5
Jidu lye aedeeteel yaol keelpyel laeq mael laoq, aedeeteel yaol bi zilyoq laeqngeel lye hhae. Tyulkaol, sseetae'lye haoqtul deelhhei, hhaeq'ongq ongqzaeq e cholyaeq e nuqkeeq maellye haeq bi zongltyeq hhei oq.Jidutuq e zilyoq mael
2 Ngael Baoqloq noteel'ae geegaeq laeqngeel, noteel yeqgae gui'liq zongl kaollaoq, Jidu noteel'ae qiqgiq maeq meeqyo'lael kiq'ae. 3 Ngael yeqgae gui'liq zongl e cholyaeqhael'ae, aeqdilmyel zail qiq pu gee gil laeqngeel, yoqhhaeq aeqdilmyel gilzuqmyel lilfaq mael laoqmyel zongl yil maoqhhae. 4 Noteel lilfaq maellye gongyil e cholyaeq'ae lye bi gul maoqlye cholyaeqhael laoq, Jidu nyegael geqtael wae, kaol endianq onglci ae'lye jyegae vae. 5 Ngaeteel laoq senllinq mael'ae kaolzaeq kaol xinlxin za'lye panlwangl e gongyil mael'ae doqdeelzaeq hhei lil. 6 Jidu Yesu onglci'ae laoq, yeqgae gui'liq zongl yo, yeqgae gui'liq maeq zongl yo mael, qiqgiq zoqyongl maeq qiq'ae, gaeq kiq e xinlxin maellye zongl du hhei mael zoqyongl caiq qiq hhae.
7 Noteel haeqfu zongl mael eiq zhee meeq hhae, aeqsul lye noteel yaol zhen'liq mael'ae maeq bi naelhaeq myel diqqye gil laq hhaemaeq? 8 Xilnye haelmeeqlye gee mael laoq, noteel yaol gul du hhei laq e tyutaeq ae'lye lael maeqngeel'ae. 9 Meelzillye paofenq mael meqziq hhaeqxul qiq lye mael bi zheeqlael. 10 Ngael Hhaoqsongl onglci'ae lye noteel laoq baeqjyelboq e qiqgiq maeq nyuq'ae lye xiangxinl lil; ngeelfeiq, noteel'ae zonglbeeq lael hael laoq, aeqsul haoq, aeqdilmyel hhae bi chenqfaq hhae. 11 Aqsseq aeqnilhael, ngael yaeqmeel eiq yeqgae gui'liq mael geegaeq siq kaollaoq, aeqcheekaol guaeq'ei bi diqqye siq laeq? Xilnye kaollaoq, shiqziljal mael cholyaeq yaol bi jye'leeq mael laoq maqza vae. 12 Ngael laoq noteel'ae zonglbeeq lael e cholyaeqhael aeqyoyoq yaol bi qiao maqkiqmyel za yae.
13 Aqsseq aeqnilhael, noteel yaol gul du hhei biq mael laoq, bi zilyoq maoqlye hhae; ngeelfeiq, zilyoq e xilmael lye saqdol lal aeqmyel mulgoq tyulmael haelmillye zongl goq laol haelmillye zongl e jihuil maq hha geiqzaq'ae, haeqfu eiq neegaeqgaeq maellye qiqhhaeq qiqhhaeq'ae fuqsil maoqhhae. 14 Gilzuqmyel lilfaq mael laoq, "dongqpyeq e cholyaeq'ae gaeq biq mael aeqyoyoq'ae gaeqzaeqhoq laoqmyel ngeel maoqhhae" lye xi qiq doq onglci vae zoq hhae. 15 Noteel aeqyae'lye kei maoqhhae, noteel laoq jyeqyaeq laoqmyel qiqhhaeq qiqhhaeq'ae koq, qiqhhaeq qiqhhaeq'ae meqdo maoqlye zongl kaollaoq, aeqgael qiqhhaeq qiqhhaeq yaol zonglmye hhei maeqhe.
Senllinq e aelsiq
16 Ngael laoq noteel vae senllinq sheeqmyeq boq'ae deel maoqhhae, aeqdilmyel ruqtiq e saqdol lal aeqmyel mulgoq tyulmael maeq hhae zongl yil'ae lye gee lil. 17 Ruqtiq e saqdol lal aeqmyel mulgoq tyulmael kaol senllinq mael zonglgae, senllinq mael kaol ruqtiq mael zonglgae, xi niq mal hhaellaelmyel zonglgae hhae, xilnye laol, noteel zongl goq mael laoqmyel maeq hhae zongl wae. 18 Ngeelfeiq, noteel laoq senllinq maellye bi sheeqmyeq kaollaoq, lilfaq e holhhaqboq'ae maeq zhol kael wae. 19 Saqdol lal aeqmyel mulgoq e silqinq tyulmael laoq qiq pu'ae lye fudu ongl hhae, xihael laoqmyel: Ochoq nyegael neemaeba, xinqlalmyel zongl, aeqchee zongl goq laol aeqchee zongl, 20 Cholyaeq lye zongldu hhei e momilhael'ae tongqheel, niqhaeq tulzaeq, holtyeltoq, zonglgae, heiqcilnael biq, faqhoqkei, aeqyoyoq'ae maoq maeq nyuqzaeq, qiq miq qiq miq boq'ae maeq pol, cholyaeq ee'longqzaeq, 21 Heiqcilnael, zilbaeq bu, puqqil maqza myel nyelhhae, xuldyul maeqcilmyel za siq. Ngael laefuq noteel'ae geegaeq gol biq, yaeqmeel noteel'ae yol geegaeq biq, xilnye zongl cholyaeq laoq, aeqdilmyel Momil e Goqja mael maq hhamul'ae.
22 Senllinq e aelsiq mael laoq, gaeq, hhaol, hoqpinq, renqnail, meeq, neemae meeq, zaqgiq maqgiq, 23 Naoqyae'lye za kiq, aeqyoyoq'ae zongltyeqzaeq ongl mael ngeelvae. Lilfaq mael xilnye silqinq mael'ae maeq diqqye'ae. 24 Jidu Yesu hhae lye e cholyaeqhael laoq, ruqtiq e saqdol lal aeqmyel zhee mulgoq tyulmael ruqtiq nyegael shiqziljal taq'ae qiqgael diqcheeq aeqwae. 25 Aedeeteel senllinq mael'ae kaolzaeq kaol dyeq kaollaoq, senllinq mael'ae kaolzaeq kaol silqinq zongl maoqhhae. 26 Haeq dilqeizaeq, qiqhhaeq qiqhhaeq'ae haeq haehol gil, qiqhhaeq qiqhhaeq'ae heiqcil haeq nael.