Yiqfuqsoq Su
Meeqlaeqmaeq lye naelhaeq mael
1
Momil e zhiqyil maellye Jidu Yesu e shiqtuq geiq e Baoqloq, Yiqfuqsoq vae zhol e senltuqhael'ae xinl cu biq, senltuqhael laoq, Jidu Yesu onglci'ae neemae xyelpu maqpu e cholyaeqhael ngeelvae. 2 Enhuil mael, kaol neesaelhhae mael, aedeeteel e Aeqdae Momil kaol Hhaoqsongl Yesu Jidu ae'lye noteel'ae yo'li biq lye nyuqlil!Jidu onglci e geeqlongq mael
3 Maeqdaeqhhaeq'ae lye gee biq mael aedeeteel e Hhaoqsongl Yesu Jidu e Aeqdae Momil'ae biq biq lye nyuqlil. Yoqhhaeq laoq Jidu onglci'ae lye, mqmae taq e maeq qiqsheel e senllinq ae'lye lael e geeqlongq mael aedeeteel'ae biq gol laq vae. 4 Yoqhhaeq mqdongq milbei maeq bei laefuq ae'lye, Jidu onglci'ae lye aedeeteel yaol saelpodu hhei laq, kaol aedeeteel yaol yoqhhaeq e yiqsi ae'lye senljyeq wae lye bi peqlal laq, maeqmeeqmyel qiqgael eiq maqza, kaol neegaeqgaeq mael bong'lye bi za laq kaol'ae. 5 Yoqhhaeq aeqyoyoq hhaol biq e zhiqyil laoqmyel, aedeeteel yaol Yesu Jidu ae'lye yaqyo bi geiq laqngeel lye mael, laefuqmyel gee deelhhei wae. 6 Kaol yoqhhaeq e rongqyaol e endianq mael'ae maeqdaeqhhaeq'ae lye hhae bi gee wae; endianq xilmael laoq yoqhhaeq gaeq e Yaqyo onglci'ae lye, aedeeteel'ae alngeiqmyel biq hhei laq hhae. 7 Aedeeteel yaol laoq gaeq e Yaqyo xitaeq e siq ae'lye jiul duhoq yi laq, kaol zonglzhil mael shelmianq laeq vae, xilmael laoq, yoqhhaeq e duqgongqgongqlye e endianq maellye, 8 Aedeeteel'ae haelnaeqmyel biq hhei laq hhae. Yoqhhaeq gilzuqmyel geel mael kaol loq ongl maellye, 9 Aeqyoyoq Jidu onglci'ae lye gee deelhhei e neezae'lael mael laoqmyel, aedeeteel'ae yoqhhaeq e zhiqyil e aolmiq mael bi loq laeq, 10 Kaol haelmillye zongl maoqlye gee laoqmyel, shiqshen keellael fu, mqmae taq'ae hael, milcaeq taq'ae hael, kaol gilzuqmyel halzahael, gilzuqmyel Jidu Yesu onglci'ae qiq mal peqlal vae.
11 Aedeeteel eiq yoqhhaeq onglci'ae lye zaeqdye halngeiq hhamul hhei vae; xilmael laoq, aeqyoyoq e zhiqyil maellye gilzuqmyel silqinq mael zongl e Momil, aeqyoyoq e zhiqyil maellye laefuqmyel gee deelhhei hhae, 12 Xilnye zongl mael laoq, aedeeteel'ae yoqhhaeq e rongqyaol mael'ae maeqdaeqhhaeq'ae lye bi gee maoqlye hhae, aedeeteel laoq Jidu onglci'ae laefuqmyel xiwangl deelzaeq hhei e cholyaeq ngeelvae. 13 Jidu onglci'ae lye noteel zhen'liq e saeziq mael gaeq vae, saeziq xilmael laoq, noteel yaol bi deqjiul e fuqyin mael ngeelvae, noteel eiq yoqhhaeq'ae xiangxinl vae, kaol biq laqngeel lye gee gol e senllinq maellye gailzangkei hhei biq aeqwae. 14 Momil e cholyaeqhael yaol hhae bi jiulsuq fu keellye, senllinq mael laoq aedeeteel zaeqdye halngeiq hhamul e zenljul, xilnye laol, yoqhhaeq e rongqyaol mael'ae maeqdaeqhhaeq'ae lye hhae gee biq wae.
Baoqloq e heeldoq mael
15 Tyulkaol, ngael noteel laoq Hhaoqsongl Yesu vae xinlxin za, kaol senltuqhael'ae neegaeqgaeq biq'ae lye gaeq hhei laeq vae laol, 16 Noteel gae'lye maqqyemyel Momil'ae meeqyaevae lye gee biq, heeldoq gee fu, duqlye noteel'ae bael gee lil, 17 Ngael aedeeteel e Hhaoqsongl Yesu Jidu e Momil, rongqyaol e aeqdae'ae, cholyaeq'ae bi geel kaol qiqshil e yohael mael, noteel'ae biq hhei biq lye geezaeq biq lil, xilnye laol, noteel laoq yoqhhaeq yaol aeqdilmyel hhae siqcongl wae, 18 Kaol noteel e neemae onglci e ma'ne mael'ae keeqmol hhei biq, xilnye laol, yoqhhaeq noteel'ae gul du hhei laeq e panlwangl mael, aeqchee'ae lye noteel'ae bi loq laeq, yoqhhaeq'ae senltuqhael onglci'ae hhamul e rongqyaol e hhamul gayil mael laoq duqgongqgongqlye hhae, 19 Kaol yoqhhaeq laoq aedeeteel xiangxinl e cholyaeq xihael'ae bi mol hhei laeq e onglzaeq mael laoq, haelmillye heeq hhae lye hhae loq'ae, xilmael laoq, yoqhhaeq e zhee onglzaeq e laqtaq mael mulhhael mul hhae. 20 Zhee onglzaeq e xilmael laefuq laoq Jidu e aeqhhaol taq'ae mulhhael mul, kaol yoqhhaeq yaol cholsil onglci ae'lye bi dyeqhoqlal, yoqhhaeq yaol mqmae taq vae aeqyoyoq e laqsseqboq'ae yol bi zhol deelhhei, 21 Kaol gilzuqmyel zhiqmoq hael, laqtaq za hael, onglzaeq hael, guanqliq hael kaol cholmil halzahael taq vae hhael jyeqli aeqwae; yaeqmeel e shilgail dyul maeqcil, aeqgael e shilgail mael'ae dyel'eiq jyeqli aeqwae. 22 Momil lye halza haelzholhael yoqhhaeq e aeqkeel holhhaqboq'ae bi fuqcongq lael, yoqhhaeq yaol jiaolhuil gae'lye halza haelzholhael e laefuq fuqli qiq hhaeq bi geiq; 23 Jiaolhuil laoq yoqhhaeq e aeqhhaol'ae, halza haelzholhael bong'lye bi za bong e tyu qiq hhaeq lye zongl bong hhei hhae.