Laqtaq za hael e saeziq mael naelhaeq maoqhhae
13
Aeqsul eiq zenlfuq vae laqtaq za e cholyaeqhael e saeziq mael naelhaeq maoqhhae, laqtaq mael laoq Momil ae'lye lael kaol'ae. Laqtaq za e cholyaeqhael laoq Momil lye laqtaq bi za hhae. 2 Tyulkaol, laqtaq za e cholyaeqhael e saeziq mael maeq naelhaeq myel zongl hael laoq, Momil lye laqtaq bi za e cholyaeqhael'ae diqqye ngeelvae; diqqye e cholyaeqhael laoq aeqyoyoq shenqpanl mael saelpozaeq hhae. 3 Zhiqmoq geiq hael laoq meeq e zongl e cholyaeqhael'ae bi gu li maoqlye maeqngeel'ae, duqlaq myel zongl e cholyaeqhael'ae bi gu li maoqlye hhae. Nol laqtaq za e cholyaeqhael'ae maq gu goq yae lye laol, nol meeq e zongl maoqhhae, xilnye laol, yoqhhaeq noq'ae hoda laq wae; 4 Yoqhhaeq laoq Momil e hhaeq'ongq ongqzaeq e cholyaeq'ae, noq'ae meeqyo'lael kiq hhae. Nol duqlaq myel zongl kaollaoq, gu maoqhhae, yoqhhaeq niqboqmyel ta e maejyel pi mael laoq qiqgiq'ae lye maqza myel pi maeqngeel kaol'ae; yoqhhaeq laoq Momil e yaqhacheqzaq e cholyaeq'ae, Momil e faqhoqkei mael gae'lye, duqlaq myel zongl e cholyaeqhael'ae chenqfaq biq maoqlye hhae. 5 Tyulkaol, noteel laqtaq za hael e saeziq mael aeqdilmyel naelhaeq maoqhhae, Momil e faqhoqkei mael gae'lye dyul maeqcil, liangqxin gae'lye eiq xilnye ngeel maoqhhae. 6 Noteel shuilshangl mael eiq xilmael gae'lye hhae, yoqhhaeteel laoq Momil e yaqhacheqzaq e cholyaeq'ae, kaol silqinq xilmael oqlye guanq hhae. 7 Noteel laoq ochoq'ae hal ca hael heilhoq biq maoqhhae. Aeqsul vae zaelsiq heil biq maoqhhae lye laol, aeqsul vae zaelsiq heil hhei biq; aeqsul vae shuilshangl biq maoqhhae lye laol, aeqsul vae shuilshangl hhei biq; aeqsul vae gu maoqhhae lye laol, aeqsul vae gu biq maoqhhae; aeqsul vae zunjinl biq maoqhhae lye laol, aeqsul vae zunjinl biq maoqhhae.Cholyaeq'ae gaeq hael laoq lilfaq laoqmyel zongl vae
8 Noteel qiq hhaeq vae eiq qiqgiq eiq haeq kui'qianl gil, qiqhhaeq qiqhhaeq'ae gaeq laol hhaeq vae, cholyaeq'ae gaeq hael laoq lilfaq laoqmyel zongl vae kaol'ae. 9 Ochoq nyegael neemae maq hha ba'ae, cholyaeq maq hha xyeq'ae, lolbiq maeq hhae haoq'ae, neemae maeq hhae cuqm'ae, kaol baeqjyelboq e gailminl mael, gilzuqmyel "dongqpyeq'ae zhol e cholyaeq'ae gaeq biq mael aeqyoyoq'ae gaeqzaeqhoq laoqmyel ngeel maoqhhae" lye xi qiq doq vae zoq hhae. 10 Gaeq mael laoq cholyaeq yaol dongqpyeq e cholyaeq'ae duqlaq myel zongl biq lye maeqngeel'ae, cholyaeq yaol lilfaq laoqmyel zongl yil lye hhae.
Mqbaebae lael goqbiq vae
11 Zail laoq, noteel loq maoqhhae, yaeqmeel laoq yuqxul aeqmyel ae'lye nyuq lael maoq e shiqshen wae; jiul'en mael yaeqmeel laoq aedeeteel zhoq xiangxinl fu taq'ae aedeeteel'ae hhael niq vae kaol'ae. 12 Sul'ongl zhee ci wae, mqbaebae lael mael niqlael aeqwae. Tyulkaol, aedeeteel laoq nahongqlye vae zongl e silqinq mael beiqgae maoqhhae, mqnao vae daqzhangldiq moqgoqa mael baq hhei maoqhhae. 13 Aedeeteel aeqchee silqinq zongl feiq, yiqzenlmyel maeq zongl hhaeq'ae, mqnao vae gaelmae deel laoqmyel ngeel maoqhhae. Nyelhhae lo'lo kaol zilbaeq bu lye maeq zongl hhaeq'ae; haeqmiyaeq nyegael ssuqza goq yae lye zongl mael kaol yultaeq xitaeq vae eiq byuqmaoqzaeq mael maeq zongl hhaeq'ae; deiqgae kaol heiqcilnael mael maeq zongl hhaeq'ae. 14 Haeqfu eiq Hhaoqsongl Jidu yaol aelhongq laoqmyel dumda hhei maoqhhae, ruqtiq'ae oqlye haeq nyuqzaeq, kaol aeqyoyoq zhee mulgoq mael hael zongl maoq myel haeq zongl yil.