Yesu'ae xinlzaeq e cholyaeq laoq aeqhhaol qiq siq laoqmyel peqlal maoqhhae
4
Ngael Hhaoqsongl gae'lye koqlongl laeq e qiq hhaeq noteel'ae haelmeeqlye gee gil laeqngeel, gul du hhei laeq vae laol, aeqchee silqinq zongl mael taq vae eiq, noteel'ae gul du hhei laeq mael'ae zae'li ongl maoqhhae. 2 Aeqchee zongl mael taq vae eiq maeq dilqeizaeq hhaeq'ae, naoqyae'lye ngeel maoqhhae, renqnail za, kaol neegaeqgaeq maellye qiqhhaeq qiqhhaeq'ae renq ongl maoqhhae, 3 Kaol Momil ae'lye lael e hoqpinq maellye hhaellaelmyel kaeqmaoq deelhhei maoqhhae, kaol hael zonglkeel ongl myel senllinq lye biq hhei e neemae qiqsheel laoqmyel mael zongl gaeyil maoqhhae. 4 Momil lye noteel yaol gul du hhei laq fu, noteel'ae qiqsheel e panlwangl za laoqmyel, aeqhhaol laoq qiq siq wae, senllinq laoq qiq hhaeq wae, 5 Hhaoqsongl laoq qiq hhaeq wae, xinlyangq laoq qiq mal wae, shelxiq mael laoq qiqsheel wae, 6 Momil eiq qiq hhaeq wae, yoqhhaeq laoq haelzhol cholyaeqhael e Aeqdae'ae. Yoqhhaeq laoq haelzhol cholyaeq e Hhaoqsongl geiq hhae, haelzhol cholyaeq ae'lye yoqhhaeq e mulhhael mael mul byel, kaol haelzhol cholyaeq onglci vae zhol'ae. 7 Aedeeteel aeqsul eiq endianq hhamul mael laoq, Jidu lye aedeeteel'ae biq hhei laq e encil laoqmyel hhae. 8 Tyulkaol, Momil e Suqhhaq taq'ae xilnye gee:"Yoqhhaeq haeqgaomyel e mqmae vae da'li fu,
bi deiqtyeq e cholyaeqhael yaol eezaeq laeq biq,
kaol maeq qiqsheel e encil mael cholyaeqhael'ae biq hhei biq."
9 "Yoqhhaeq da'li'ae" lye gee laol, yoqhhaeq laefuq laoq milcaeq holhhaq vae doyil gol hhae lye mael'ae gee maeqngeel maeq? 10 Gaeyi e qiq hhaeq laoq, da'li e tyutaeq, halza e mqmae taq hael'ae jyeqli e qiq hhaeq ngeelvae, yoqhhaeq laoq halza haelzholhael'ae bong'lye bi za maoqlye hhae. 11 Yoqhhaeq lye cholyaeq'ae biq hhei biq hael laoq, shiqtuq zoq, xianzhi zoq, fuqyin geegaeq e cholyaeq zoq, muqsi kaol laoqsi zoq mael laoq, 12-13 Aedeeteel haelzhol cholyaeqhael qiqsheel e xinlyangq za, kaol Momil e Yaqyo yaol siqcongl, xinlyangq taq'ae heeqlo'lal vae laol, Jidu laoqmyel qiqgiq geehhael maqza myel e aeqyil za fu keellye, yoqhhaeteel yaol senltuqhael'ae bi peiqxunl, kaol fuqsil e mulhhael bi mul, kaol Jidu e aeqhhaol mael bi cutul da hhei maoqlye hhae. 14 Xilnye laol, aedeeteel laoq yaeqguq guqyaeq maq geiq wae, cholyaeq e zaqgiqgiq e loqho kaol zaqgiqgiq maellye maeq bi giqzaq hhei, kaol maq hoq e geemyeq e zaeqxil maellye maeq bi bo ni, kaol bo pu bo da myel maeq bi bo hhei. 15 Daoldaolmyel aedeeteel laoq neegaeqgaeq maellye zaqgiq maqgiq e saeziq gee maoqhhae, aeqchee mael taq vae eiq aeq'yae aeqyae'lye heeqda lal maoqhhae. Jidu laoq jiaolhuil e vuqduq'ae, 16 Yoqhhaeq ae'lye aeqhhaol taq e zhitiqhael hhaellaelmyel zae'li kiq maoqhhae, aeqhhaol taq e hae qiqgael eiq aeqyoyoq zongl maoq mael zongl, kaol hae qiqgael eiq aeqyoyoq zongl kiq maellye, qiqhhaeq qiqhhaeq'ae baelzongl biq, aeqhhaol mael aeqyae aeqyae'lye bi heeqda lal, kaol gaeq e onglci'ae aeqyoyoq yaol zongltulzaeq hhei.
Yilkaefu e ngael kaol cholsheq peqlal e ngael
17 Tyulkaol, ngael xilnye gee, Hhaoqsongl onglci'ae aeqlyeq maeq lyeq myel gee, noteel haelzongl e silqinq mael taq'ae, baeqjyelboq minqcuq e cholyaeqhael qiqgiq yilsi maqza myel nyuq maellye zonglzhol gil laoqmyel haeq zongl gil oq. 18 Yoqhhaeteel e neemae'ae nyuq mael nahongqlye peqyil biq, aeqyoyoq qiqgiq maq loq, kaol neehaha gae'lye, Momil biq e aeqyil mael nyegael geqtael biq vae. 19 Yoqhhaeteel laoq mq yil biq aeqwae, kaol saqdol lal aeqmyel mulgoq tyulmael haelmillye zongl goq laol haelmillye zongl, maeq qiqsheel e xinqlalmyel zongl e silqinq mael'ae neemaecuqm. 20 Ngeelfeiq, noteel Jidu ae'lye xoqxiq hhei mael laoq xilnye maeqngeel'ae. 21 Noteel yoqhhaeq e saeziq mael gaeq gol, kaol yoqhhaeq onglci e zhen'liq taq'ae bi geemyeq gol kaollaoq, 22 Noteel laoq cholgeil yaol aelhongq laoqmyel heiga hhei, kaol yilkaefu e xinqweiq mael beiqgae hhei; cholgeil xitaeq laoq aeqyoyoq zhee mulgoq maellye cheeqmu biq laol aeq'yae aeqyae'lye ba yil hhae. 23 Noteel aeqyoyoq e neemae onglci'ae nyuq mael yosheq bi paellael maoqhhae, 24 Kaol cholsheq yaol aelhongq laoqmyel dumda hhei; cholsheq xitaeq laoq Momil nyedullye zongldu hhei hhae, kaol zhen'liq ae'lye lael e gongyil kaol senljyeq mael za hhae.
Paellael e cholyaeq laoq haelmillye zonglzhol maoqhhae lye mael
25 Tyulkaol, noteel zaqgiqgiq e saeziq mael beiqgae maoqhhae, haetaeq eiq dongqpyeq'ae zhol e cholyaeq'ae zaqgiq maqgiq e saeziq gee biq maoqhhae, aedeeteel aeqsul eiq aeqhhaol qiq siq taq e zhitiq kaol'ae. 26 Hol feiq, golsiq haeq zonglpizaeq, neelmae leeqdo fu keellye haeq hol keel, 27 Niqhaeq haeqmae vae jihuil haeq bi za. 28 Lolbiq haoq hael, haeq haoqzaeq gil oq; duqlye mulzaeqnaol maoqhhae, aeqyoyoq e aqlaq maellye meeqyo'lael kiq e mulhhael mulzaeq, xilnye laol, aeqyoyoq'ae za hael, mulyo biq hael'ae hhae byel biq wae. 29 Maeqmeeq e saeziq mael myeqbongq vae lye qiq doq eiq haeq bi duyi, ochoq'ae mulyo biq laoqmyel aqha bi bo'lael kiq e meeq e saeziq gee laol, gaeq hhei biq e tyutaeq'ae bi meeqyo'li kiq maoqhhae. 30 Momil e senllinq mael'ae haeq bi nyuqsaeq, yoqhhaeq lye noteel'ae jilhaol diq da hhei wae, kaol jiul duhoq laq e naohaeq keellael mael'ae doq deelhhei. 31 Gilzuqmyel neemae onglci'ae maeq pityeq ongl myel mael, faqhoqkei mael, neemasu mael, deiqgae mael, geekyuq mael, kaol gilzuqmyel duqlaq myel zongl mael, gilzuqmyel noteel onglci ae'lye beiqgae maoqhhae. 32 Qiqhhaeq qiqhhaeq'ae meeq biq maoqhhae, hhaoqsaeqsaeq kiq e neemae za, Momil Jidu onglci'ae lye noteel'ae yuanqliangl biq laoqmyel, noteel eiq qiqhhaeq qiqhhaeq'ae yuanqliangl maoqhhae.