Ge'linqdo Houlsu
Meeqlaeqmaeq lye naelhaeq
1
Momil e zhiqyil maellye Jidu Yesu e shiqtuq geiq e Baoqloq kaol aqsseq aeqnil Tiqmoqtail laoq, Ge'linqdo e Momil e jiaolhuil'ae kaol Yalgaiyal gilzuqmyel milcaeq vae haelzhol e senltuqhael'ae xinl cu biq. 2 Enhuil mael, kaol neesaelhhae mael aedeeteel e Aeqdae Momil, kaol Hhaoqsongl Yesu Jidu ae'lye noteel'ae yo'li biq lye nyuqlil.3 Aedeeteel e Hhaoqsongl Yesu Jidu e Aeqdae Momil vae laqma deiqqei biq maoqhhae; yoqhhaeq laoq hhaoqsaeqsaeq kiq e Aeqdae'ae, kaol cholyaeq'ae haeq nyuqsaeq lye gee biq e Momil'ae. 4 Ngaeteel'ae haelmillye saeqlael puqlael laeq fu eiq, yoqhhaeq ngaeteel'ae haeq nyuqsaeq lye gee laeq'ae, kaol ngaeteel Momil biq laq e haeq nyuqsaeq lye gee maellye, maeq qiqsheel e saeqlael puqli biq e cholyaeq'ae haeq nyuqsaeq lye hhae gee biq wae. 5 Ngaeteel Jidu nyegael haeldyul dyulmae shelkuq laoqmyel, ngaeteel vae eiq Jidu ae'lye haeq nyuqsaeq lye zhee hhae bi gee'ae. 6 Ngaeteel saeqlael pi mael laoq, noteel'ae haeq nyuqsaeq lye gee mael kaol deqjiul mael bi mul maoqlye hhae; ngaeteel'ae haeq nyuqsaeq lye gee laeq mael laoq, noteel'ae haeq nyuqsaeq lye hhae bi gee maoqlye hhae. Haeq nyuqsaeq lye gee xilmael laoq, noteel'ae ngaeteel laoqmyel qiqsheel e shelkuq mael bi zityeq ongl maoqlye hhae. 7 Ngaeteel noteel gae'lye panlwangl deelzaeq hhei mael laoq aeqdilmyel hhae, ngaeteel loq lil, noteel ngaeteel nyegael qiqgael shelkuq, kaol ngaeteel nyegael haeq nyuqsaeq lye gee mael eiq qiqgael hhamul kaol'ae.
8 Aqsseq aeqnilhael o, ngaeteel noteel'ae bi loq goq yae, yilkaefu, Yalxilyal vae lye ngaeteel'ae kuqnanl puqlael laeq, maeq zityeq ongl myel chengdyeqlye aeq'yel yo'lael gae'lye, aeqyil hha dyeq gayil siq maeqhe lye dyel'eiq maeq chifuzaeq yil vae. 9 Ngaeteel aeqyoyoq e neemae onglci vae laoq aeqdilmyel hhae sil wae lye maoq maeq nyuq yil vae, xilmael laoq, ngaeteel aeqyoyoq'ae maeq kaolzaeq yil, cholsil yaol bi dyeqhoqlal e Momil'ae oqlye kaolzaeq lil. 10 Yoqhhaeq lye ngaeteel yaol gu lal aeqmyel sil onglci ae'lye jiul du gol laq, yoqhhaeq ngaeteel'ae jiul laeq maoqlye wae siq, kaol ngaeteel yoqhhaeq'ae aeqgael ngaeteel'ae jiul laeq siq lye chifu deelzaeq hhei lil. 11 Noteel eiq hhaellaelmyel heeldoq gee maellye ngaeteel'ae baelzongl laeq maoqhhae, kaol haelnaeqmyel cholyaeq ngaeteel gae'lye Momil'ae meeqyaevae lye bi gee, yoqhhaeteel haelnaeqmyel heeldoq gee gae'lye, ngaeteel'ae encil hhamul hhei laeq vae.
Baoqloq Ge'linqdo jiaolhuil'ae fu yil biq maoqlye mael dan'goq biq vae
12 Ngaeteel hodazaq mael xilnye hhae: Ngaeteel milcaeq taq'ae cholyaeq mul kiq mael laoq, Momil ae'lye lael e senljyeq kaol zaqgiq maqgiq maellye hhae, cholyaeq e geel maellye maeqngeel'ae, Momil e enhuil maellye hhae, noteel'ae za biq mael nyeq'ei xilnye ngeelvae, xilmael laoq ngaeteel e liangqxin mael zoqzenl kael'ae. 13 Yaeqmeel ngaeteel noteel'ae cu biq e saeziq mael laoq, noteel duq ongl, loq ongl'ae, ngael eiq noteel aeqdilmyel loqlilshe'lye loq li biq lye panlwangl deelzaeq hhei lil. 14 Noteel ngaeteel'ae aelheel siqcongl vae, kaol aedeeteel e Hhaoqsongl Yesu e naohaeq'ae, ngaeteel noteel'ae hoda biq laoqmyel, noteel eiq ngaeteel'ae hoda laq'ae.
15 Ngael xilmael xiangxinl laol, haeqfu'ae'lye laefuqmyel noteel tyuqvae yi maoqlye nyuq wae, kaol noteel'ae hhael bi meeqyo'li. 16 Ngael noteel tyuqvae lye deel gol duyil kaol Maqqiqdunl vae yil maoq, kaol Maqqiqdunl ae'lye noteel tyuqvae yol hoq keellael, kaol noteel'ae ngael Yoqtail vae yil fu qiq qye bi bael sheeq duyi maoqlye lil. 17 Ngael xilnye nyuqmeeq mael laoq, puyil pu'lal myel maeqhael ngeel? Ngael aeqyoyoq zhee mulgoq e nyuq maellye, qiqlaq laoq ngeel'ae qiqlaq laoq maeqngeel'ae lye gee maeqhael ngeel? 18 Momil haelmillye gee laol haelmillye zongl laol, ngaeteel noteel'ae Momil e saeziq geegaeq biq mael laoq, qiqlaq laoq ngeel'ae, qiqlaq laoq maeqngeel'ae lye maeq gee yil. 19 Ngael, Xi'la kaol Tiqmoqtail noteel onglci'ae geegaeq e Momil e Yaqyo Yesu Jidu laoq, "qiqlaq laoq ngeel'ae, qiqlaq laoq maeqngeel'ae" lye maqza'ae; yoqhhaeq'ae laoq "ngeel'ae" lye maoq maqza'ae. 20 Momil e biq laqngeel lye gee gol mael haeldyul za haoq, Jidu onglci vae gilzuqmyel "ngeel'ae" lye peqlal vae. Tyulkaol, aedeeteel yoqhhaeq ae'lye "Amen" lye hhae gee, xilnye laol, Momil laoq aedeeteel gae'lye rongqyaol za wae. 21 Jidu onglci'ae lye ngaeteel kaol noteel'ae sseetae'lye bi ngeel laeq e, kaol aedeeteel yaol saelpodu hhei laq e tyutaeq laoq Momil ngeelvae. 22 Yoqhhaeq aedeeteel e aeqhhaol taq'ae gailzangkei da hhei laq vae, kaol senllinq mael aedeeteel e neemae onglci'ae bi zhol laeq kaol zenljul geiq.
23 Ngael ngaeq e aeqyil maellye Momil'ae bal zoqzenl laeq lye geezaeq lil, ngael Ge'linqdo vae maq yil vae mael laoq noteel'ae maeq bi kyuq lye kaollil. 24 Ngaeteel noteel e xinlxin mael zongltyeq maoqlye maeqngeel yil, noteel nyegael mulhhael qiqgael mul e cholyaeq geiq maoqlye lil, kaol noteel'ae bi hhaol, noteel xinlyangq taq'ae haelmeeqlye haoqtul deel ongl vae kaol'ae.