4
Ngael gee, zaeqdye halngeiq hhamul gayil e tyutaeq laoq, halza zaeqdye halngeiq e hhaoqsongl'ae lye feiq, maeq heeqlo'lal e yaeqguq fu laoq hhaeq'ongq ongqzaeq e cholyaeq laoqmyel hhae, 2 Yoqhhaeq laoq yoqhhaeq e aeqdae lye laefuqmyel gee deelhhei e naohaeq keellael fu keellye, fu'qyezaq e cholyaeq kaol guanqja e aqlaq holhhaq'ae hhae zhol hhae. 3 Aedeeteel eiq qiqsheel'ae, aedeeteel yaeqguq siq fu, milcaeq taq e jibenq yo'liq maellye hhaeq'ongq bi ongqzaeq yil mael eiq xilnye hhae. 4 Aeqgael naohaeq bong lael laol, Momil lye yoqhhaeq e Yaqyo yaol moqheilheil du hhei, yoqhhaeq yaol laoq haeqmiyaeq lye bo hhei hhae, kaol lilfaq holhhaqboq'ae bo deelhhei mael laoq, 5 Lilfaq holhhaqboq'ae zhol e cholyaeqhael yaol suq duhoq hhei maoqlye hhae, kaol aedeeteel'ae yoqhhaeq e yaqyo bi geiq laq. 6 Noteel laoq yaqyo'ae, tyulkaol, Momil yoqhhaeq e Yaqyo e yohael mael moqheilheil du hhei, kaol aedeeteel e neemae onglci'ae bi doyi laq, kaol "Abala, aeqdae o!" lye hhae gul. 7 Xilnye fu hhei'laol, nol laoq hhaeq'ongq ongqzaeq e cholyaeq maeqngeel wae, yaqyo wae, yaqyo ngeel kaollaoq, Momil'ae kaolzaeq kaol zaeqdye halngeiq hhamul gayil e cholyaeq peqlal vae.Baoqloq Ja'latail cholyaeq'ae meeq biq
8 Ngeelfeiq, noteel laefuq Momil'ae maeq siqcongl fu, Momil maeqngeel myel e momilhael'ae hhaeq'ongq ongqzaeq e cholyaeq geiq biq hhae; 9 Yaeqmeel noteel Momil'ae siqcongl vae, qiqshiq laoq, Momil noteel yaol siqcongl hhae, haelmillyekaol maeq onglzaeq, qiqgiq boq'ae maeqyo e jibenq yo'liq boq'ae pol hoqyil, kaol tyuhael e hhaeq'ongq ongqzaeq e cholyaeq geiq hoqyil goq laq wae siq maeq? 10 Noteel laoq naohaeq, baehae, zaeqnao, hoqlaq mael haelmeeqlye gol gayil gil'ae, 11 Kaol ngael noteel'ae bal zoqgiq yae, aeqgael ngael noteel e aeqhhaol taq'ae haelzongl mael laoq alngeiqmyel peqyil hhei maeqhe.
12 Aqsseq aeqnilhael, ngael noteel'ae ngael laoqmyel ngeel maoqhhae lye geezaeq lil, ngael eiq noteel laoqmyel kaollil. Noteel ngaeq'ae maeqmeeqmyel qiqgiq maeq zongl gol laq'ae. 13 Noteel loq'ae, ngael noteel'ae laefuq fuqli qiq pu fuqyin geegaeq biq mael laoq, ngaeq e aeqhhaol'ae naelgol nael laeq kaol'ae. 14 Noteel ngaeq e aeqhhaol gae'lye bi shilfufu hhei, ngeelfeiq, ngaeq'ae maeq fu'qiq'ongl yae lye maeq zongl laeq'ae, ngaeq'ae xinq yae lye eiq maeq zongl laeq'ae, daoldaolmyel, ngaeq'ae sheeqcaq laq mael Momil e mqmae yosongl'ae laoqmyel, kaol Jidu Yesu'ae laoqmyel hhae. 15 Noteel tyuqfu qiq nao e meeq e za kiq mael haeqvae yil vae maeq? Tyuqfu zonglkeel ongl kaollaoq, noteel aeqyoyoq e ma'ne mael heqdu hheikaol ngaeq dyel'eiq heil nae'ae. Xilmael laoq, ngael noteel'ae bal zoqzenl hhaeq lil. 16 Yaeqmeel ngaeq lye zhen'liq mael noteel'ae geegaeq hhei biq laol, daoldaolmyel, noteel e diqrenq peqyil wae maeq? 17 Laqheiqqyel lye noteel'ae za laq e cholyaeq tyuhael, noteel'ae meeq laeq maeqngeel'ae, noteel yaol geqtael maoqlye hhae, kaol noteel yaol yoqhhaeteel'ae laqheiqqyel lye bi meeq maoqlye hhae. 18 Meeq e silqinq mael taq'ae, haeqfu eiq laqheiqqyel lye ochoq'ae za biq mael laoq meeq hhae, ngeelfeiq, ngael noteel nyegael qiqgael zhol fu laoq zongl, maeq zhol fu laoq maeq zongl, xilnye haeq zongl gil. 19 Ngaeq e yaeqguqhael o, noteel heqlo'lal e jidutuq peqlal fu keellye, ngael noteel gae'lye yaeqguq bo fu nael laoqmyel zail hhae nael wae siq. 20 Ngael yaeqmeel ae'lye noteel tyuqvae zhee baelzhol goq oqyaevae, kaol geedu hhei e yotyel mael laefuq laoqmyel maeq heeq, ngael noteel gae'lye neemae zhee nyuqsaeq laeq kaol'ae.
Xaljaq kaol Saqla
21 Noteel lilfaq e holhhaq'ae zhol goq biq e cholyaeqhael, ngaeq'ae geegaeq laeq, noteel lilfaq mael maeq gaeq gol yil maeq? 22 Lilfaq mael taq'ae cu deelhhei, Yalboqlahanl vae yaqyo niq nulhhaeq zhol'ae, qiq hhaeq laoq yaqhacheqzaq e haeqmiyaeq lye bo hhei hhae, qiq hhaeq laoq zilyoq e cholhae aeqmae lye bo hhei hhae. 23 Yaqhacheqzaq e haeqmiyaeq tyutaeq lye bo hhei e tyutaeq laoq, cholyaeq e ruqtiq ae'lye bo hhei hhae; zilyoq e cholhae aeqmae lye bo hhei e tyutaeq laoq, biq laqngeel lye gee mael ae'lye bo hhei hhae. 24 Xilmael laoq dullaelmyel guqjin maellye gee hhae: Cholhae aeqmae tyu niq nulhhaeq laoq geemeeq deelhhei e niq mal ngeelvae; cholhae aeqmae qiq hhaeq laoq Xi'nail Geeqzhoq ae'lye du'lal, bo hhei e yaqyo laoq hhaeq'ongq ongqzaeq e cholyaeq'ae, xitaeq laoq Xaljaq ngeelvae. 25 Xaljaq xitaeq laoq A'laboq milcaeq e Xi'nail Geeqzhoq mael'ae dailbiaoq hhae, yaeqmeel e Ye'lulsa'lenq mael nyegael qiqsheel'ae, Ye'lulsa'lenq kaol yoqhhaeq e yaeqmiq yaqyohael laoq hhaeq'ongq ongqzaeq e cholyaeq kaol'ae. 26 Ngeelfeiq, baeqjyelboq e cholhae aeqmae qiq hhaeq laoq mqmae e Ye'lulsa'lenq'ae, zilyoq hhae, yoqhhaeq laoq aedeeteel e aeqmae'ae. 27 Momil e Suqhhaq taq'ae xilnye cu deelhhei kaol'ae:
Yaeqguq maeq pi kiq, maeq bo gol hael,
nol laoq hhaol maoqhhae;
yaeqguq bo fu nael maoq mael maeq puqlael gol hael,
nol laoq yotyel ha'lye hhaol maoqhhae;
haqyo maeq zhol hael laoq,
haqyo zhol hael taq'ae yaeqmiq yaqyo hhael zhol kaol'ae.
28 Aqsseq aeqnilhael, noteel laoq Yiqsaq laoqmyel, biq laqngeel lye gee mael laoqmyel yaeqmiq yaqyo geiq hhae. 29 Tyuqfu, cholyaeq e ruqtiq ae'lye bo hhei e tyutaeq laoq, senllinq ae'lye bo hhei e tyutaeq'ae guaeq'ei diqqye biq hhae, yaeqmeel eiq xilnye hhae. 30 Ngeelfeiq, Momil e Suqhhaq taq'ae haelmillye gee hhaemaeq? Gee: "Yaqhacheqzaq e haeqmiyaeq kaol yoqhhaeq e yaqyo yaol lyeqdu hhei! Yaqhacheqzaq e haeqmiyaeq e yaqyo laoq aeqdilmyel zilyoq e cholhae aeqmae e yaqyo nyegael, hhaellaelmyel halza haelzholhael maeq hhae bael byelzaeq'ae." 31 Aqsseq aeqnilhael, xilnye fu hhei'laol, aedeeteel laoq yaqhacheqzaq e haeqmiyaeq e yaeqguq maeqngeel'ae, zilyoq e cholhae aeqmae e yaeqguq'ae.