Ge'linqdo Qianqsu
Geeqlongq biq kaol meeqyaevae lye mael
1
Momil e zhiqyil maellye, Momil lye gul du hhei laq e Jidu Yesu e shiqtuq geiq e Baoqloq, kaol aqsseq aeqnil Soqtiqniq lye, 2 Ge'linqdo milcaeq e Momil e jiaolhuil e cholyaeqhael'ae xinl cu hhei biq. Yoqhhaeteel laoq Jidu Yesu onglci'ae senljyeq wae lye peqlal e, Momil lye gul du hhei biq e senltuq geiq, kaol haeqvae lael'ee myel zhol e ngaeq e Hhaoqsongl Yesu Jidu e cholmil mael'ae geezaeq e cholyaeqhael ngeelvae. Jidu laoq yoqhhaeteel e Hhongqsongl'ae, aedeeteel e Hhongqsongl eiq ngeel'ae. 3 Enhuil mael, neesaelhhae mael aedeeteel e Aeqdae Momil kaol Hhaoqsongl Yesu Jidu ae'lye noteel'ae biq hhei biq lye nyuqlil! 4 Ngael duqlye noteel gae'lye ngaeq e Momil'ae meeqyaeqvae lye gee biq lil, Momil laoq Jidu Yesu onglci'ae lye noteel'ae enhuil mael biq biq kaol'ae. 5 Noteel yoqhhaeq e onglci'ae aeqchee eiq zacongl, myeqbongqdyeq, kaol zhishiq eiq zhee za, 6 Kaol ngael Jidu gae'lye zoqzenl mael, noteel e neemae onglci'ae xinlxin hhael bi za lal laoqmyel hhae, 7 Tyulkaol, noteel'ae encil taq'ae maq lo myel qiqgiq maqza'ae, kaol aedeeteel e Hhaoqsongl Yesu Jidu nae'naemyel mol du'lal biq lye mael'ae doqdeelzaeq hhei. 8 Yoqhhaeq noteel'ae aeqnaol naolli fu keellye sseetae'lye bi ngeel laeq'ae, kaol noteel'ae aedeeteel e Hhaoqsongl Yesu Jidu e naohaeq vae qiqgiq geehhael maqza myel bi ngeel laeq'ae. 9 Momil laoq haelmillye gee laol haelmillye zongl hhae, yoqhhaeq noteel yaol gul du hhei biq, kaol yoqhhaeq e Yaqyo, aedeeteel e Hhaoqsongl Yesu Jidu nyegael qiqgael bi zhol'eeq laeq'ae.Jiaolhuil onglci'ae zonglgae gil mael
10 Aqsseq aeqnilhael, ngael laoq aedeeteel e Hhaoqsongl Yesu Jidu e cholmil ae'lye, noteel'ae saeziq gee mael qiqsheel ngeel maoqhhae lye haelmeeqlye gee gil laeqngeel. Noteel onglci'ae qiq miq qiq miq boq'ae maeqpol myel haeq zongl gil, qiqsheel neemae kaol qiqsheel nyuq maellye qiq miq kaol qiq miq meeqlaellye qiqgael zhol laol hhaeq vae. 11 Ngaeq e aqsseq aeqnilhael, Geqlaiq toq e cholyaeq ngaeq'ae noteel onglci'ae zonglgae gil mael geedu gol laq'ae. 12 Ngael gee e yilsi mael laoq, noteel aeqyoyoq xilnye gee: "Ngael Baoqloq boq lil"; "Ngael Yalbo'loq boq lil"; "Ngael Jifaq boq lil"; "Ngael Jidu boq lil." 13 Jidu laoq byelpa aeqmyel hhaemaeq? Baoqloq noteel gae'lye shiqziljal mael'ae diqcheeq maeqhael ngeel? Noteel laoq Baoqloq e cholmil maellye shelxiq maeqhael ngeel? 14 Ngael Momil'ae meeqyaevae lye gee biq lil, Ji'lilsibul kaol Gaiyoq'ae maoqlaol, ngael noteel onglci e qiq hhaeq vae eiq shelxiq maeq zongl gol biq yil, 15 Aeqgael qiqhhaeq laelhhaeq laoq, noteel ngaeq e cholmil maellye shelxiq lil lye gee maeqhe. 16 Ngael Sitiqfaqnal toq'ae shelxiqzongl gol biq aeqwae; baeqjyelboq e cholyaeq'ae shelxiqzongl gol biq wae lye maeq nyuqdeel yaevae. 17 Jidu ngaeq yaol moqheilheil duyil laq mael laoq, shelxiqzongl gae'lye maeqngeel'ae, fuqyin geegaeq yil lye kaol'ae; geel e saeziq maellye gee eiq maeqngeel yil, aeqgael Jidu e shiqziljal mael qiqgiq yilsi maqza myel peqyil hhei maeqhe.
Jidu laoq Momil e onglzaeq mael kaol geel mael'ae
18 Shiqziljal e yo'liq mael laoq, myeyil e cholyaeq tyuhael'ae lye gee'li'laol yaeqzhoqzhoq hhae, ngeelfeiq, aedeeteel deqjiul e cholyaeqhael'ae lye gee'li'laol Momil e onglzaeq mael kaol'ae. 19 Momil e Suqhhaq taq'ae cu deelhhei:
"Ngael laoq geel cholyaeq e geel mael zonglmye biq maoq,
kyul e cholyaeq e kyul mael beiqgae biq maoq."
20 Geel cholyaeq haeqvae zhol hhaemaeq? Momil e saeziq mael loq e laqkiqhael haeqvae zhol hhaemaeq? Shilgail taq'ae geetyeltoq henq e cholyaeq haeqvae zhol hhaemaeq? Momil lye shilgail taq e geel mael yaeqzhoq bi peqyil hhei maeqngeel maeq? 21 Shilgail taq e cholyaeqhael aeqyoyoq e geel maellye Momil'ae maeq siqcongl ongl'ae, Momil laoq cholyaeqhael yaeqzhoqzhoq hhae lye kei biq e saeziq ae'lye xiangxinl e cholyaeqhael'ae jiul nae'ae, xilmael laoq Momil e geel mael ngeelvae. 22 Yoqtail cholyaeqhael mulgoq biq mael laoq shenqjiq'ae, Xi'lal cholyaeqhael laoq geel mael saelpo gil hhae, 23 Ngeelfeiq, ngaeteel laoq shiqziljal mael'ae diqcheeq biq e Jidu yaol geegaeq, xilmael Yoqtail cholyaeqhael'ae lye gee'li'laol aeqkeel'ae pyetoq e haqlo'ae, baeqjyelboq minqcuq e cholyaeqhael'ae lye gee'li'laol yaeqzhoqzhoq hhae; 24 Ngeelfeiq, Momil lye gul du hhei e cholyaeq'ae lye gee'li'laol, Yoqtail cholyaeqhael haoq, Xi'lal cholyaeqhael haoq, Jidu laoq haeqfu eiq Momil e onglzaeq mael, kaol Momil e geel mael'ae. 25 Momil e yaeqzhoqzhoq mael laoq cholyaeq taq'ae hhael geel'ae; Momil e qiqgiq boq'ae maeqyo mael laoq cholyaeq taq'ae hhael onglzaeq kaol'ae.
26 Aqsseq aeqnilhael, noteel laoq Momil lye gul du hhei laq mael'ae nyuq fufu gil, cholyaeq'ae lye fu'li'laol, geel cholyaeq maeq naeq, onglzaeq e cholyaeq eiq maeq naeq, kaol maduq zhee za e cholyaeq eiq maeq naeq'ae. 27 Ngeelfeiq, Momil lye milcaeq taq'ae yaeqzhoqzhoq hael yaol saelpodu hhei mael laoq, geel cholyaeqhael'ae bi saqdol li maoqlye hhae; shilgail taq e qiqgiq boq'ae maeqyo hael yaol saelpodu hhei, kaol onglzaeq hael'ae bi saqdol li maoqlye hhae. 28 Momil lye shilgail taq'ae ochoq lye maeq fu'qiq'ongl e cholyaeq, cholyaeq lye hol biq e cholyaeq, qiqgiq maqza e cholyaeq tyuhael yaol saelpodu hhei mael laoq, aeqchee eiq zacongl e cholyaeq yaol zonglgae biq maoqlye hhae, 29 Kaol ruqtiq za e cholyaeqhael laoq, qiq hhaeq eiq Momil e yiqsi ae'lye aeqyoyoq'ae maq hha hodazaq'ae. 30 Ngeelfeiq, noteel Jidu Yesu onglci'ae hhae zhol mael laoq Momil ae'lye lael hhae. Yoqhhaeq lye Jidu yaol aedeeteel e geel, gongyil, senljyeq, kaol jiul'en mael bi peqlal. 31 Momil e Suqhhaq taq'ae cu deelhhei laoqmyel: "Hoda biq maoqlye laol, Hhaoqsongl'ae hoda biq maoqhhae."