Meeqlaeqmaeq lye naelhaeq mael
16
Ngael noteel vae aedeeteel e aelbae aeqnil Feibiq yaol gailsaol gil laeqngeel, yoqhhaeq laoq Jian'geqli jiaolhuil onglci e zhiqsil'ae. 2 Noteel Hhaoqsongl onglci vae lye yoqhhaeq'ae senltuqhael vae sheeqcaq biq zae e loqho maellye yoqhhaeq'ae tyulnye za biq lye geezaeq lil. Yoqhhaeq aeqchee silqinq mael taq vae noteel'ae mulyo biq laol, noteel yoqhhaeq'ae baelzongl biq; yoqhhaeq haeqfu eiq haelnaeqmyel cholyaeq'ae baelzongl biq hhae, ngaeq vae eiq baelzongl gol laq kaol'ae.3 Baiqji'la kaol Yalju'la vae meeqlaeqmaeq lye bael naelhaeq hhei biq. Yoqhhaeteel laoq Jidu Yesu onglci vae ngaeq nyegael mulhhael qiqgael bal mul e cholyaeq'ae, 4 Ngaeq e aeqyil gae'lye aeqyoyoq hhae sil e weiqxianq za feiq maq gu'ae; ngael oqlye yoqhhaeteel'ae meeqyaevae lye gee biq maeqngeel yil, baeqjyelboq minqcuq e jiaolhuilhael eiq yoqhhaeteel'ae meeqyaevae lye gee biq hhae. 5 Yoqhhaetoq'ae za e jiaolhuil e cholyaeqhael'ae meeqlaeqmaeq lye bael naelhaeq hhei biq. Ngael gaeq e Yiqbailniqtuq vae meeqlaeqmaeq lye bael naelhaeq hhei biq, yoqhhaeq laoq Yalxilyal vae Jidu boq'ae pollael e zhoq siq lael e aelsiq'ae. 6 Maqlilyal vae meeqlaeqmaeq lye bael naelhaeq hhei biq, yoqhhaeq noteel gae'lye duqhee'lye mulhhael mul hhae. 7 Ngaeq nyegael laoqgaiq qiqgael bael kei e paeqyaeq Ando'niqguq kaol Yoqniqyal vae meeqlaeqmaeq lye bael naelhaeq hhei biq, yoqhhaeteel shiqtuqhael onglci vae maduq zhee za hhae, ngaeq e laefuq'ae lye Jidu onglci vae zhol wae. 8 Hhaoqsongl onglci vae zhol e ngael gaeq e Anlboqlil vae meeqlaeqmaeq lye bael naelhaeq hhei biq. 9 Jidu onglci vae zhol e ngaeteel e mulhhael qiqgael bal mul e Eqba'nuq, kaol ngael gaeq e Shildalguq vae meeqlaeqmaeq lye bael naelhaeq hhei biq. 10 Jidu onglci vae bi shilfufu gol e Yalbiqlil vae meeqlaeqmaeq lye bael naelhaeq hhei biq. Yallildobul toq e cholyaeqhael vae meeqlaeqmaeq lye eiq bael naelhaeq hhei biq. 11 Ngaeq e paeqyaeq Xi'loqtian vae meeqlaeqmaeq lye bael naelhaeq hhei biq. Naqqiqsul toq'ae Hhaoqsongl onglci vae zhol e cholyaeqhael vae meeqlaeqmaeq lye bael naelhaeq hhei biq. 12 Hhaoqsongl gae'lye duqhee'lye mulhhael mul e Tuqfei'naq kaol Tuqfulsaq vae meeqlaeqmaeq lye bael naelhaeq hhei biq. Ngael gaeq e, Hhaoqsongl gae'lye duqhee'lye mulhhael mul e Biqxiq vae meeqlaeqmaeq lye bael naelhaeq hhei biq. 13 Hhaoqsongl onglci'ae lye saelpodu hhei biq e Luqfuq kaol yoqhhaeq e aeqmae vae meeqlaeqmaeq lye bael naelhaeq hhei biq, yoqhhaeq e aeqmae laoq ngaeq e aeqmae laoqmyel ngeelvae. 14 Yalxunlqiqtuq, Fuqlelgan, Heimiq, Ba'loqba, Heimaq, kaol yoqhhaeteel nyegael qiqgael baelzhol e aqsseq aeqnilhael vae meeqlaeqmaeq lye bael naelhaeq hhei biq. 15 Fei'loqloqguq kaol Yoqlilyal, Niqlilyal kaol yoqhhaeq e dulmae, kaol A'linqba kaol yoqhhaeteel nyegael qiqgael baelzhol e senltuqhael vae meeqlaeqmaeq lye bael naelhaeq hhei biq. 16 Noteel laoq senljyeq e myeqchilnuq maellye qiqhhaeq qiqhhaeq'ae meeqlaeqmaeq lye naelhaeq maoqhhae. Jidu e jiaolhuilhael noteel'ae meeqlaeqmaeq lye naelhaeq hhae!
17 Aqsseq aeqnilhael, noteel'ae bi zonglgae tullaeq, noteel'ae bi jyeqleeq, kaol noteel xoq dozaq hhei e geemyeq mael'ae xyelpu bi pu e cholyaeqhael vae, ngael laoq noteel'ae yoqhhaeteel'ae deeltaelzaeq maoqhhae lye haelmeeqlye gee laeqngeel. 18 Xilnye cholyaeq laoq aedeeteel e Hhaoqsongl Jidu vae maeq fuqsil'ae, aeqyoyoq e oqma mael'ae maoq maeq fuqsil'ae, chilzu'lye saeziq maellye laoqshiq e cholyaeq'ae cheeqmu biq vae. 19 Noteel saeziq naelhaeq'ae lye mael cholyaeqhael vae geegaeq hhei biq aeqwae, tyulkaol, ngael noteel gae'lye hhaol yae; ngeelfeiq, ngael noteel laoq meeq e silqinq mael taq'ae geel, duqlaq e silqinq mael taq'ae yaeqzhoqzhoq biq lye nyuqlil. 20 Neesaelhhae mael biq e Momil lye Saqdanl yaol noteel e aeqkeel holhhaqboq'ae nuqtyeq deel goq biq vae. Aedeeteel e Hhaoqsongl Yesu Jidu e endianq mael noteel nyegael qiqgael baelzhol biq lye nyuqlil!
21 Ngaeq nyegael mulhhael qiqgael bal mul e Tiqmoqtail, kaol ngaeq e paeqyaeq Lulqiuq, Ye'sun, kaol Soqxibadeq laoq, noteel'ae meeqlaeqmaeq lye naelhaeq hhae. 22 Ngael, Baoqloq'ae xinl bal cu biq e Deqdyu, Hhaoqsongl onglci'ae lye noteel'ae meeqlaeqmaeq lye naelhaeq lil. 23 Ngaeq'ae sheeqcaq laq, jiaolhuilhael e cholyaeqhael vae sheeqcaq e Gaiyoq, noteel'ae meeqlaeqmaeq lye naelhaeq hhae. Milmae heeqmyel vae dyuqbaq guanq hael e zhiqmoq Yiqladu kaol aqsseq aeqnil Koltuq noteel'ae meeqlaeqmaeq lye naelhaeq hhae.a
Momil'ae maeqdaeqhhaeq'ae lye gee biq
25 Momil laoq ngael hael geegaeq e fuqyin kaol Yesu Jidu yaol geegaeq laoqmyel, kaol aolmiq e qiqshil laoqmyel noteel'ae xinlxin hhael bi za lal ongl'ae. Aolmiq xilmael yilkaeaeqnao ae'lye zonglhhaq deelhhei hhae. 26 Aolmiq xilmael yaeqmeel mol du'lal vae, haeqfu eiq dyeqdeel e Momil e minllinl mael laoqmyel, xianzhihael e suqhhaqhael taq'ae cu deelhhei ae'lye cholyaeqhael'ae tyuqmyeq biq, kaol yoqhhaeteel'ae xiangxinl gae'lye saeziq bi naelhaeq. 27 Rongqyaol mael Yesu Jidu ae'lye, aeqchee mael taq'ae eiq zhee geel e qiqhhaeq hhaeqli Momil vae haeqfu keellye biq hhei biq lye nyuqlil. Amen!