Ja'latail Su
Meeqlaeqmaeq lye naelhaeq mael
1
1-2 Ngael shiqtuq geiq e Baoqloq kaol gilzuqmyel ngaeq nyegael qiqgael baelzhol e aqsseq aeqnilhael, Ja'latail e jiaolhuilhael'ae xinl cu biq. Ngael shiqtuq geiq mael laoq cholyaeq ae'lye lael maeqngeel'ae, cholyaeq ae'lye eiq maeqngeel'ae, Yesu Jidu kaol yoqhhaeq yaol cholsil onglci ae'lye bi dyeqhoqlal e Aeqdae Momil ae'lye hhae. 3 Enhuil kaol neesaelhhae mael, aedeeteel e Aeqdae Momil kaol Hhaoqsongl Yesu Jidu ae'lye noteel'ae yo'li biq lye nyuqlil! 4 Jidu laoq aedeeteel e Aeqdae Momil e zhiqyil laoqmyel, aedeeteel e golsiq gae'lye aeqyoyoq yaol beiqgae hhei, kaol aedeeteel yaol yaeqmeel e duqlaq e shilgail xilmael ae'lye jiul du'laq maoqlye hhae. 5 Rongqyaol mael Momil'ae aeqgael haeqfu keellye biq biq lye nyuqlil. Amen!Baeqjyelboq e fuqyin maqza vae
6 Ngaeq'ae gaqmaq zhee zuq lal yae, noteel laoq xilnye qiqlaqlye, Jidu e endianq ae'lye noteel yaol gul du hhei biq e Momil ae'lye deelsae hhei, kaol baeqjyelboq e fuqyin mael'ae cho'lyeq yil vae; 7 Qiqshiq laoq, baeqjyelboq e fuqyin qiq mal eiq maqza vae, ngeelfeiq, cholyaeq qiq miq noteel'ae zonglbeeq lael, kaol Jidu e fuqyin mael zonglpael maoqlye hhae. 8 Ngeelfeiq, ngaeteel haoq, paelsilmyel mqmae ae'lye lael e mqmae yosongl haoq, noteel'ae fuqyin geegaeq laeq mael, ngaeteel lye noteel'ae geegaeq hhei biq laoqmyel maeq qiqsheel kaollaoq, yoqhhaeq laoq doqchiq hhae pi hhae! 9 Ngaeteel gee wae, yaeqmeel ngael zail gee maoq siq, cholyaeq noteel'ae fuqyin geegaeq laeq mael, noteel'ae laefuq hhae'lael gol biq laoqmyel maeq qiqsheel kaollaoq, yoqhhaeq laoq doqchiq hhae pi hhae!
10 Ngael yaeqmeel cholyaeq'ae neezae bi lael, paelsilmyel Momil'ae neezae bi lael laeq? Ngael cholyaeq e neemae mael'ae bi hhaol li maoqlye zongl maeqhael ngeel? Ngael cholyaeq'ae bi hhaol li maoqlye zongl siq kaollaoq, ngael laoq Jidu e yaqhacheqzaq e cholyaeq maeqngeel wae.
Baoqloq shiqtuq haelmillye geiq lal hhae lye mael
11 Aqsseq aeqnilhael, ngael noteel'ae bi loq maoq, ngael geegaeq e fuqyin mael laoq cholyaeq e yilsi laoqmyel maeqngeel yil; 12 Ngaeq'ae cholyaeq ae'lye hhae'lael laeq maeqngeel'ae, cholyaeq lye ngaeq'ae geemyeq hhei laeq eiq maeqngeel'ae, Yesu Jidu e qiqshil ae'lye lael kaol'ae.
13 Noteel laoq ngael yilkaefu Yoqtail jiaol onglci'ae haelmillye cholyaeq mul kiq, kaol ngael haelmillye hael zonglkeel ongl myel Momil e jiaolhuil'ae guaeq'ei diqqye biq kaol hail biq hhae lye gaeq gol vae. 14 Yoqtail jiaol onglci'ae, ngael laoq ngaeteel e goqja vae ngaeq nyegael cholhoq hhaelli hhaellael hee'lye e cholyaeq haelzonglhael taq'ae hhael jyeqli aeqwae, ngaeq e aeqpyuq aeqdae e beideelhhei mael gae'lye nyeq'ei laqheiq hhael qyel lil. 15 Ngeelfeiq, ngaeq yaol aeqmae oqma onglci ae'lye zonglqyel du hhei laq, neemae maeqpaelmyel gaeq laeq maellye ngaeq yaol gul du hhei laq e Momil tyutaeq laoq, 16 Yoqhhaeq e Yaqyo yaol ngaeq'ae qiqshil hhei laeq mael laoq, ngaeq yaol baeqjyelboq minqcuq e cholyaeqhael'ae yoqhhaeq yaol bi geegaeq yil laeq hhae, kaol ngael qiq hhaeq nyegael eiq maeq geedazaq yo yil, 17 Ye'lulsa'lenq vae maq da'li yil kaol ngaeq e laefuq ae'lye shiqtuq geiq hael vae eiq maeq mol li yil, A'laboq vae maoq maq yil yil, aeqnaol laoq Dalmaqshilgeq vae hoq keellael aeqwae.
18 Sul hoq gol hhei'laol, ngael Ye'lulsa'lenq vae da'li kaol Jifaq vae caiq mol li oqyilsiq, kaol yoqhhaeq nyegael qyelngaeq nao baelzhol aeqwae. 19 Ngael Hhaoqsongl e aeqnil Yaqgel yaol maoqlaol, baeqjyelboq e shiqtuqhael yaol laoq qiq hhaeq yaol eiq maeq mol yo yil. 20 Ngael yaeqmeel noteel'ae cu biq hael laoq, Momil e yiqsi ae'lye gee lil, zaqgiq maqgiq yil. 21 Aeqnaol, ngael Xullilyal kaol Ji'lilja e milcaeq vae keellael; 22 Tyuqfu, Yoqtail milcaeq vae za e Jidu e jiaolhuilhael onglci e cholyaeqhael laoq ngaeq yaol maeq mol gol wae siq. 23 Ngeelfeiq, yoqhhaeteel'ae xilnye gaeq hhei biq: "Yilkaefu aedeeteel'ae guaeq'ei diqqye laq e qiq hhaeq, yaeqmeel laoq yoqhhaeq hail biq e xinlyangq mael geegaeq hhae". 24 Yoqhhaeteel ngaeq gae'lye rongqyaol mael Momil'ae biq biq hhae.