Sil myel ae'lye duyi kaol dyeq myel vae do'li
2
Laefuq, noteel aeqyoyoq e zonglzhil mael kaol golsiq gae'lye sil hhei vae. 2 Tyuqfu, noteel laoq zonglzhil mael kaol golsiq onglci'ae zonglzhol, yaeqmeel e shilgail e cholyaeqhael zongl laoqmyel bael zongl, kaol mqmae holhhaq vae guanq e laqtaq za e qiq hhaeq e saeziq mael naelhaeq, tyutaeq laoq, yaeqmeel saeziq maeq naelhaeq e cholyaeqhael e neemae onglci'ae mulhhael mul e duqlaq e yohael mael ngeelvae. 3 Aedeeteel laefuq laoq gilzuqmyel yoqhhaeteel onglci vae zhol, kaol ruqtiq e saqdol lal aeqmyel mulgoq tyulmael haelmillye zongl goq laol haelmillye zongl, ruqtiq kaol neemae onglci'ae hael nyuq hhei laoqmyel zongl yil, kaol ochoq laoqmyel bogae hhei fu ae'lye hhae bi chenqfaq e cholyaeq'ae. 4 Ngeelfeiq, Momil vae laoq hhaoqsaeqsaeq kiq mael duqgongqgongqlye za'ae, yoqhhaeq aedeeteel'ae gaeq laeq e haeqheemyel e gaeq mael gae'lye, 5 Aedeeteel zonglzhil gae'lye sil fu, aedeeteel yaol Jidu nyegael qiqgael bi dyeqdeel laeq, xilnye fu hhei'laol, noteel hha deqjiul mael laoq endianq mael gae'lye hhae. 6 Yoqhhaeq aedeeteel yaol Jidu Yesu onglci'ae yoqhhaeq nyegael yol qiqgael bi bal dyeqhoqlal laq, kaol mqmae taq'ae hhaellaelmyel qiqgael bi baelzhol laeq mael laoq, 7 Yoqhhaeq e duqgongqgongqlye e endianq mael, aeqnaol e shiqdail e cholyaeqhael'ae bi mol hhei maoqlye hhae, endianq xilmael laoq, yoqhhaeq Jidu Yesu onglci'ae lye aedeeteel'ae neemae maeqpaelmyel gaeq laeq mael ngeelvae. 8 Noteel hha deqjiul mael laoq Momil e endianq, kaol xiangxinl gae'lye hhae; xilmael laoq aeqyoyoq ae'lye lael maeqngeel'ae, Momil lye biq hhei hhae; 9 Xinqweiq ae'lye lael eiq maeqngeel'ae, aeqgael qiqhhaeq laelhhaeq aeqyoyoq'ae hodazaq maeqhe. 10 Aedeeteel yaol laoq yoqhhaeq lye niqdu hhei hhae, Jidu Yesu onglci'ae lye niqdu hhei laeq mael laoq, aedeeteel yaol meeq e bi zongl maoqlye hhae, meeq e zongl xilmael laoq, Momil haeqfu'ae'lye paeqgaelsael meeq deelhhei e aedeeteel zongl maoq mael ngeelvae.Niq sheel cholyaeq qiqsheel peqlal
11 Tyulkaol, noteel nyuqdeel maoqhhae, laefuq noteel dyeqlal fu laoq baeqjyelboq minqcuq e cholyaeq'ae, kaol cholyaeq e aqlaq maellye ruqtiq taq'ae "yeqgae gui'liq zongl yo e cholyaeq" lye, noteel'ae "yeqgae gui'liq maeq zongl yo e cholyaeq" lye mil hhei biq hhae, 12 Tyuqfu, noteel laoq Jidu nyegael guanxil maqza'ae, saelpodu hhei e haelzhol e Yiqsellyel cholyaeqhael nyegael geqtael hhae, biq laqngeel lye gee gol e geemeeq deelhhei mael taq'ae laoq nildu e cholyaeq'ae, noteel milcaeq holtaq vae qiqgael chifuzaeq hhael maqza, Momil vae eiq maeq siqcongl. 13 Yilkaefu noteel kaol Momil e kaeqlaeq vae laoq gaelmaolsae'lye hhae, ngeelfeiq, yaeqnao Jidu Yesu onglci'ae, yoqhhaeq e siq mael'ae kaolzaeq kaol hhae niqlael vae.
14 Yoqhhaeq laoq aedeeteel yaol bi hoqpinq laeq e qiq hhaeq'ae. Yoqhhaeq lye Yoqtail cholyaeq kaol baeqjyelboq minqcuq e cholyaeq e kaeqlaeq vae geqtyeq deelhhei e congqciq mael cheqba hhei'laol, niq sheel cholyaeq yaol qiqsheel e neemae bi za, kaol aeqyoyoq e aeqhhaol maellye yoqhhaeteel yaol maeq bi holtyeltoq gil vae, 15 Kaol Yoqtail cholyaeq e lilfaq taq'ae cuda deelhhei moqheilheil e saeziq kaol tiaoqlil mael hega hhei mael laoq, niq sheel cholyaeq yaol Yesu Jidu onglci'ae cholsheq qiq hhaeq bi peqlal. Xilnye laol, Yesu laoq aedeeteel e hoqpinq peqlal vae. 16 Yoqhhaeq lye shiqziljal taq ae'lye holtyeltoq gil mael zonglmye hhei'laol, shiqziljal ae'lye niq sheel e cholyaeq laoq qiqsheel cholyaeq bi peqlal, kaol yoqhhaeteel yaol Momil nyegael bi maoqhoqli, 17 Kaol hoqpinq e fuqyin mael noteel gaelmaolsae'lye vae zhol e cholyaeq'ae geegaeq hhei yi biq, kaol hoqpinq xilmael gaelniqniq e cholyaeq vae eiq geegaeq hhei biq, 18 Aedeeteel niq sheel e cholyaeq yoqhhaeq ae'lye, senllinq qiq hhaeq e onglci vae Aeqdae e yiqsi'ae hhae keellael.
19 Xilnye laol, noteel laoq nilpu cholyaeq kaol baeqjyelboq milcaeq ae'lye lael e cholyaeq maeqngeel wae, senltuqhael nyegael goqja qiq mal e cholyaeq'ae, kaol Momil toq e cholyaeq wae, 20 Momil lye Jidu Yesu yaol congqciq paeqhhael e haqlo bi geiq, kaol noteel yaol shiqtuq kaol xianzhi e congqciq paeqhhael taq'ae cutul da hhei biq, 21 Laoqhaol qiq ssul myel yoqhhaeq ae'lye niqza'lye cu maoq beq hhei vae, kaol aeqyae aeqyae'lye Hhaoqsongl onglci e sholhaol peqlal. 22 Noteel yaol eiq yoqhhaeq onglci vae qiqgael bi bal cutul da hhei, kaol senllinq zhol e laoqhaol peqlal vae.