Yiqsellyel e zholdeel siq e cholyaeqhael
11
Aelmaol, ngael qiq doq naelhaeq maoq: Momil aeqyoyoq e cholyaeqhael yaol maq mul biq hhaemaeq? Aeqdilmyel maeqngeel'ae! Ngael eiq Yiqsellyel cholyaeq lil, Yalboqlahanl e houldail lil, Bianlyaqminq zhipail hhae lye e cholyaeq lil. 2 Momil laoq yoqhhaeq laefuqmyel loq e cholyaeqhael yaol maq mul biq vae lye maeq zongl'ae. Noteel laoq Momil e Suqhhaq taq'ae Yiqlilyal'ae gee keelli laol haelmillye gee hhae lye maeq loq gil laeq hhaemaeq? Yoqhhaeq Momil e yiqsi'ae Yiqsellyel cholyaeqhael'ae haelmillye konglgaol biq hhaemaeq? Gee: 3 "Hhaoqsongl o, yoqhhaeteel lye noq e xiangzhi yaol xyeq biq, kaol noq e jiltanq mael cheqba hhei, ngael qiq hhaeq maoq maeq zholdeelsaeq vae, yoqhhaeteel laoq ngaeq e aeqyil mael zonglsil maoqlye zongl wae siq." 4 Ngeelfeiq, Momil yoqhhaeq'ae haelmillye tyuqmyeq biq hhaemaeq? Yoqhhaeq gee: "Ngael aeqyoyoq gae'lye siqca (7000) hhaeq bi zholdeelsaeq lil, yoqhhaeteel laoq Ba'lil vae maeq tongqheel gol'ae." 5 Yaeqmeel eiq xilnye hhae, Momil endianq gae'lye zholdeel siq e cholyaeqhael yaol saelpodu hhei. 6 Endianq mael'ae kaolzaeq kaollaoq, xinqweiq mael'ae kaolzaeq maeqngeel wae, tyulnye maeqngeel kaollaoq, endianq mael laoq zail eiq endianq maeqngeel wae.7 Xilnye laol haelmillye gee laeq? Yiqsellyel cholyaeqhael yoqhhaeteel saelpozaeq mael maq hhamul hhei biq'ae. Ngeelfeiq, saelpodu hhei biq e cholyaeqhael laoq hhamul hhei biq vae, baeqjyelboq e cholyaeqhael laoq neehaha e cholyaeq peqyil vae. 8 Momil e Suqhhaq taq'ae cu deelhhei laoqmyel:
"Momil yoqhhaeteel'ae millil mee'lee myel e yohael biq hhei biq,
yoqhhaeteel ma'ne maeq mol congl,
naeqbol maeq gaeq congl mael
yaeqnao keellye eiq xilnye hhae."
9 Dalweil eiq gee gol:
"Yoqhhaeteel e baqwanq mael hhaekeiq peqyil biq,
paeqhongq kaol aeqkeel'ae pyetoq e haqlo peqyil biq,
yoqhhaeteel e chenqfaq peqyil biq.
10 Yoqhhaeteel e ma'ne mael yillil eeqleeq myel,
maeq mol congl myel peqyil biq lye nyuqlil;
nol yoqhhaeteel e dolcheq mael,
haeqfu keellye dol'oq bi oq yil hhei lye nyuqlil."
Baeqjyelboq minqcuq hha deqjiul'ae
11 Aelmaol, ngael zail qiq doq naelhaeq maoq siq: Yoqhhaeteel jye'leeq hhei mael laoq, yoqhhaeteel yaol maeq bi tullael ongl lye hhaemaeq? Aeqdilmyel maeqngeel'ae! Yoqhhaeteel zonglzhil aeqkaol, jiul'en mael daoldaolmyel baeqjyelboq minqcuq vae yo'li biq, kaol yoqhhaeteel'ae heiqcilnael e neemae bi za maoqlye hhae. 12 Yoqhhaeteel lye zonglzhil mael, shilgail e cholyaeqhael e zacongl mael peqlal, yoqhhaeteel e maq mulloq biq mael, baeqjyelboq minqcuq e cholyaeq e zacongl mael peqlal kaollaoq, yoqhhaeteel gilzuqmyel hha deqjiul mael laoq nyeq'ei maeq gee kael vae maeqngeel maeq?
13 Ngael noteel baeqjyelboq minqcuq e cholyaeqhael'ae gee biq mael laoq, ngael laoq baeqjyelboq minqcuq e cholyaeqhael e shiqtuq lil, ngael laoq ngaeq e mulhhael mael'ae zunjinl lil, 14 Kaol ngaeq e qiqbeeqleel cholyaeqhael vae heiqcil bi nael li maoq, xilnye laol, yoqhhaeteel onglci e cholyaeq qiq miq yaol jiul maoqlye xiwangl lil. 15 Yoqhhaeteel yaol Momil lye beiqgae biq mael laoq, shilgail mael Momil nyegael bi maoqhoqli maoqlye kaollaoq, yoqhhaeteel yaol Momil lye neemae onglci ae'lye jyeqshel biq mael laoq, cholsil onglci ae'lye dyeqhoqlal laoqmyel maeqngeel maeq? 16 Hael heelda hhei meqziq aeqxul yosheq mael senljyeq kaollaoq, meqziq hhaeqxul qiq lye myel senljyeq wae; aelbol dongqcil mael senljyeq kaollaoq, allaq mael eiq senljyeq wae.
17 Nol laoq byelcongq e zhoqcae aelbol'ae, ngeelfeiq, kae hhei e zhoqcae aelbol e allaq mee'nae laq mael heiqqye ga biq, kaol noq e allaq mael yaqjyeq da hhei biq, kaol zhoqcae aelcil mael ae'lye hhae bael meeq da zaq kaollaoq, 18 Nol allaq tyuhael'ae maq hha hodazaq biq'ae; hodazaq kaollaoq, nol aelcil mael'ae meeq gae biq maeqngeel'ae, aelcil mael noq'ae meeq da laq hhae lye loq maoqhhae. 19 Nol xilnye gee kiq'ae: "Allaq tyuhael heiqqye ga hhei mael laoq, ngaeq yaol yaqjyeq da hhei maoqlye hhae." 20 Maq ba'ae. Yoqhhaeteel maeq xiangxinl gae'lye kaol bi heiqqye ga hhae; nol xiangxinl gae'lye haoqtul deel ongl hhae. Nol maeq dilqeizaeq hhaeq'ae, daoldaolmyel gu'ni'lye ngeel maoqhhae. 21 Momil laefuq e allaq mael dyel'eiq maq sheqhhaq yae lye maeq zongl biq'ae, noq'ae maq sheqhhaq yae lye nyeq'ei maeqhael zongl laeq? 22 Xilnye fu hhei'laol, Momil laoq zhee meeq kiq, aeqlyeq eiq maeq lyeq'ae: Jye'leeq e cholyaeq tyuhael vae laoq aeqlyeq maeq lyeq biq'ae; nol haeqfu eiq yoqhhaeq e zhee meeq laeq onglci vae zhol laol, yoqhhaeq laoq noq'ae zhee meeq laeq'ae, maeq zhol kaollaoq, noq yaol eiq bi dega hhei ngeelvae. 23 Yoqhhaeteel duqlye maeq xiangxinl yil lye maeq zongl laol, bi yaqjyeq da hoq hhei maoqlye wae siq, Momil laoq yoqhhaeteel yaol yaqjyeq da hoq hhei ongl kaol'ae. 24 Nol laoq qiqnaofu ae'lye byelcongq'ae dyeq e zhoqcae aelbol'ae, noq e allaq mael dega biq kaol zilranq mael'ae xyelpupu aeqmyel, kae hhei e zhoqcae aelbol taq'ae dyel'eiq bi yaqjyeq da hhei kaollaoq, kae hhei e zhoqcaeq allaq xihael laoq yoqhhaeteel aeqyoyoq e aelbol taq'ae nyeq'ei hhael bi yaqjyeq da hhei maoqlye maeqngeel maeq?
Yiqsellyel cholyaeq laoq gilzuqmyel hha deqjiul'ae
25 Aqsseq aeqnilhael, ngael noteel'ae aolmiq xilmael maeq bi loq goq yae lye maeq zongl yil, aeqgael noteel aeqyoyoq geel lil lye zongl maeqhe. Aolmiq xilmael laoq Yiqsellyel cholyaeqhael onglci'ae qiq miq laoq neehaha hhae, aeqgael baeqjyelboq minqcuq e cholyaeqhael deqjiul e sulmuq mael lo vae laol, 26 Yiqsellyel toq qiq haoq myel hha deqjiul maoqlye hhae. Momil e Suqhhaq taq'ae gee laoqmyel:
"Aeqdilmyel Xi'an ae'lye jiulzuq qiq hhaeq du'lal maoqlye hhae,
kaol Yaqgel toq e xinlyangq maeq meeq hael yaol zonglmye maoqlye hhae."
27 "Xilmael laoq ngael yoqhhaeteel nyegael
geemeeq deelhhei mael ngeelvae,
tyuqfu, ngael yoqhhaeteel e golsiq mael zonglgae biq maoq."
28 Fuqyin mael'ae gee'li'laol, yoqhhaeteel laoq noteel gae'lye Momil e diqrenq geiq hhae; saelpodu hhei mael'ae gee'li'laol, yoqhhaeteel laoq aeqpyuq aeqdae gae'lye gaeq mael hhamul hhei biq e cholyaeq'ae. 29 Momil aedeeteel yaol gul du hhei laq, kaol encil biq laq laol, xilnye haeq zongl maoq ngeelzhol'ae yae lye maeq kei biq'ae. 30 Yilkaefu noteel laoq Momil e saeziq mael maeq naelhaeq'ae, yaeqmeel yoqhhaeteel saeziq maeq naelhaeq gae'lye, noteel vae laoq daoldaolmyel hhaoqsaeq hhae bi saeq hhei. 31 Qiqsheel ngeelvae, yaeqmeel yoqhhaeteel eiq saeziq maeq naelhaeq mael laoq, Momil noteel'ae biq hhei biq e hhaoqsaeqsaeq mael gae'lye, yaeqmeel yoqhhaeteel vae eiq hhaoqsaeq bi saeq hhei vae. 32 Momil lye cholyaeqhael yaol saeziq maeq naelhaeq onglci vae ongtyeq deel biq mael laoq, cholyaeqhael'ae hhaoqsaeqsaeq biq maoqlye hhae.
33 O! Momil e duqgongqgongqlye mael,
geel mael kaol zhishiq mael maeqdaeqhhaeq'ae!
Yoqhhaeq e panlduanl mael laoq teel eiq maeq hhae loq congl'ae,
yoqhhaeq e paeqhhael mael laoq guaeq'ei saelpo saeq hhae!
34 Aeqsul Hhaoqsongl e neemae'ae nyuq mael loq laeq?
Aeqsul yoqhhaeq e zuqyil bal du biq e cholyaeq geiq gol kaollaeq?
35 Aeqsul lye yoqhhaeq'ae laefuq heil hhei biq,
kaol aeqnaol yoqhhaeq'ae bi heilhoq laeq?
36 Halza haelzholhael laoq Momil ae'lye lael,
Momil gae'lye za kaol Momil hhae lye wae.
Rongqyaol mael haeqfu keellye yoqhhaeq'ae biq biq lye nyuqlil. Amen!