Aqsseq aeqnilhael'ae maeq hhae panlduanl'ae
14
Xinlxin taq'ae ruanqroq biq hael vae, noteel neemae onglci ae'lye jyeqshel biq maoqhhae, ochoq nyuq mael noteel nyuq mael laoqmyel maeq qiqsheel fu, haeq geegae gil. 2 Qiqhhaeq laelhhaeq laoq aeqchee eiq zaeq hhaeq'ae lye kei biq hhae; ngeelfeiq, ruanqroq biq hael laoq, oqbye oqnyul maoq maeq zaeq'ae. 3 Zaeq e cholyaeq laoq maeq zaeq e cholyaeq vae maeq fu'qiq'ongl yae lye maeq hhae zongl biq'ae; maeq zaeq e cholyaeq eiq zaeq e cholyaeq vae maeq hhae panlduanl biq'ae, Momil yoqhhaeq yaol neemae onglci ae'lye jyeqshel biq vae kaol'ae. 4 Nol aeqsul lil lye laeq, ochoq e yaqhacheqzaq e cholyaeq vae panlduanl biq laeq? Yoqhhaeq haoqtul deelhhei, paelsilmyel jye'leeq haoq, yoqhhaeq'ae aeqyoyoq e hhaoqsongl zhol'ae, yoqhhaeq eiq aeqdilmyel haoqtul deel ongl'ae, Hhaoqsongl yoqhhaeq'ae sseetae'lye bi haoqtul deel ongl kaol'ae. 5 Qiqhhaeq laelhhaeq laoq naohaeq xilmael naohaeq yulmael taq'ae hhael meeq'ae lye gee hhae; qiqhhaeq laelhhaeq laoq hae qiq nao eiq qiqsheel'ae lye kei biq hhae. Haetaeq eiq aeqyoyoq e nyuq mael taq'ae aeqdilmyel xiangxinl maoqhhae. 6 Naohaeq mael'ae fuyo biq e cholyaeq laoq, Hhaoqsongl gae'lye fuyo biq hhae. Zaeq hael laoq Hhaoqsongl gae'lye zaeq hhae, yoqhhaeq Momil'ae meeqyaevae lye gee biq kaol'ae; maeq zaeq hael laoq Hhaoqsongl gae'lye maeq zaeq hhae, yoqhhaeq eiq Momil'ae meeqyaevae lye gee biq kaol'ae.7 Aedeeteel qiq hhaeq eiq aeqyoyoq gae'lye dyeq maeqngeel'ae, qiq hhaeq eiq aeqyoyoq gae'lye sil maeqngeel'ae. 8 Aedeeteel dyeq kaollaoq, Hhaoqsongl gae'lye dyeq hhae; aedeeteel sil hhei kaollaoq, Hhaoqsongl gae'lye sil hhae. Tyulkaol, aedeeteel sil haoq, paelsilmyel dyeq haoq, haeqfu eiq Hhaoqsongl e cholyaeq'ae. 9 Xilmael gae'lye, Jidu sil hheikaol yol dyeqhoqlal mael laoq, cholsil kaol choldyeq e Hhaoqsongl geiq maoqlye hhae. 10 Ngeelfeiq nol laoq, nol aeqcheekaol aqsseq aeqnilhael'ae panlduanl biq lilmaeq? Nol aeqcheekaol aqsseq aeqnilhael'ae maeq fu'qiq'ongl yae lye zongl biq lilmaeq? Aedeeteel haetaeq eiq Momil e shenqpanltaiq e yiqsi vae hhae haoqtul deelhhei maoqlye kaol'ae. 11 Momil e Suqhhaq taq'ae xilnye cu deelhhei:
"Hhaoqsongl gee,
ngael ngaeq e haeqfu eiq zadeel e aeqyil mael'ae tyuq deelhhei kaol faqsilkei:
haelzhol cholyaeq e paqcheq mael eiq
ngaeq'ae tongqgae deelhhei laeq maoqlye hhae,
myeqbongq hae qiq siq eiq Momil'ae
maeqdaeqhhaeq'ae lye gee biq maoqlye hhae."
12 Xilnye fu hhei'laol, aedeeteel haetaeq eiq aeqyoyoq e silqinq mael, Momil e yiqsi vae aeqdilmyel gee'loq du hhei maoqhhae.
Aqsseq aeqnil yaol haeq bi jye'leeq hhei
13 Tyulkaol, aedeeteel qiqhhaeq qiqhhaeq'ae maeq hhae panlduanl'ae, daoldaolmyel, aqsseq aeqnil vae zachiq e moqgoq, kaol aeqkeel'ae pyetoq e haqlo maeq heildeel biq lye nyuqmeeq maoqhhae. 14 Ngael loq lil, kaol Hhaoqsongl Yesu onglci vae lye xiangxinl lil, aeqchee moqgoq mael eiq maeqshol myel maqza'ae, cholyaeq maeq shol'ae lye kei biq kaollaoq, yoqhhaeq'ae lye gee'li'laol maeqshol wae. 15 Nol zaeqzael gae'lye aqsseq aeqnilhael vae bi nyuqsaeq kaollaoq, neegaeqgaeq maellye silqinq zongl maeqngeel'ae. Jidu yoqhhaeq gae'lye sil vae, kaol nol laoq noq e zaeqzael gae'lye yoqhhaeq yaol zonglmye biq e silqinq haeq zongl. 16 Tyulkaol, noteel meeq hhae lye kei mael ochoq lye haeq bi geekyuq hhei. 17 Momil e Goqja laoq zaeq dol mael oqlye maeqngeel'ae, daoldaolmyel, senllinq onglci e gongyil, hoqpinq kaol hhaol mael lye hhae. 18 Aeqsul Jidu'ae xilnye fuqsil laol, Momil yoqhhaeq'ae hhaol biq hhae, kaol cholyaeqhael eiq yoqhhaeq'ae hoda biq hhae. 19 Tyulkaol, aedeeteel laoq hoqpinq mael kaol qiqhhaeq qiqhhaeq'ae aqha bi bo'lael e silqinq mael'ae zui'qiuq maoqhhae. 20 Zaeqzael gae'lye Momil e mulhhael mael maeq hhae zonglba hhei'ae. Gilzuqmyel shol hhae, ngeelfeiq, qiqhhaeq laelhhaeq lye zaeqzael gae'lye cholyaeq yaol bi jye'leeq hhei vae, xilmael laoq yoqhhaeq'ae lye gee'li'laol duqlaq hhae. 21 Saeqzil zaeq, zilbaeq dol, baeqjyelboq e aeqchee silqinq zongl haoq, aqsseq aeqnilhael yaol bi jye'leeq kiq kaollaoq, qiqzael eiq haeq zongl mael caiq meeq hhae. 22 Noq'ae xinlxin za laol, Momil e yiqsi vae zongl gaeyil maoqhhae. Cholyaeq aeqyoyoq zongl hhaeq'ae lye kei e silqinq mael taq'ae, aeqyoyoq'ae maeq gaezaeqhoq laol geeqlongq meeq wae. 23 Qiqhhaeq laelhhaeq huaiqyiq gae'lael aeqmyel zaeq kaollaoq, golsiq za'ae lye hhae bi gee wae, yoqhhaeq xinlxin za ga'lal aeqmyel zaeq maeqngeel kaol'ae. Xinlxin ae'lye du'lal maeqngeel mael laoq gilzuqmyel golsiq ngeelvae.