qiqlaqmyel mqmae ae'lye zaeqxil xilmae bo e yotyel laoqmyel gaeq gaeyi, kaol yoqhhaeteel zhol e laoqhaol qiq ssul myel gaeq bongbyel hhae. 3 Aeqzaeq miqhulm laoqmyel e myeqhael mol du'lal, kaol yoqhhaeteel'ae haetaeq vae eiq loq da'li biq'ae. 4 Yoqhhaeteel vae senllinq mael bong'lye za, kaol senllinq lye yoqhhaeteel'ae biq hhei biq e myeqbongqdyeq gae'lye, baeqjyelboq minqcuq e saeziq maellye saeziq bi geedu hhei.5 Tyuqfu, haeqvae lael'ee myel e goqja ae'lye lael e neemae qiqsiqmyel Momil'ae cho'lyeq e Yoqtail cholyaeqhael, Ye'lulsa'lenq vae zhol gil hhae. 6 Cholyaeqhael yotyel xilmael zhoq gaeq hhei biq laol deel'eeq laeq, kaol yoqhhaeteel e minqcuq saeziq mael, laqcaqhael lye geedu hhei gaeq hhei gil biq, kaol aeqchee peqlal hhae lye maeq loq gil biq'ae. 7 Kaol yoqhhaeteel gaqmaqzuq li biq kaol qiqguail gil biq, gee: "Nol naelhaeq, saeziq gee e cholyaeq xihael laoq Ja'lillil cholyaeq maeqngeel maeq? 8 Aedeeteel haelmillyekaol yoqhhaeteel laoq aedeeteel meelhee'lye fu ae'lye gee e saeziq mael gee e gaeqlael hhaemaeq? 9 Ngaeteel Paltiqyal cholyaeq, Maqdail cholyaeq, Yiqlanq cholyaeq, kaol Meiqsoqbuldaqmiqyal, Yoqtail, Japaldoja, Benqdu, Yalxilyal, 10 Fuqlyuqja, Panqfei'lilyal kaol Aijiq, kaol Guqlilnail vae niqli e Lilbiqyal boq e milcaeq vae zhol e cholyaeq, Loqmaq ae'lye lael e Yoqtail cholyaeq, Yoqtail jiaol'ae xiangxinl e baeqjyelboq minqcuq e cholyaeq, 11 Kelliqtel cholyaeq kaol A'laboq cholyaeq'ae, aedeeteel gilzuqmyel yoqhhaeteel laoq aedeeteel e saeziq maellye, Momil maeqdaeqhhaeq'ae lye gee mael gaeq vae." 12 Cholyaeqhael gaqmaqzuq biq kaol maeq nyuqtong ongl biq siq fu, qiqhhaeq qiqhhaeq'ae geegaeq gil: "Xilmael laoq aeqchee yilsi maeq?" 13 Qiq miq laoq eelfu biq, gee: "Yoqhhaeteel yaol zilbaeq zilsheq lye nyeqbu biq vae."
Biqdeq Vuqxunq Zaeqnao'ae Momil e saeziq mael geemyeq gil biq
14 Biqdeq kaol shiqtuq qyelqiq hhaeq haoqtul lael, kaol yoqhhaeq yotyel haeqheemyel cholyaeqhael'ae gee biq: "Yoqtail cholyaeq kaol Ye'lulsa'lenq vae haelzhol cholyaeqhael o! Noteel xilmael loq maoqhhae, kaol ngael gee e saeziq mael eiq haelmeeqlye naelhaeq maoqhhae. 15 Cholyaeq xihael laoq noteel nyuq laoqmyel dolbu e maeqngeel'ae, yaeqmeel laoq mqshoq e jiuqdianq wae siq. 16 Yo'eq xianzhi saeziq xilnye gee gol:
17 'Momil gee: Milcaeq taq e aeqnaol naolli e naohaeq'ae,
ngael laoq ngaeq e yohael mael,
ruqtiq za e cholyaeqhael'ae beiqxeiq hhei biq maoq,
noteel e yaeqmiq yaqyohael laoq peqlal maoqlye mael geedu hhei maoqlye hhae,
noteel e yaqyoyaeqhael laoq yilxiangl mol maoqlye hhae,
noteel e cholmoqhael laoq Momil matu bi tu li maoqlye mael tu li biq maoqlye hhae.
18 Tyuqfu naohaeq'ae,
ngael ngaeq e yohael mael ngaeq e yaqhacheqzaq e haqyoyaeqhael,
kaol yaqhacheqzaq e haeqmiyaeqhael'ae beiqxeiq hhei biq laol,
yoqhhaeteel peqlal maoqlye mael geedu hhei maoqlye hhae.
19 Ngael mqmae taq vae maeqdaeqhhaeq e silqinq bi mol du'lal maoq,
milcaeq taq'ae laoq shenqjiq bi du'lal maoq,
siq za, aeqzaeq doq za, kaol zhiqhaoq za;
20 Neelmae mael laoq mqkiq laoqmyel nahongqlye bi peqyil maoq,
baehae mael laoq siq laoqmyel nyelcullye bi peqyil maoq,
xihael laoq Hhaoqsongl rongqyaol kaol maeqdaeqhhaeq e naohaeq lael e laefuq'ae
gilzuqmyel peqlal maoqlye hhae.
21 Tyuqfu, aeqsul Hhaoqsongl e cholmil mael'ae geezaeq laol hha deqjiul wae.' 22 "Yiqsellyel cholyaeqhael o, saeziq xihael naelhaeq gil: Momil lye Naqsa'lel cholyaeq Yesu yaol noteel onglci'ae bi zongl du hhei e onglzaeq mael, maeqdaeqhhaeq e silqinq, kaol shenqjiq maellye, yoqhhaeq yaol Momil lye saelpodu hhei hhae lye noteel'ae zenlminq du hhei biq vae, xilmael laoq noteel loq hhae. 23 Yoqhhaeq yaol Momil aeqyoyoq e zhiqyil kaol laefuqmyel loq mael laoqmyel noteel'ae eemoq biq, kaol noteel lye lilfaq laoqmyel maeq zongl e cholyaeqhael e aqlaq ae'lye yoqhhaeq yaol shiqziljal mael'ae diqcheeq sil biq vae. 24 Ngeelfeiq, Momil lye sil e kyuq mael chega biq, kaol yoqhhaeq yaol bi dyeqhoqlal vae, yoqhhaeq yaol sil maellye maeq hhae bi zongltyeq kaol'ae.
25 Yoqhhaeq e silqinq mael Dalweil xilnye gee gol:
'Ngael laoq Hhaoqsongl haeqfu eiq ngaeq e yiqsiboq'ae zhol mol lil,
yoqhhaeq laoq ngaeq e laqsseqboq'ae zhol laol,
ngaeq'ae sseetae'lye bi ngeel laeq'ae.
26 Tyulkaol, ngaeq e neemae mael hhaol yae,
ngaeq e myeqbongqb mael hhaol gae'lael aeqmyel gul,
ngaeq e aeqhhaol mael eiq chifuzaeq onglci'ae zhol.
27 Nol ngaeq e yohael mael mil'oq vae maeq bi zadeelsaeq laeq'ae,
noq e senljyeq qiqhhaeq yaol eiq maeq bi buq yil hhei kaol'ae.
28 Noq lye aeqyil gaelmae mael ngaeq'ae bi loq laeq,
kaol ngaeq'ae noq e yiqsi ae'lye hhaol mael bong'lye bi za laq.'
29 "Aqsseq aeqnilhael o, aeqpyuq aeqdae Dalweil e silqinq mael aeqsul eiq bael gaeq myel noteel'ae geegaeq gil laeqngeel, yoqhhaeq sil hhei, kaol baqduqm biq vae, yoqhhaeq e fuq'ongl mael yaeqnao keellye aedeeteel saeqvae za wae siq. 30 Dalweil laoq xianzhi'ae, kaol yoqhhaeq laoq Momil yoqhhaeq'ae faqsilkei gol biq, kaol yoqhhaeq e houldailhael onglci ae'lye qiq hhaeq saelpodu hhei, kaol yoqhhaeq e zongmae duqtyel mael'ae bi zhol da'li'ae lye loq'ae. 31 Yoqhhaeq laefuqmyel xilmael eiq mol hhei vae, kaol Jidu e dyeqhoqlal mael'ae gee gol:
'Yoqhhaeq yaol mil'oq vae maeq bi zadeelsaeq'ae,
yoqhhaeq e aeqhhaol eiq maeq bi buq yil'ae.'
32 Yesu xitaeq yaol Momil lye bi dyeqhoqlal vae, kaol ngaeteel laoq gilzuqmyel xilmael bael mol e cholyaeq lil. 33 Tyulkaol, Momil lye yoqhhaeq yaol aeqyoyoq e laqsseqboq'ae deiqqei da biq vae, kaol yoqhhaeq laoq Aeqdae biq laqngeel lye gee gol e senllinq mael mul vae, kaol senllinq mael xeiq gae hhei vae. Xilmael laoq noteel haelgaeq haelmol mael ngeelvae. 34-35 Dalweil mqmae'ae maq da'li gol'ae, ngeelfeiq, yoqhhaeq gee:
'Yeheqhuaq ngaeq e Hhaoqsongl'ae gee biq:
Ngaeq lye noq e diqrenq yaol,
noq e aeqkeel baqda e toqmoq bi geiq fu keellye,
nol ngaeq e laqsseqboq'ae zhol deelhhei.'
36 Tyulkaol, Yiqsellyel qiqhaoq qiqjyel myel aeqdilmyel loq maoqhhae, noteel lye shiqziljal'ae diqcheeq biq e Yesu xitaeq laoq, Momil lye yoqhhaeq yaol Hhaoqsongl kaol Jidu bi geiq vae."
37 Yoqhhaeteel saeziq xihael gaeq hhei biq aeqnaol'ae, neemae mael'ae zhee gee do hhei gil biq, kaol Biqdeq kaol baeqjyelboq e shiqtuqhael'ae gee biq: "Aqsseq aeqnilhael, ngaeteel haelmillye zongl maoqhhae maeq?" 38 Biqdeq yoqhhaeteel'ae gee biq: "Noteel haetaeq eiq neemae paellael kaol Yesu Jidu e cholmil maellye shelxiq maoqhhae, xilnye laol, Momil lye noteel e golsiq mael shelmianq laeq vae, kaol noteel laoq Momil biq laq e senllinq mael hhamul wae. 39 Biq laqngeel lye gee xilmael laoq, noteel kaol noteel e houldailhael, kaol gaelmaolsae'lye haelzhol cholyaeqhael'ae biq hhei biq; cholyaeq xihael laoq, aedeeteel e Hhaoqsongl Momil lye gul laeq e cholyaeqhael ngeelvae." 40 Biqdeq saeziq haelnaeqmyel gee wae siq, zoqzenl kaol haelmeeqlye geemyeq gil biq, gee: "Noteel aeqyoyoq'ae jiulzaeq, kaol zhen'liq laoqmyel maeq zongl e shiqdail ae'lye deelsae maoqhhae!" 41 Tyulkaol, yoqhhaeq e saeziq mael naelhaeq do hhei e cholyaeqhael laoq gilzuqmyel shelxiq vae. Tyuqfu qiq nao, laqcaq suqca (3000) hhaeq zoqlal maoqmyel naeqlael vae. 42 Yoqhhaeteel laoq neemae qiqsiqmyel shiqtuqhael geemyeq mael zongl gil'ae, kaol hhaellaelmyel qiqgael zhol'eeq gil, aqba heiqpa kaol heeldoq gee gil hhae.
Yesu'ae xinlzaeq e cholyaeqhael qiqgael zhol'eeq gil
43 Shiqtuqhael lye haelnaeqmyel shenqjiq kaol maeqdaeqhhaeq e silqinq zongl du hhei, kaol cholyaeqhael gu li gil biq'ae. 44 Hael xiangxinl e cholyaeqhael laoq qiqgael zhol gil'ae, moqgoqhael eiq hhaellaelmyel mul gil hhae, 45 Kaol yoqhhaeteel aeqhael kaol halza haelzholhael ongqzaeq hhei, kaol aeqsul'ae haeldyul mulyo biq laol haeldyul byel biq hhae. 46 Yoqhhaeteel naochomyel neemae qiq siq laoqmyel sholhaol vae zhol'eeq deelhhei, qiq haoq qiq haoq lye aqba heiqpa, zaqgiq maqgiq kaol hhaol gae'lael aeqmyel e neemae za ga'lal aeqmyel aelhoq zaeq gil hhae, 47 Kaol Momil'ae laqma deiqqei biq, kaol cholyaeqhael eiq yoqhhaeteel'ae zhee gaeq biq'ae. Hhaoqsongl lye deqjiul e cholyaeqhael yoqhhaeteel'ae naochomyel hhael bi naeqlael'ae.