Qiqhhaeq qiqhhaeq'ae aeq'yel bal baq biq maoqhhae
6
Aqsseq aeqnilhael, qiqhhaeq laelhhaeq laoq maeq gaellael'oqlye zonglzhil maellye bi zonglyinq kaollaoq, neemae onglci'ae senllinq zhol e cholyaeq laoq, naoqyae'lye neemae maellye yoqhhaeq yaol bi polhoqlael maoqhhae; aeqyoyoq eiq aeqyae'lye kei maoqhhae, aeqgael bael cheeqmu lael maeqhe. 2 Noteel haetaeq e chengdyeqlye e aeq'yel mael qiqhhaeq qiqhhaeq'ae bal baq biq maoqhhae, xilnye laol, Jidu e lilfaq mael'ae zongl ngeelvae. 3 Cholyaeq maeq onglzaeq feiq aeqyoyoq onglzaeq lil lye kei kaollaoq, aeqyoyoq'ae zaqgiqgiqzaq hoq ngeelvae. 4 Aeqsul eiq aeqyoyoq e xinqweiq mael haelmeeqlye nyuq fufu hoq maoqhhae; xilnye laol, yoqhhaeq aeqyoyoq'ae hodazaq dyul wae, ochoq nyegael biqjiaol maeqngeel'ae. 5 Haetaeq eiq aeqyoyoq e aeq'yel mael baq maoq kaol'ae. 6 Hoq e yo'liq mael'ae xoqxiq e cholyaeq laoq, meeq e moqgoqhael geemyeq e qiq hhaeq nyegael hhaellaelmyel mul maoqhhae. 7 Aeqyoyoq'ae zaqgiq haq giqzaq hoq; Momil'ae maeq fudyul biq hhaeq'ae, cholyaeq aeqchee kae hhei'laol, heille hoq laq mael eiq aeqchee kaol'ae. 8 Ruqtiq mael'ae neezae bi lael maoqlyekaol ael'yuq xeiq e cholyaeq laoq, aeqdilmyel ruqtiq ae'lye myeyil mael heille hoq laq; senllinq mael'ae neezae bi lael maoqlyekaol ael'yuq xeiq e cholyaeq laoq, senllinq ae'lye haeqfu eiq zadeel e aeqyil mael heille hoq laq'ae. 9 Aedeeteel meeq mael zongl fu, maeq zongl gaeyil ongl yaevae lye haeq kei, maeq zongl goq yaevae lye maeq kei kaollaoq, shiqshen keellael fu laoq heillezaq hhei ongl'ae. 10 Tyulkaol, jihuil zhoq za lal laol, cholyaeqhael'ae meeq biq maoqhhae, Yesu'ae xinlzaeq e qiq haoq cholyaeqhael'ae laoq nyeq'ei xilnye hhal za biq maoqhhae.Jinqgaol kaol geeqlongq
11 Noteel fu hhei gil, ngaeq e aqlaq maellye noteel'ae cu hhei biq e zil mael haelmillye heeq she maeq! 12 Nildu oqlye zonglfuzaeq goq e cholyaeq tyuhael laoq, noteel'ae yeqgae gui'liq maeq zongl maeq hhaeq'ae lye caiq bi zongl hhae, xilnye zongl mael laoq, aeqgael Jidu e shiqziljal mael gae'lye guaeq'ei diqqye laqngeel yae lye gu biq hhae. 13 Yoqhhaeteel yeqgae gui'liq zongl gol e cholyaeqhael, aeqyoyoq eiq lilfaq mael maeq zongl yil'ae; yoqhhaeteel noteel yaol yeqgae gui'liq bi zongl laeq mael laoq, noteel e ruqtiq maellye hodazaq maoqlye hhae. 14 Ngeelfeiq, ngael laoq baeqjyelboq mael gae'lye aeqdilmyel maq hodazaq yil, aedeeteel e Hhaoqsongl Yesu Jidu e shiqziljal mael maoq maq hoda yil; shiqziljal xilmael, ngaeq'ae lye gee'li'laol, shilgail mael shiqziljal taq'ae diqcheeq biq aeqwae; shilgail'ae lye gee'li'laol, ngaeq yaol shiqziljal taq'ae diqcheeq laeq aeqwae. 15 Yeqgae gui'liq zongl, paelsilmyel yeqgae gui'liq maeq zongl mael laoq qiqgiq maeqbeeq wae, hhal mulyo mael laoq, yosheq peqlal e cholyaeq geiq maoqhhae. 16 Aeqsul gee deelhhei xilmael laoqmyel zongl yil laol, neesaelhhae kaol hhaoqsaeqsaeq mael yoqhhaeteel'ae, kaol Momil e Yiqsellyel cholyaeqhael'ae biq da hhei biq lye nyuqlil.
17 Saeq ae'lye aeqnaol, cholyaeq ngaeq'ae haq daqraoq lael gil o, ngaeq e aeqhhaol'ae Yesu e jilhaol za kaol'ae.
18 Aqsseq aeqnilhael, aedeeteel e Hhaoqsongl Yesu Jidu e endianq mael noteel e yohael mael nyegael qiqgael baelzhol biq lye nyuqlil. Amen!