Baoqloq baeqjyelboq minqcuq e cholyaeq'ae fuqyin geegaeq biq
3
Tyulkaol, ngael Baoqloq laoq noteel baeqjyelboq minqcuq e cholyaeqhael gae'lye, Jidu Yese e koqlongl deelhhei e cholyaeq geiq e qiq hhaeq, noteel'ae heeldoq bael gee lil. 2 Noteel gaeq gol vae lye ngael xiangxinl lil, Momil ngaeq'ae moqheilheil laeq, kaol yoqhhaeq e endianq mael, noteel'ae geegaeq hhei biq lye toqshiq hhei laeq hhae, 3 Yoqhhaeq laoq qiqshil maellye, ngaeq'ae fuqyin e aolmiq mael bi loq laeq, yilkaefu ngael noteel'ae aelheel cu hhei gol biq laoqmyel hhae. 4 Noteel duq hhei'laol, ngael laoq Jidu e aolmiq mael zhee siqcongl'ae lye loq vae; 5 Aolmiq xilmael laoq, yilkaefu e shiqdail vae yaeqmeel senllinq ae'lye yoqhhaeq e senljyeq shiqtuqhael'ae, kaol xianzhihael'ae qiqshil hhei biq laoqmyel maeq qiqshil gol biq'ae, 6 Aolmiq xilmael laoq, baeqjyelboq minqcuq e cholyaeqhael Jidu Yesu onglci'ae, fuqyin ae'lye hhaellaelmyel zaeqdye halngeiq hhamul gayil e cholyaeq, aeqhhaol qiq siq laoqmyel e cholyaeq kaol biq laqngeel lye gee mael hhamul e cholyaeq peqlal mael ngeelvae.7 Ngael laoq fuqyin xilmael e hhaeq'ongq ongqzaeq e cholyaeq geiq mael laoq, Momil e encil maellye hhae, yoqhhaeq mulhhael mul e onglzaeq maellye ngaeq'ae biq hhei laq hhae. 8 Ngael laoq senltuqhael onglci e hhaelnil nilli e qiq hhaeq taq'ae hhael nil feiq, yoqhhaeq ngaeq'ae endianq xilmael biq laq wae siq, kaol ngaeq yaol Jidu e maeq suqda ongl e bong'lye fuqyin mael, baeqjyelboq minqcuq e cholyaeq'ae bi geegaeq yil laeq, 9 Kaol cholyaeqhael'ae, mqdongq milbeibei laefuq ae'lye, zonglhhaq deelhhei e halza haelzholhael zongldu hhei e Momil onglci e aolmiq mael aeqchee'ae lye mael bi loq gil, 10 Xilmael laoq, yaeqmeel e jiaolhuil ae'lye mqmae e zhiqmoq hael kaol laqtaq za hael'ae Momil e haelnaeqmyel e geel mael bi loq hhae. 11 Xilmael laoq, Momil mqdongq milbeibei laefuq ae'lye aedeeteel e Hhaoqsongl Jidu Yesu onglci'ae lye zongl maoqlye gee deelhhei mael zonglbyel vae. 12 Aedeeteel Yesu'ae xinlzaeq gae'lye, yoqhhaeq e onglci'ae qiqgiq maqguzaq kael vae, kaol qiqgiq maq huaiqyiq myel Momil e yiqsi'ae keellael. 13 Tyulkaol, ngael noteel'ae geezaeq lil, ngael noteel gae'lye saeqlael pi gae'lye pyeqkeel maeq deeq myel haeq zongl gil; xilmael laoq noteel e rongqyaol'ae.
Jidu e gaeq mael loq maoqhhae
14-15 Mqmae taq'ae kaol milcaeq taq e aeqsul toq e cholmil mael eiq Momil ae'lye lael hhae. Tyulkaol, ngaeq e mqmae Aeqdae e yiqsiboq'ae vuqduqtongq gae hheikaol heeldoq gee: 16 Yoqhhaeq e duqgongqgongqlye e rongqyaol laoqmyel, yoqhhaeq e yohael ae'lye, noteel e neemae onglci e aqha mael hhael bi zoq tullaeq biq lye geezaeq lil; 17 Kaol Jidu noteel e xinlxin gae'lye noteel e neemae onglci'ae zhol, kaol noteel'ae gaeq e onglci'ae aelcil bi zhido yil kaol congqciq paeqhhael bi zongltul hhei lye geezaeq lil; 18-19 Kaol senltuqhael nyegael, Jidu e gaeq mael, haelmillye maol, haelmillye heeq, haelmillye gao, haelmillye naq hhae lye hhae loq'ae, kaol gaeq e xilmael laoq cholyaeq e zhishiq maellye siqcongl mael'ae jyeqli aeqwae lye loq'ae, xilnye zongl mael laoq, Momil e gilzuqmyel duqgongqgongqlye mael, noteel'ae bong'lye bi za maoqlye hhae.
20 Momil laoq aedeeteel e neemae onglci'ae mulhhael mul e onglzaeq maellye gilzuqmyel hael bi peqlal, aedeeteel hael geezaeq hael nyuqzaeq mael'ae jyeqli aeqwae. 21 Yoqhhaeq jiaolhuil onglci'ae, kaol Jidu Yesu onglci'ae aeqgael hae qiq cheq'ae keellye rongqyaol mael haeqfu keellye hhamul biq lye nyuqlil. Amen!