Dongqpyeq e cholyaeq vae bi hhaol maoqhhae
15
Aedeeteel xinlxin meeq e cholyaeq laoq, xinlxin maeq meeq e cholyaeq e ruanqroq mael bael pi biq maoqhhae, aeqyoyoq e hhaol mael'ae haeq zui'qiuqzaeq. 2 Aedeeteel haetaeq eiq aeqdilmyel dongqpyeq e cholyaeq vae bi hhaol li, kaol yoqhhaeq'ae bi meeqyo'li, kaol aqha bi bo'lael maoqhhae. 3 Jidu eiq aeqyoyoq hhaol mael'ae maeq zui'qiuq zaeq'ae, Momil e Suqhhaq taq'ae cu deelhhei laoqmyel: "Noq'ae vuqzaeq e cholyaeqhael e vuqzaeq mael, gilzuqmyel ngaeq e aeqhhaol taq'ae loq dayi vae." 4 Yilkaefu Momil e Suqhhaq taq'ae cu deelhhei mael laoq, aedeeteel'ae geemyeq maoqlye cu deelhhei hhei hhae, kaol aedeeteel vae renqnail ae'lye, kaol Momil e Suqhhaq taq ae'lye lael e haeq nyuqsaeq lye gee ae'lye panlwangl bi za laq maoqlye hhae. 5 Renqnail kaol haeq nyuqsaeq lye gee mael biq e Momil noteel vae qiqsheel e neemae bi za, kaol Jidu Yesu haelzongl laoqmyel bi zongl mael laoq, 6 Noteel yaol qiqsheel e neemae, qiqsheel e yotyel maellye aedeeteel e Hhaoqsongl Yesu Jidu e Aeqdae Momil vae rongqyaol biq lye nyuqlil! Momil e fuqyin mael aeqsul'ae lye gee'li kaol'eiq qiqsheel'ae
7 Tyulkaol, Jidu noteel'ae neemae onglci ae'lye jyeqshel laeq laoqmyel, noteel eiq qiqhhaeq qiqhhaeq'ae neemae onglci ae'lye jyeqshel maoqhhae, kaol rongqyaol mael Momil'ae biq biq. 8 Ngael gee, Jidu laoq Momil e zhen'liq gae'lye yeqgae gui'liq zongl gol e cholyaeq e zhiqsil geiq mael laoq, aeqpyuq aeqdae vae biq laqngeel lye gee gol biq e saeziq mael zenlminq du hhei maoqlye hhae, 9 Kaol baeqjyelboq minqcuq e cholyaeqhael vae, yoqhhaeq e hhaoqsaeqsaeq gae'lye Momil'ae bi rongqyaol. Momil e Suqhhaq taq'ae gee laoqmyel:
"Tyulkaol, ngael baeqjyelboq minqcuq e cholyaeqhael
onglci vae noq'ae maeqdaeqhhaeq'ae lye gee maoq,
kaol noq e cholmil mael'ae changlgo changl maoq."
10 Yol gee:
"Baeqjyelboq minqcuq e cholyaeq o,
noteel laoq Hhaoqsongl e cholyaeqhael
nyegael qiqgael hhaol gil."
11 Yol gee:
"Haelzhol e baeqjyelboq minqcuq e cholyaeqhael o,
noteel laoq Hhaoqsongl vae laqma deiqqei biq maoqhhae!
Haelzhol e cholyaeqhael o,
noteel gilzuqmyel yoqhhaeq'ae
maeqdaeqhhaeq'ae lye gee biq maoqhhae!"
12 Yiqsailyal eiq gee gol:
"Yexi e houldail onglci ae'lye qiq hhaeq tullael,
kaol halza e minqcuq vae guanqliq maoqlye hhae;
baeqjyelboq minqcuq e cholyaeqhael yoqhhaeq'ae
vuqduq baqtul hheikaol chifuzaeq maoqlye hhae."
13 Panlwangl mael biq e Momil, noteel e xinlxin gae'lye maeq qiqsheel e hhaol mael, neesaelhhae mael noteel e neemae onglci vae bong'lye za biq, kaol noteel vae senllinq e onglzaeq ae'lye haelnaeqmyel panlwangl bi za lye nyuqlil!
Baoqloq fuqyin geegaeq
14 Ngaeq e aqsseq aeqnilhael, ngael aeqyoyoq eiq noteel aeqyoyoq'ae meeq mael bong'lye za, kaol maeq qiqsheel e duqgongqgongqlye zhishiq za, kaol qiqhhaeq qiqhhaeq'ae haelmeeqlye gee kiq'ae lye zhee xiangxinl lil. 15 Ngeelfeiq, ngael teel eiq maq gu zaq myel noteel'ae xinl cu biq mael laoq, qiqmal lalmal e silqinq taq'ae noteel'ae geetae laeqngeel lye lil, ngael laoq Momil ngaeq'ae biq hhei laq e endianq ae'lye, 16 Baeqjyelboq minqcuq e cholyaeqhael'ae Jidu Yesu e yaqhacheqzaq e cholyaeq geiq biq kaol Momil e fuqyin e jilsi geiq mael laoq, heelda hhei biq e baeqjyelboq minqcuq e cholyaeqhael yaol senllinq gae'lye senljyeq wae lye bi peqlal, kaol Momil'ae bi hhaol maoqlye lil. 17 Tyulkaol, Momil e yiqsi'ae fuqsil mael'ae gee'li'laol, ngael Jidu Yesu onglci vae laoq hha hodazaq mael za'ae. 18-19 Jidu ngaeq ae'lye zongl e silqinq mael maoqlaol, ngael qiqgiq eiq maeq gee peq yae, ngael sa'oqboq xihael maoq maeq gee yil: Yoqhhaeq ngaeq e saeziq kaol xinqweiq ae'lye, shenqjiq e onglzaeq mael, maeqdaeqhhaeq e silqinq e onglzaeq mael, kaol senllinq e onglzaeq ae'lye, baeqjyelboq minqcuq e cholyaeqhael'ae saeziq bi naelhaeq; ngael Yeqlulsa'lenq ae'lye Yiqlilliguq vae deelhhe keellaeq, kaol haeqvae lael'ee myel Jidu e fuqyin mael geegaeq lil. 20 Xilnye laol, ngael haelmillye zongl maoqlye nyuqmeeq aeqwae, Jidu e cholmil mael geegaeq gol e milcaeq vae fuqyin maeq geegaeq vae, aeqgael ochoq lye zongl deelhhei e congqciq paeqhhael holtaq vae cutul laoqmyel peqyil hhei maeqhe; 21 Momil e Suqhhaq taq'ae gee laoqmyel:
"Yoqhhaeq e xiaoxiq mael maeq geegaeq hhei gol biq e cholyaeqhael,
aeqdilmyel mol maoqlye hhae;
yoqhhaeq e xiaoxiq mael maeq gaeq gol e cholyaeqhael,
aeqdilmyel loq maoqlye hhae."
Baoqloq Loqmaq vae yil maoqlye nyuq biq hhae
22 Tyulkaol, ngaeq'ae hae'nae pu myel diqqye laq hhae, kaol noteel tyuqvae maeq hhae lael laeq'ae. 23 Ngeelfeiq, yaeqmeel laoq, saeqvae dongqpyeq dongqjyel vae geegaeq maoq e milcaeq maqza vae, xi mee'nae hoq vae, ngael noteel tyuqvae nae'naemyel zhee yi goq laq hhae, 24 Kaol Xibanyaq vae yil fu, do'lal kaol noteel'ae hhae mol lael laol, laefuq myel noteel nyegael qiqgael baelzhol, kaol neemae mael'ae aelheel hhae zholsael, aeqnaol laoq noteel yaol ngaeq'ae bi bael sheeqsae maoqlye panlwangl lil. 25 Ngeelfeiq, yaeqmeel ngael laoq Yeqlulsa'lenq vae yil, kaol senltuqhael'ae mulyo biq mael heil li biq maoq. 26 Maqqiqdunl cholyaeq kaol Yalgaiyal cholyaeq laoq, laqheiqqyel lye Yeqlulsa'lenq e senltuqhael onglci e saeqyaeqhael vae dyuqbaqjin hhei gil biq kaol'ae. 27 Xilmael laoq yoqhhaeteel heildu sheqhhaq hhae, qiqshiq laoq, jyelzu ca e suanl hhaeq hhae; baeqjyelboq minqcuq e cholyaeqhael laoq Yoqtail cholyaeq e yohael hhae lye e meeqyo'lael kiq mael hha bal mul hhei vae laol, ruqtiq'ae mulyo biq mael yoqhhaeteel'ae heil biq maoqhhae. 28 Ngael silqinq xilmael zonglbyel hhei, jin hhei e dyuqbaq mael yoqhhaeteel'ae gilzuqmyel heilmoq hhei biq laol, ngael noteel tyuqvae gol yi, kaol Xibanyaq vae yil maoq. 29 Ngael eiq loq lil, ngael noteel tyuqvae yi fu, ngael Jidu e duqgongqgongqlye e geeqlongq pi hhei aeqmyel yi maoq.
30 Aqsseq aeqnilhael, ngael aedeeteel e Hhaoqsongl Yesu Jidu ae'lye, senllinq e gaeq ae'lye, ngael noteel'ae haelmeeqlye gee laeqngeel: Noteel ngaeq nyegael hhaellaelmyel hael zonglkeel ongl myel ngaeq gae'lye Momil'ae heeldoq gee biq, 31 Kaol ngaeq yaol Yoqtail milcaeq vae zhol e saeziq maeq naelhaeq e cholyaeqhael zael lye hhae bi jiul duyi, kaol ngael Yeqlulsa'lenq vae heil yil e jin hhei e dyuqbaq mael senltuqhael'ae bi hhaol li, 32 Kaol ngaeq yaol Momil e zhiqyil mael laoqmyel zhee hhaol gae'lael aeqmyel noteel tyuqvae bi keellael, kaol noteel nyegael hhaeqnaeq qiqgael hhae naeq hhei biq lye bael geezaeq biq. 33 Neesaelhhae mael biq e Momil noteel haelzhol cholyaeqhael nyegael qiqgael baelzhol biq lye nyuqlil. Amen!