Loqmaq Su
Meeqlaeqmaeq lye naelhaeq mael kaol geeqlongq biq mael
1
Jidu Yesu e yaqhacheqzaq e cholyaeq Baoqloq yaol Momil lye gul du hheikaol shiqtuq bi geiq laq hhae, kaol Momil e fuqyin mael geegaeq yil lye moqheilheil du hhei laq hhae. 2 Fuqyin xilmael laoq yilkaefu Momil xianzhihael ae'lye, Momil e Suqhhaq taq'ae biq laqngeel lye gee gol mael ngeelvae. 3-4 Yoqhhaeq e Yaqyo ngaeq e Hhaoqsongl Yesu Jidu'ae gee keelli laol, ruqtiq'ae lye gee'li'laol, Dalweil e houldail ae'lye dyeqlal hhae; senljyeq e yohael'ae lye gee'li'laol, cholsil onglci ae'lye dyeqhoqlal gae'lye, zhee onglzaeq maellye yoqhhaeq laoq Momil e Yaqyo'ae lye bi mol du'lal vae. 5 Ngaeteel laoq yoqhhaeq ae'lye endianq hhamul hhei laq, kaol shiqtuq e mulhhael mael hhamul hhei laq mael laoq, Yesu e cholmil gae'lye baeqjyelboq minqcuq e cholyaeqhael yaol xinlyangq gae'lye Momil e saeziq mael bi naelhaeq maoqlye hhae, 6 Momil lye gul du hhei biq e Yesu Jidu hhae lye e cholyaeq xihael onglci'ae noteel eiq bal zoq hhae. 7 Ngael laoq noteel Loqmaq vae zhol, Momil gaeq biq e, gul du hheikaol senltuq geiq e cholyaeqhael'ae xinl cu biq lil. Enhuil mael, neesaelhhae mael, aedeeteel e Aeqdae Momil kaol Hhaoqsongl Yesu Jidu ae'lye noteel'ae yo'li biq lye nyuqlil!Baoqloq Loqmaq e jiaolhuil'ae fu yil biq maoqlye nyuqbiq hhae
8 Laefuq fuqli laoq, ngael Yesu Jidu'ae kaolzaeq, kaol noteel haelzhol cholyaeqhael gae'lye ngaeq e Momil'ae meeqyaevae lye gee biq, noteel e zhee meeq e xinlxin mael milcaeq taq'ae haeqvae eiq geegaeq keel byel yil vae kaol'ae. 9 Ngael yoqhhaeq e yaqyo e fuqyin taq'ae, neemae qiqsiqmyel fuqsil biq e Momil ngaeq'ae bal zoqzenl kael'ae, ngael haelmillye maqqyemyel noteel'ae gee keelli, 10 Kaol ngael heeldoq gee fu duqlye geezaeq lil, aeqgael ngael Momil e zhiqyil laoqmyel, qiq nao laoq shunlshunl lillil myel noteel tyuqvae hha yi maeqhe. 11 Ngael noteel'ae nae'naemyel mol goq laq hhae, Momil e yohael hhae lye e encil mael noteel'ae byel hhei laeqngeel, kaol noteel'ae xinlxin hhael bi za lal, 12 Xilnye eiq gee kael'ae, ngael noteel onglci'ae zhol, nol kaol ngael hhaellaelmyel e xinlxin gae'lye neehongq qiqgael hhae hulm'ae. 13 Aqsseq aeqnilhael, ngael noteel'ae maeq bi loq goq yae lye maeq zongl yil, ngael noteel tyuqvae yi maoqlye hae'nae pu zongl aeqwae, kaol baeqjyelboq minqcuq onglci'ae lye aelsiq hhae'lael laoqmyel, noteel onglci vae eiq aelsiq aelheel bi hhae'lael goq yae, ngeelfeiq, yaeqmeel keellye diqqye gae'lye maq hha yi laq wae siq. 14 Xi'lal cholyaeq haoq, suqhhaq maeq loq e cholyaeq haoq, geel e cholyaeq haoq, zhoq e cholyaeq haoq, ngael laoq yoqhhaeteel'ae fuqyin e jyelzu ca lil. 15 Tyulkaol, ngael laoq ngael hael zonglkeel ongl myel, fuqyin mael noteel Loqmaq vae zhol e cholyaeqhael vae eiq geegaeq hhei biq maoqlye nyuq lil.
Fuqyin mael laoq Momil e onglzaeq mael'ae
16 Ngael fuqyin gae'lye maduq maqza yae lye maeq zongl yil; fuqyin xilmael laoq, Momil e zhee onglzaeq mael'ae, hael xiangxinl e cholyaeqhael'ae jiul maoqlye hhae, laefuq laoq Yoqtail cholyaeq vae, aeqnaol laoq Xi'lal cholyaeq vae. 17 Momil e gongyil mael fuqyin xilmael taq'ae mol du'lal vae; gongyil xilmael laoq xinlxin ae'lye zhoq myel fu ae'lye za mael aeqnaol naolli'ae za keel ongl hhae, xilmael laoq Momil e Suqhhaq taq'ae gee laoqmyel: "Gongyil e cholyaeq laoq xinlxin gae'lye hha dyeqdeel'ae."
Cholyaeq e golsiq
18 Momil lye xinlyangq maeq meeq e maeq gongyil e cholyaeqhael'ae faqhoqkei biq mael mqmae ae'lye bi mol du'lal vae, yoqhhaeteel laoq maeq gongyil myel zongl, ochoq'ae zhen'liq maeq bi loq lye eiq zongl hhae. 19 Momil e silqinq mael, cholyaeq hael loq ongl mael, qiqshiq laoq, cholyaeq e neemae onglci'ae mol laelkiq hhae, Momil yoqhhaeteel'ae bi mol hhei vae kaol'ae. 20 Mqdongq milbeibei fu ae'lye mael, Momil e haeqfu keellye za e onglzaeq mael, kaol Momil laoq haelmillye qiq hhaeq'ae lye mael aeqdilmyel hhae loq'ae, ma'ne maellye maeq hhae mol congl feiq, hael zongldu hhei e halza haelzholhael ae'lye hhae loq hhae mol'ae, kaol cholyaeq laoq qiqgiq mael vae eiq maeq geecheeq dayil kiq wae. 21 Yoqhhaeteel Momil yaol loq feiq, yoqhhaeq'ae Momil'ae lye maq za biq'ae, kaol yoqhhaeq'ae maeq rongqyaol biq'ae, kaol yoqhhaeq'ae meeqyaevae lye eiq maeq gee biq'ae. Yoqhhaeteel e nyuq mael laoq qiqgiq yilsi maqza myel peqyil hhei, kaol yaeqzhoqzhoq e neemae mael nahongqlye peqyil hhei vae. 22 Yoqhhaeteel aeqyoyoq geel lil lye keizaeq mael laoq, daoldaolmyel yaeqzhoq peqyil vae, 23 Kaol maq buq yilkiq e Momil e rongqyaol mael buq yilkiq e cholyaeq, haeqzilhael, jyeqyaeqhael kaol congnihael e molkol zonglpeq hhei vae.
24 Tyulkaol, Momil yoqhhaeteel e neemae onglci'ae saqdol lal aeqmyel mulgoq tyulmael laoqmyel maeqshol e silqinq mael haelzongl maoq myel bi zongl gil, kaol yoqhhaeteel qiqhhaeq qiqhhaeq e aeqhhaol mael'ae maeq zunjinl myel zongl hhae. 25 Yoqhhaeteel lye Momil e zhen'liq mael zaqgiq'ae lye gee peq hhei, kaol zongldu hhei e moqgoqhael'ae heel yil fuqsil yil hhae, halzahael zongldu e Hhaoqsongl'ae laoq maeq heel'ae. Hhaoqsongl'ae laoq haeqfu keellye maeqdaeqhhaeq'ae lye gee biq maoqhhae. Amen!
26 Tyulkaol, Momil yoqhhaeteel'ae saqdol lal aeqmyel mulgoq tyulmael haelzongl maoq myel bi zongl. Yoqhhaeteel e haeqmiyaeq laoq haqyoyaeq nyegael ssuqza e beideelhhei laoqmyel maeq zongl'ae, daoldaolmyel haeqmiyaeq nyegael byuqmaoqzaeq hhae; 27 Haqyoyaeq eiq xilnye hhae, haeqmiyaeq nyegael ssuqza e beideelhhei laoqmyel maeq zongl, zhee mulgoq maellye neemae mael bi byuqbong hhei, haqyoyaeq kaol haqyoyaeq qiqhhaeq qiqhhaeq'ae gaeq yae lye zongl, kaol miqyil daoqcheeq e silqinq zongl, kaol aeqdilmyel aeqyoyoq e aeqhhaol taq'ae beideelhhei mael'ae xyelpupu e silqinq zongl e chenqfaq mael hhae shel hhae.
28 Yoqhhaeteel laoq baelyaelmyel Momil yaol maeq siqcongl yil lye zongl hhae, kaol Momil laoq yoqhhaeteel'ae ba yil e neemae bi za, kaol maq hoq e silqinq mael haelzongl maoq myel bi zongl hhae, 29 Kaol yoqhhaeteel onglci'ae maeq qiqsheel e maeq gongyil mael, duqlaq mael, neemaecuqm mael, duqlaq myel zongl e xihael bong'lye za; kaol heiqcilnael mael, cholyaeq xyeq mael, deiqgae mael, zaqgiqgiq mael, duqlaq myel nyuq mael neemae onglci'ae xihael bong'lye za; geekyuq hael, 30 Kaol ochoq'ae maeqmeeqmyel saeziq gee hael, Momil'ae neemasu biq hael, cholyaeq'ae zonglkyuq hael, guaeq'ei dilqeizaeq hael, aeqyoyoq'ae hodazaq hael, maeqngeel maeqngeel myel gee hael, aeqdae aeqmae e saeziq mael maeq naelhaeq hael, 31 Qiqgiq maeq loq biq hael, geemeeq deelhhei laoqmyel maeq zongl hael, renqxinl maeqtong hael, kaol cholyaeq'ae hhaoqsaeq maeq saeq kiq hael ngeelvae. 32 Yoqhhaeteel laoq Momil xilnye silqinq zongl e cholyaeqhael yaol zonglsil maoqlye gee deelhhei hhae lye loq'ae, ngeelfeiq, yoqhhaeteel aeqyoyoq zongl yil dyul maeqcil, ochoq xilnye bael zongl mael eiq hhaol biq hhae.