Fei'lilbiq Su
Meeqlaeqmaeq lye naelhaeq mael
1
Jidu Yesu e yaqhacheqzaq e cholyaeq Baoqloq kaol Tiqmoqtail laoq, Fei'lilbiq vae zhol e Jidu Yesu onglci e senltuqhael'ae, fu'qyezaq e cholyaeqhael'ae kaol zhiqsilhael'ae xinl cu biq. 2 Enhuil mael, neesaelhhae mael aedeeteel e Aeqdae Momil kaol Hhaoqsongl Yesu Jidu ae'lye noteel'ae yo'li biq lye nyuqlil!Baoqloq e heeldoq mael
3 Ngael haeqfu qiqzael noteel'ae nyuqdu laq laol, ngaeq e Momil'ae meeqyaevae lye gee biq lil, 4 Haeqfu qiqzael noteel haelzhol cholyaeqhael'ae heeldoq bael gee biq fu, duqlye zhee hhaol gae'lael aeqmyel heeldoq bael gee biq lil, 5 Laefuq fuqli e qiq nao ae'lye mael yaeqmeel'ae keellye, noteel laoq neemae qiqsiqmyel fuqyin e mulhhael mael bal mul kaol'ae. 6 Ngael guaeq'ei xiangxinl lil, noteel onglci vae zhee meeq e mulhhael xilmael zhoq mul e tyutaeq laoq, Yesu Jidu e naohaeq keellael fu aeqdilmyel mulhhael xilmael mul byel maoqlye hhae. 7 Ngael noteel haelzhol cholyaeq gae'lye xilnye nyuq mael laoq hoq hhae, noteel duqlye ngaeq e neemae onglci vae zhol kaol'ae; ngael laoq ngaeq'ae kaltoq laq myel vae zhol haoq, fuqyin gae'lye gee'loq kaol ngeel'ae lye zenlminq fu haoq, noteel laoq ngaeq nyegael endianq qiqgael hha bal mul'ae. 8 Ngael Jidu Yesu e neemae mael laoqmyel noteel haelzhol cholyaeq'ae zhee nyuqdu yae, xilmael laoq, Momil ngaeq'ae bal zoqzenl laeq kael'ae. 9 Ngael heeldoq hael gee mael laoq xilnye hhae: Noteel e neegaeqgaeq mael, zhishiq mael taq'ae kaol haelmillye hhae lye fudu ongl mael taq'ae, maqqyemyel hhael naeq lael biq, 10 Kaol noteel'ae hael mael laoq ngeel she, maeqngeel she lye bi fudu hhei ongl, kaol Jidu e naohaeq vae zaqgiq maqgiq e qiqgiq geehhael maqza e cholyaeq geiq, 11 Kaol Yesu Jidu'ae kaolzaeq kaol gongyil e aelsiq zu'lye siq du beq hhei, kaol rongqyaol mael, laqma deiqqei mael Momil'ae biq biq.
Ngael dyeqdeel mael laoq Jidu gae'lye lil
12 Aqsseq aeqnilhael, ngael noteel'ae bi loq maoq, ngaeq'ae hael puqlael laeq e silqinq mael laoq, daoldaolmyel fuqyin mael nyeq'ei hhael bi geegaeq du beq yil vae, 13 Kaol zongmae vae ocongq biq e gilzuqmyel cholyaeqhael, kaol baeqjyelboq e cholyaeqhael laoq, ngaeq yaol Jidu gae'lye bi kaltoq hhae lye loq'ae; 14 Kaol Hhaoqsongl onglci e aqsseq aeqnil tyuhael, hhael naeq myel e cholyaeq laoq ngaeq'ae kaltoq laq gae'lye, maq huaiqyiq myel xiangxinl vae, kaol nyeq'ei teel eiq maq gu zaq, neemae bozaeq gae'lael aeqmyel Momil e saeziq mael geegaeq hhae.
15 Qiqmiq laelmiq Jidu yaol geegaeq mael laoq heiqcilnael biq kaol geegae gae'lye hhae; ngeelfeiq, qiqmiq laelmiq laoq meeq biq lye nyuq gae'lye hhae. 16 Aeqnaolboq qiqsheel cholyaeq laoq neegaeqgaeq gae'lye hhae, kaol ngaeq yaol moqheilheil duyi laq mael laoq, fuqyin mael gee'loq hhae lye loq'ae. 17 Laefuqboq qiqsheel cholyaeq laoq Jidu yaol geegaeq mael laoq, aeqyoyoq'ae maoq maeq nyuqzaeq gae'lye hhae, maeqmeeqmyel nyuqtongq deelhhei kaol zongl hhae, ngaeq'ae kaltoq laq e kyuq mael taq'ae hhael bi kyuq maoqlye zongl hhae. 18 Xilnye feiq aeqchee beeq maeq? Paelsilmyel jaqbaqyilsi paelsilmyel aeqdilmyel nyuqtongq hhei aeqmyel zongl, haelmillye zongl haoq, Jidu yaol geegaeq duyil laol, ngael laoq xilmael gae'lye zhee hhaol yae.
Ngael laoq zail hhaol maoq siq, 19 Ngael loq kaollil, silqinq xilmael laoq noteel heeldoq bael gee, kaol Yesu Jidu e yohael mael baelzongl laeq ae'lye, ngaeq yaol aeqdilmyel bi pyeqduhoq hhei laq'ae. 20 Xilmael laoq ngael chifu deelzaeq hhei mael, kaol panlwangl deelzaeq hhei mael'ae: Ngaeq yaol bi saqdol maoqlye silqinq qiq mal eiq maeq ongl'ae; daoldaolmyel aeqchee silqinq mael vae eiq qiqgiq maq gu zaq yil, dyeq haoq sil haoq, haeqfu eiq Jidu yaol ngaeq e aeqhhaol taq'ae, yaeqmeel eiq haelzael'ae laoqmyel heeq'ae lye bi mol du'lal maoq. 21 Ngaeq'ae lye gee'li'laol, dyeqdeel mael laol Jidu gae'lye lil, sil hhei kaol'eiq meeqyo'lael kiq kaol'ae. 22 Ngeelfeiq, ngaeq e aeqhhaol dyeqdeel siq laol, mulhhael mul du hhei ongl kaollaoq, ngael laoq hael mael mul maoqlye maeq loq yaevae. 23 Ngael xi niq mal kaeqlaeq'ae mulsaeq yae: Ngael laoq sil hheikaol Jidu nyegael qiqgael baelzhol mael hhael hhaeq lil, xilmael laoq meeqlye meeq'eil meeq kaol'ae; 24 Ngeelfeiq, ngael noteel gae'lye ruqtiq'ae dyeqdeel mael laoq hhal mulyo hhae. 25 Ngael xilnye guaeq'ei xiangxinl vae laol, milcaeq taq'ae baelzhol maoq wae siq lye loq lil, kaol noteel haelzhol cholyaeq nyegael qiqgael bal dyeqdeel, kaol noteel yaol xinlyangq taq'ae hhael bi loq lael kaol hhael bi hhaol gil, 26 Xilmael laoq, ngael noteel tyuqvae keellael fu, noteel Jidu Yesu onglci'ae hoda mael nyeq'ei hhael bi naeqlael maoqlye lil.
27 Hhal mulyo mael laoq: Noteel aeqchee silqinq zongl mael taq vae eiq Jidu e fuqyin mael nyegael zae'li ongl maoqhhae, xilnye laol, ngael noteel'ae mol lael haoq, paelsilmyel noteel tyuqvae maeq zhol kaol'eiq, noteel e silqinq mael hhae gaeq'ae, kaol ngael hhae loq'ae, noteel nyuq mael laoq qiqsheel'ae, kaol haoqtul deel ongl, fuqyin e xinlyangq gae'lye hhaellaelmyel aqha qiqgael tiq, 28 Kaol diqrenq e haguzaq mael'ae teel eiq maq gu'ae; yoqhhaeteel laoq myeyil hhei, noteel laoq hha deqjiul'ae lye zenlminq du hhei vae, xilmael laoq Momil ae'lye lael hhae. 29 Noteel'ae endianq hhamul hhei biq mael laoq, Jidu'ae hhae xiangxinl dyul maeqcil'ae, yoqhhaeq gae'lye eiq hhae shelkuq hhae. 30 Noteel'ae puqli biq e zonglgae mael laoq, laefuq noteel ngaeq e aeqhhaol taq'ae mol gol mael kaol yaeqmeel gaeq hhei mael qiqsheel'ae.