Lilfaq paelsilmyel xinlxin
3
Yaeqzhoqzhoq gil biq e Ja'latail cholyaeq o, Yesu Jidu yaol shiqziljal mael'ae diqcheeq biq e silqinq xilmael, noteel e ma'ne yiqsi'ae tuqhual laoqmyel mol du'lal gol wae, aeqsul lye noteel yaol yol giqhezaq gil laq hhaemaeq? 2 Ngael noteel'ae naelhaeq maoqlye mael laoq xi qiq mal wae: Noteel'ae senllinq mael yo'li biq mael laoq, lilfaq mael laoqmyel zongl yil gae'lye, paelsilmyel fuqyin gaeq hheikaol xiangxinl gae'lye hhaemaeq? 3 Noteel senllinq maellye ssuqhaoq caqzaq beibei hhae, yaeqmeel laoq ruqtiq maellye zonglbyel maoqlye lilmaeq? Noteel laoq xilnye yaeqzhoqzhoq gil laeq hhaemaeq? 4 Noteel xuldyulmyel saeq du'laq mael laoq alngeiqmyel hhaemaeq? Aeqdilmyel alngeiqmyel kaollaoq, 5 Aelmaol, Momil lye noteel'ae senllinq mael biq hhei biq, noteel onglci'ae shenqjiq yol zongl du hhei mael laoq, lilfaq mael laoqmyel zongl yil gae'lye, paelsilmyel fuqyin gaeq hheikaol xiangxinl gae'lye hhaemaeq? 6 Momil e Suqhhaq taq'ae xilnye cu deelhhei hhae: "Yalboqlahanl Momil e saeziq mael xiangxinl vae, kaol Momil yoqhhaeq'ae gongyil e cholyaeq'ae lye suanl biq hhae."7 Tyulkaol, noteel loq'ae: Xinlxin za e cholyaeq laoq Yalboqlahanl e yuqpaeq yuqnul ngeelvae. 8 Momil e Suqhhaq mael, laefuqmyel Momil baeqjyelboq minqcuq e cholyaeq yaol xinlxin za gae'lye gongyil e cholyaeq'ae lye bi gul maoqlye mol vae, kaol laefuqmyel fuqyin mael Yalboqlahanl'ae geegaeq hhei biq, gee: "Halza e goqjahael noq gae'lye geeqlongq meeq vae." 9 Fu hhei'laol, xinlxin za e cholyaeq tyuhael, kaol xinlxin za e Yalboqlahanl laoq geeqlongq qiqgael hhamul hhae. 10 Lilfaq mael oqlye zongl e cholyaeq laoq, doqchiq hhae bi gee ngeelvae, Momil e Suqhhaq taq'ae xilnye cu deelhhei kaol'ae: "Lilfaq taq'ae cu deelhhei laoqmyel maeq zongl yil e cholyaeqhael laoq, gilzuqmyel doqchiq hhae pi hhae." 11 Cholyaeq qiq hhaeq eiq lilfaq mael'ae kaolzaeq kaol Momil e yiqsi'ae gongyil e cholyaeq'ae lye maeq hhae bi gul'ae, xilmael laoq fudu ongl hhae, Momil e Suqhhaq taq'ae xilnye gee kaol'ae: "Gongyil e cholyaeq laoq xiangxinl gae'lye hha dyeqdeel'ae." 12 Lilfaq mael laoq xiangxinl tyuqvae lye lael maeqngeel'ae, daoldaolmyel, xilnye gee hhae: "Xihael zongl e cholyaeq laoq xilnye zongl gae'lye hha dyeqdeel'ae." 13 Jidu aedeeteel gae'lye doqchiq peqyil hhei, kaol aedeeteel yaol lilfaq e doqchiq onglci ae'lye suq duhoq hhei laq. Momil e Suqhhaq taq'ae xilnye cu deelhhei kaol'ae: "Shiqziljal mael'ae diqcheeq da biq hael laoq gilzuqmyel doqchiq gee biq hhae." 14 Xilmael laoq, Yalboqlahanl e geeqlongq mael Jidu Yesu gae'lye baeqjyelboq minqcuq e cholyaeq'ae bi yo'li, xilnye laol, aedeeteel laoq xiangxinl gae'lye biq laqngeel lye gee e senllinq mael hhamul wae.
Lilfaq kaol biq laqngeel lye gee mael
15 Aqsseq aeqnilhael, ngael cholyaeqhael pinqshiq senhoq e lilziq qiq mal gee maoq. Cholyaeq lye gee deelhhei e zhoqheilheil meeq vae laol, cholyaeq qiq hhaeq eiq maq mullal vae lye maeq hhae gee'ae, paelsilmyel ongljyeq myel maeq hhae cuda hhei'ae. 16 Biq laqngeel lye gee e saeziq tyuhael laoq, Yalboqlahanl kaol yoqhhaeq e houldail'ae gee biq hhae, "kaol houldailhael" lye gee maeqngeel'ae, "houldailhael" e yilsi mael laoq "haelnaeqmyel cholyaeq" vae gee hhae; "kaol noq e houldail tyutaeq" lye gee hhae, yilsi mael laoq "holdailhael onglci e qiq hhaeq" vae gee hhae, tyutaeq laoq Jidu ngeelvae. 17 Ngael laoq xilnye gee lil, Momil laefuq ae'lye geemeeq deelhhei e saeziq mael, yuqhael suqqyel (430) hoq e aeqnaol e lilfaq maellye maeq hhae bi hega hhei'ae, kaol biq laqngeel lye gee mael maq mullal myel bi peqyil hhei. 18 Zaeqdye halngeiq hhamul gayil mael lilfaq ae'lye lael kaollaoq, biq laqngeel lye gee mael ae'lye lael maeqngeel wae; ngeelfeiq, Momil laoq biq laqngeel lye gee biq e saeziq ae'lye zaeqdye halngeiq mael Yalboqlahanl vae biq hhei biq vae. 19 Xilnye gee'li'laol, aeqcheekaol lilfaq mael bi za laeq? Lilfaq mael laoq zonglzhil gae'lye ongljyeqmyel zonglda hhei hhae, aeqgael biq laqngeel lye gee mael hhamul e houldail tyutaeq lael fu'ae doqkeel kaol caiq jyeqsuq wae siq, lilfaq mael laoq mqmae yosongl e aqlaq ae'lye danbaoq e cholyaeq e aqlaq mael'ae heilmoq hhei biq hhae, kaol zongltul hhei hhae. 20 Ngeelfeiq, danbaoq e cholyaeq yaol laoq qiqboq'ae oqlye zongltul hhei biq maeqngeel'ae; ngeelfeiq, Momil laoq qiq hhaeq wae.
Hhaeq'ongq ongqzaeq e cholyaeq kaol yaqyo
21 Xilnye laol, lilfaq mael Momil e biq laqngeel lye gee mael nyegael maq hoqga'li kiq hhaemaeq? Aeqdilmyel maeqngeel'ae! Lilfaq biq gaeyi mael laoq, cholyaeq'ae aeqyil bi za lalkiq kaollaoq, gongyil e cholyaeq'ae lye bi gul mael laoq aeqdilmyel lilfaq maellye lael hhae. 22 Ngeelfeiq, Momil e Suqhhaq lye haelzhol cholyaeq yaol golsiq onglci'ae hhaqlongl biq mael laoq, Yesu Jidu'ae xiangxinl gae'lye lael e biq laqngeel lye gee mael, xiangxinl e cholyaeqhael'ae biq biq maoqlye hhae.
23 Aedeeteel Yesu'ae maeq xinlzaeq e laefuq ae'lye mael Yesu'ae xinlzaeq fu keellye, aedeeteel yaol lilfaq e holhhaqboq'ae hhaqlongl deel laeq laoqmyel zongltyeq laeq hhae. 24 Xilnye laol, Jidu lael fu keellye, lilfaq mael laoq aedeeteel yaeqguq fu e laoqsi'ae, aedeeteel'ae xinlxin za gae'lye gongyil e cholyaeq'ae lye bi gul maoqlye hhae. 25 Aedeeteel Yesu'ae xinlzaeq vae laol, saeq ae'lye aeqnaol, aedeeteel laoq yaeqguq fu e laoqsi e aqlaq e holhhaqboq'ae maeq zhol wae.
26 Qiqshiq laoq, noteel xiangxinl ae'lye, Jidu Yesu onglci vae gilzuqmyel Momil e yaeqmiq yaqyo peqlal aeqwae. 27 Noteel shelxiq hheikaol Jidu boq'ae pollael hael laoq, gilzuqmyel Jidu yaol aelhongq laoqmyel dumda hhei aeqwae: 28 Kaol Yoqtail cholyaeq'ae paelsilmyel Xi'lal cholyaeq'ae lye maqza wae, hhaeq'ongq ongqzaeq e cholyaeq'ae paelsilmyel zilyoq e cholyaeq'ae lye maqza wae, haqyoyaeq'ae haeqmiyaeq'ae lye eiq maqza wae, noteel Jidu Yesu onglci'ae gilzuqmyel qiq mal peqyil vae kaol'ae. 29 Noteel Jidu hhae lye kaollaoq, noteel laoq Yalboqlahanl e yuqpaeq yuqnyul ngeelvae, biq laqngeel lye gee mael laoqmyel zaeqdye halngeiq hhamul gayil e cholyaeq wae.