Jidu onglci'ae ssuqhaoq caqzaq mael
12
Tyulkaol, aqsseq aeqnilhael, ngael Momil e hhaoqsaeqsaeq ae'lye noteel'ae haelmeeqlye gee laeqngeel, noteel laoq aeqhhaol mael heelda hheikaol yodyeqdyeq e zaelheel bi geiq, xilmael laoq senljyeq hhae, Momil hhaol biq hhae, noteel xilnye fuqsil mael laoq aeqdilmyel hoq hhae. 2 Shilgail xilmael haelzongl laoqmyel haeq bael zongl, neemae onglci'ae nyuq mael yosheqsheq lal kaol paellael laol, noteel'ae aeqchee mael laoq Momil e neemae meeq mael, qiqgiq geehhael maqza mael, kaol hhaol biq e zhiqyil mael'ae lye loq laol hhaeq vae.3 Ngael laoq ngaeq'ae hal biq hhei laq e endianq maellye noteel hae qiq hhaeq vae eiq gee gil laeqngeel: Aeqyoyoq onglzaeq mael'ae jyeqli aeqmyel haeq nyuqzaeq, ngeelfeiq, Momil lye hae taeq'ae byel hhei biq e xinlxin e heeq nil laoqmyel, aeqyoyoq'ae fu zaezae kiq maoqhhae. 4 Aedeeteel e aeqhhaol qiq siq taq'ae zhitiq haelnaeqmyel cuq laoqmyel, zhitiq hae qiq mal eiq maeq qiqsheel myel e zoqyongl za hhae. 5 Xilnye laol, aedeeteel haelnaeqmyel cholyaeqhael, Jidu onglci'ae laoq aeqhhaol qiq siq laoqmyel, hhaellaelmyel qiqhhaeq qiqhhaeq e zhitiq geiq hhae. 6 Hal hhamul hhei e endianq laoqmyel, aedeeteel'ae hae taeq vae eiq maeq qiqsheel e encil za'ae: Peqlal maoqlye mael geedu kiq hael laoq, xinlxin e heeq nil laoqmyel peqlal maoqlye mael geedu maoqhhae; 7 Fuqsil hael laoq, neemae qiqsiqmyel fuqsil maoqhhae; geemyeq hael laoq, neemae qiqsiqmyel geemyeq maoqhhae; 8 Ochoq'ae haelmeeqlye gee biq hael laoq, neemae qiqsiqmyel haelmeeqlye gee biq maoqhhae; ochoq'ae heil biq hael laoq, heil sheqhhaq maoqhhae; guanqliq hael laoq, mulzaeqnaol maoqhhae; ochoq'ae hhaoqsaeqsaeq biq hael laoq, aeqdilmyel hhaol gae'lael aeqmyel zongl maoqhhae.
Jidutuq ssuqhaoq caqzaq mael laoq xilnye ngeel maoqhhae
9 Gaeq mael taq'ae haeq zonglgiqgiq; duqlaq mael taq'ae laoq xinqga maoqhhae; meeq mael taq'ae laoq niqli maoqhhae. 10 Aqsseq aeqnilhael'ae gaeq biq mael laoq, qiqhhaeq qiqhhaeq'ae gaeq maoqhhae; cholyaeq'ae zunjinl biq mael laoq, qiqhhaeq qiqhhaeq'ae zunjinl maoqhhae; 11 Mulzaeqnaol maoqhhae, qiqgiq maeq mulzaeqnaol myel haeq zongl. Yohael mael laqheiqqyel lye ngeel maoqhhae; kaol duqlye Hhaoqsongl'ae fuqsil maoqhhae. 12 Panlwangl onglci'ae hhaol maoqhhae; saeqlael onglci'ae renqnail maoqhhae; duqlye heeldoq gee maoqhhae. 13 Senltuqhael'ae mulyo biq fu, heil biq maoqhhae; baeqjyelboq e milcaeq ae'lye lael e daeqxi vae laqheiqqyel lye sheeqcaq biq maoqhhae. 14 Noteel'ae guaeq'ei diqqye laq e cholyaeqhael vae geeqlongq biq biq maoqhhae, geeqlongq biq biq maoqlaol, doqchiq maeq hhae gee biq'ae. 15 Hhaol biq e cholyaeq nyegael bael hhaol maoqhhae; nyul e cholyaeq nyegael bael nyul maoqhhae. 16 Hhaellaelmyel qiqsheel e neemae za maoqhhae, neemae onglci'ae haeq dilqeizaeq, daoldaolmyel ochoq maeq fu'qiq'ongl e cholyaeqhael nyegael yillael mul maoqhhae. Aeqyoyoq kyul lil lye haeq zongl. 17 Duqlaq maellye duqlaq myel haeq zonglhoq, cholyaeqhael meeq e silqinq'ae lye kei biq mael laoq nyuqtongq deelhhei kaol zongl yil. 18 Hhaeq lil lye kaollaoq, duqlye hael zonglkeel ongl myel cholyaeqhael nyegael zilzheqlye zhol maoqhhae. 19 Ngael gaeq e aqsseq aeqnilhael o, aeqyoyoq gaiqjiq zaq maoqlye haeq zongl, Hhaoqsongl e faqhoqkei mael'ae doq deelhhei laol hhaeq vae, Momil e Suqhhaq taq'ae xilnye gee kaol'ae: "Hhaoqsongl gee: 'Bal gaiqjiq mael laoq ngael lil, ngael aeqdilmyel chenqfaq biq maoqlye lil.'" 20 Xilnye maeqcil, "Noq e diqrenq'ae myeq biq kaollaoq, yoqhhaeq'ae bi zaeq hhei; eelcuq suq biq kaollaoq, yoqhhaeq'ae bi dol hhei. Nol xilnye zongl laol, aeqzaeq heqzi mael yoqhhaeq e vuqduq taq'ae baqgongq da hhei biq laoqmyel kaol'ae." 21 Duqlaq mael lye haeq bi yinqzaeq hhei, daoldaolmyel meeq mael lye duqlaq mael'ae yinqzaeq biq maoqhhae.