Baeqjyelboq e shiqtuqhael Baoqloq'ae jyeqshel biq
2
Qyel'yuq hoq gol hhei'laol, ngael Ba'naqba nyegael Ye'lulsa'lenq vae yol da'li, Tiqdo yaol eiq qiqgael bael sheeq da'li gil aeqlil. 2 Ngael Momil ae'lye lael e qiqshil gae'lye da'li aeqlil; ngael baeqjyelboq minqcuqhael onglci'ae fuqyin geegaeq gil biq mael, aqsseq aeqnilhael'ae gee'loq hhei gil biq wae, ngael laoq ochoq maeq bael gaeq myel vae lye, aeqsul eiq loq e cholyaeqhael'ae geegaeq hhei biq lil, aeqgael ngaeq'ae yaeqmeel haoq, paelsilmyel laefuq haoq alngeiqmyel hha ki hhei laqngeel yae. 3 Ngeelfeiq, ngaeq nyegael qiqgael bal yil e Tiqdo laoq, Xi'lal cholyaeq feiq, yoqhhaeq'ae yeqgae gui'liq maeq zongl maeq hhaeq'ae lye eiq maeq zongl biq yil; 4 Haoq ki do'laq e jaq e aqsseq aeqnilhael, yotyel maqdumyel ngaeteel Jidu Yesu onglci'ae za e zilyoq mael'ae haoqchifu lael, kaol ngaeteel yaol hhaeq'ongq ongqzaeq e cholyaeq bi geiq maoqlye zongl hhae, 5 Ngeelfeiq, fuqyin e zhen'liq mael noteel onglci'ae bi zadeel maoqlyekaol, ngaeteel yoqhhaeteel'ae neemae teel eiq maeq kuan biq yil, saeziq eiq maeq naelhaeq biq yil. 6 Aeqsul eiq loq e cholyaeqhael laoq, yoqhhaeteel haelmillye cholyaeq haoq, ngaeq nyegael qiqgiq guanxil maqza'ae; Momil laoq cholyaeq e nildu ae'lye maeq fu'ae. Aeqsul eiq loq e cholyaeqhael laoq ngaeq'ae ongljyeqmyel qiqgiq maeq zonglnaeq da hhei laq'ae. 7 Daoldaolmyel, yoqhhaeteel laoq Hhaoqsongl ngaeq'ae yeqgae gui'liq maeq zongl gol e cholyaeq'ae, fuqyin geegaeq hhei biq lye toqshiq gol laq mael mol hhei biq, xilmael laoq, Hhaoqsongl Biqdeq'ae yeqgae gui'liq zongl gol e cholyaeq'ae fuqyin geegaeq hhei biq lye toqshiq gol biq laoqmyel qiqsheel ngeelvae; 8 Biqdeq'ae ganqdongl biq, kaol yoqhhaeq yaol yeqgae gui'liq zongl gol e cholyaeqhael e shiqtuq bi geiq e tyutaeq, ngaeq vae eiq ganqdongl laeq, kaol ngaeq yaol baeqjyelboq minqcuq e shiqtuq bi geiq laq hhae. 9 Jiaolhuil e sseeldongq'ae lye gee gil biq e Yaqgel, Jifaq, Yoqhanl laoq, Momil ngaeq'ae endianq biq hhei biq vae lye loq hhei biq laol, ngael kaol Ba'naqba nyegael mulhhael qiqgael mul maoqlye laqsseq mael lye oqshouqkei gil laeq hhae, ngaeteel yaol baeqjyelboq minqcuq tyuqvae bi yil laqngeel lye gee, yoqhhaeteel laoq yeqgae gui'liq zongl gol e cholyaeqhael e tyuqvae yil. 10 Yoqhhaeteel ngaeteel'ae saeqyaeqhael'ae zhaofu biq maoq mael nyuqdeel maoqhhae lye gee gil laeq dyul wae, xilmael laoq ngael haeqfu eiq laqheiqqyel lye zongl lil.Baoqloq Biqdeq'ae gaezaeq biq
11 Aeqnaol, Jifaq Antiq'a vae keelli, yoqhhaeq'ae laoq gaezaeq biq maoq e za'ae, tyulkaol, ngael yoqhhaeq e yiqsi ae'lye yoqhhaeq zongl mael maq hoq'ae lye gee biq lil. 12 Yaqgel e tyuqvae lye lael e cholyaeqhael maeq keellael laefuq'ae, yoqhhaeq baeqjyelboq minqcuq e cholyaeqhael nyegael aelhoq qiqgael zaeq hhae, yoqhhaeteel keellael laol, yoqhhaeq laoq yeqgae gui'liq zongl maoqhhae lye gee e cholyaeqhael'ae gu biq gae'lye deeltael hhei vae, kaol baeqjyelboq minqcuq e cholyaeqhael nyegael deel'oq vae. 13 Baeqjyelboq e Yoqtail cholyaeqhael eiq yoqhhaeq nyegael zonglgiqgiq hhae, Ba'naqba dyel'eiq bael zonglgiqgiq hhae. 14 Ngeelfeiq, ngael yoqhhaeteel zongl mael maq hoq she, fuqyin e zhen'liq mael nyedullye maeq qiqsheel she lye zhoq mol hhei'laol, cholyaeqhael e yiqsi ae'lye Jifaq'ae gee biq: "Nol laoq Yoqtail cholyaeq'ae, ngeelfeiq, baeqjyelboq minqcuq e cholyaeq laoqmyel zongl, Yoqtail cholyaeq laoqmyel maeq zonglzhol'ae, haelmillyekaol baeqjyelboq minqcuq e cholyaeqhael'ae Yoqtail cholyaeq laoqmyel maeq zonglzhol maeq hhaeq'ae lye gee biq laeq?"
Yoqtail cholyaeq eiq xiangxinl gae'lye hha deqjiul vae
15 Ngaeteel dyeqlal fu ae'lye Yoqtail cholyaeq lil, baeqjyelboq minqcuq e golsiq za e cholyaeq maeqngeel yil; 16 Ngeelfeiq, aedeeteel loq'ae, cholyaeq vae gongyil e cholyaeq'ae lye bi gul mael laoq, lilfaq mael laoqmyel zongl yil gae'lye maeqngeel'ae, Yesu Jidu'ae xinlzaeq gae'lye hhae, aedeeteel eiq Jidu Yesu'ae xinlzaeq vae, aedeeteel yaol Jidu'ae xinlzaeq gae'lye gongyil e cholyaeq'ae lye bi gul maoqlye hhae, lilfaq mael laoqmyel zongl yil gae'lye gongyil e cholyaeq'ae lye bi gul maoqlye maeqngeel'ae, ruqtiq za e cholyaeqhael laoq qiq hhaeq eiq lilfaq mael laoqmyel zongl yil gae'lye gongyil e cholyaeq'ae lye maeq hhae bi gul kaol'ae. 17 Aedeeteel Jidu onglci'ae gongyil e cholyaeq'ae lye bi gul maoqlyekaol hael zonglkeel ongl myel zongl, ngeelfeiq, aeqyoyoq yaol laoq golsiq za e cholyaeq'ae lye bi fu siq kaollaoq, aelmaol, Jidu laoq golsiq e yaqhacheqzaq e cholyaeq maeq? Aeqdilmyel maeqngeel'ae! 18 Ngael laoq ngaeq lye cheqbaq mael cutulhoq hhei kaollaoq, aeqyoyoq laoq lilfaq mael'ae maeq zongl e cholyaeq lil lye zenlminq wae. 19 Lilfaq'ae lye gee'li'laol, ngael lilfaq mael'ae sil biq aeqwae, xilnye laol, ngael Momil gae'lye hha dyeqdeel wae. Ngael Jidu nyegael shiqziljal mael'ae qiqgael diqcheeq aeqwae, 20 Yaeqmeel dyeqdeel mael laoq ngael maeqngeel yil, Jidu ngaeq e onglci vae dyeq hhae; ngael yaeqmeel ruqtiq onglci'ae zonglzhol mael laoq, Momil e Yaqyo'ae xinlzaeq gae'lye zonglzhol lil; yoqhhaeq laoq ngaeq'ae gaeq laeq hhae, kaol ngaeq gae'lye aeqyoyoq yaol beiqgae hhei vae. 21 Ngael Momil e endianq mael maeq beiqgae hhei yil; gongyil e cholyaeq lye bi gul mael lilfaq ae'lye hhamul hhae lye kaollaoq, aelmaol, Jidu laoq alngeiqmyel sil wae.