Jidu e neemae mael aeqyoyoq e neemae geiqzaq
2
Tyulkaol, noteel Jidu onglci'ae aeqchee neehongq bi hulm e za kaollaoq, aeqchee neegaeqgaeq e haeqnyuqsaeq lye gee mael za kaollaoq, aeqchee senllinq onglci'ae qiqgael zhol'eeq mael za kaollaoq, aeqchee meeq e neemae kaol hhaoqsaeqsaeq mael za kaollaoq, 2 Noteel laoq nyuqtongq deelhhei mael qiqsheel ngeel maoqhhae, neegaeqgaeq mael qiqsheel ngeel maoqhhae, qiqsheel e neemae'ae nyuqtongq deelhhei mael za, qiqsheel e nyuq mael za, xilnye laol, ngaeq e hhaol mael laoq bong'lye hha za wae. 3 Aeqchee silqinq mael taq vae eiq, aeqyoyoq vae maoq maeq nyuq myel maeq zongl hhaeq'ae, yilsi maqza myel maduq zhee bi za goq yae lye maeq zongl hhaeq'ae; neemae onglci'ae haeq dilqeizaeq, ochoq laoq aeqyoyoq taq'ae hhael henq'ae lye nyuq laol hhaeq vae. 4 Aeqsul eiq aeqyoyoq e silqinq mael oqlye haeq guanxinzaeq, ochoq e silqinq mael vae eiq bael guanxin biq maoqhhae.5 Noteel laoq Jidu haelnyuq haelzongl laoqmyel ngeel maoqhhae:
6 Yoqhhaeq aeqyoyoq laoq Momil laoqmyel qiqsheel'ae,
ngeelfeiq, aeqyoyoq laoq Momil laoqmyel qiqsheel ngeel maoqlye mael
maeq diqkoqzaeq'ae;
7 Daoldaolmyel yoqhhaeq xihael aqlaq pyeq nae'ae,
cholyaeq'ae lye fu'li'laol,
yoqhhaeq laoq yaqhacheqzaq e cholyaeq laoqmyel hhae,
cholyaeq qiq hhaeq peqlal kaol milcaeq taq'ae dyeqlal.
Cholyaeq peqlal vae laol,
8 Aeqyoyoq maeq dilqeizaeq,
saeziq naelhaeq mael sil myel'ae keelli aeqwae,
kaol shiqziljal taq'ae sil hhei.
9 Tyulkaol, Momil lye yoqhhaeq yaol hhaelgao gao'li
vae deiqqei da hhei biq,
kaol yoqhhaeq'ae halza cholmilhael taq'ae jyeqli e
cholmil biq hhei biq laol,
10 Mqmae taq'ae gilzuqmyel hael,
milcaeq taq'ae gilzuqmyel hael,
kaol milcaeq holhhaq'ae gilzuqmyel hael,
Yesu e cholmil gae'lye,
haelzhol cholyaeq e paqcheq mael eiq
bi tongqgae hhei maoqlye hhae,
11 Haelzhol cholyaeq e myeqbongq mael eiq
yotyel ha'lye xilnye gee maoqlye hhae:
Yesu Jidu laoq Hhaoqsongl'ae,
rongqyaol mael Aeqdae Momil'ae biq biq.
Noteel aeqcael cuqmol du hhei laoqmyel ngeel maoqhhae
12 Ngael gaeq hael o, xilnye fu hhei'laol, noteel laoq haeqfu eiq saeziq naelhaeq hhae, ngael noteel tyuqvae zhol fu eiq xilnye hhae, yaeqmeel ngael noteel tyuqvae maeq zhol fu nyeq'ei saeziq hhael naelhaeq laol, gu'ni'lye noteel aeqyoyoq e deqjiul e silqinq mael zonglbyel maoqhhae; 13 Momil noteel e neemae onglci'ae mulhhael mul, kaol noteel'ae zongl maoqlye bi nyuqmeeq kaol bi zongl yil mael laoq, yoqhhaeq e neezae'lael biq mael bi peqlal maoqlye kaol'ae. 14 Noteel aeqchee silqinq zongl haoq, haq buqzaq gil, haeq geegae gil, 15 Kaol noteel'ae qiqgiq geehhael maqza myel, kaol zaqgiq maqgiq kaol jaq eiq maq jaq myel bi ngeel, zhen'liq laoqmyel maeq zongl kaol saeziq maeq naelhaeq e shiqdail'ae, Momil e maeqmeeqmyel qiqgael'ae maqza e yaeqmiq yaqyo geiq. Noteel shiqdail xilmael taq'ae aeqcael mael cuqmol du hhei laoqmyel ngeel maoqhhae, 16 Kaol aeqyil e saeziq mael bi mol du'lal maoqhhae, xilnye laol, ngael laoq Jidu e naohaeq vae, ngael laoq alngeiqmyel ki maeqngeel yil, alngeiqmyel zongl maeqngeel yil lye hha hodazaq wae. 17 Ngaeq yaol noteel e xinlxin e zaelheel kaol fuqsil mael taq'ae xeiheel da hhei laq kaol'eiq hhaol yae, kaol noteel haelzhol cholyaeqhael nyegael qiqgael hhae hhaol. 18 Noteel eiq xilnye hhaol maoqhhae, kaol ngaeq nyegael qiqgael hhaol maoqhhae.
Tiqmoqtail kaol Yiqbafoqtiq
19 Ngael Hhaoqsongl Yesu onglci'ae lye, nae'naemyel Tiqmoqtail yaol moqheilheil du hheikaol noteel'ae bi mol yi maoqlye xiwangl lil, xilnye laol, ngael laoq noteel e silqinq mael hhae loq gae'lye neemae maeq nyuqsaeq kael wae. 20 Ngaeq'ae laoq ngaeq nyegael neemae qiqsiqmyel, aeqdilmyel noteel e silqinq mael guanxin e baeqjyelboq e cholyaeq maeq zhol laeq kaol'ae. 21 Baeqjyelboq e cholyaeqhael laoq aeqyoyoq e silqinq mael saelpozaeq maoqlaol, Yesu Jidu e silqinq mael'ae maeq saelpozaeq'ae. 22 Ngeelfeiq, noteel laoq Tiqmoqtail laoq shilfu biq mael zityeq ongl e cholyaeq'ae lye loq'ae, yoqhhaeq laoq ngaeq nyegael fuqyin gae'lye qiqgael bael fuqsil hhae, ngaeq vae yaqyo aeqdae'ae meeq biq laoqmyel meeq laeq hhae. 23 Tyulkaol, ngael laoq ngaeq e silqinq mael aeqnaol naolli'ae haelmillye peqlal hhae lye loq laol, ngael laoq yoqhhaeq yaol nae'naemyel moqheilheil du hhei maoqlye xiwangl lil, 24 Ngeelfeiq, ngael Hhaoqsongl'ae kaolzaeq kaol haeldyul maeqngeel laol ngael eiq hha yi'ae lye xiangxinl lil.
25 Ngeelfeiq, ngael aeqdilmyel Yiqbafoqtiq yaol noteel tyuqvae moqheilheil du hhei maoqlye nyuq lil. Yoqhhaeq laoq ngaeq e aqsseq aeqnil'ae, mulhhael qiqgael mul kaol dangbin qiqgael kei, noteel lye moqheilheil du hheikaol ngaeq'ae mulyo mael bi heil yi e qiq hhaeq ngeelvae. 26 Yoqhhaeq noteel haelzhol cholyaeqhael'ae zhee nyuqdu biq hhae, noteel yoqhhaeq nael biq hhae lye gaeq hhei biq kaol yoqhhaeq zhee nyuqsaeq biq hhae. 27 Yoqhhaeq aeqdilmyel nael biq hhae, sil li maoq myel nael peq biq aeqwae. Ngeelfeiq, Momil yoqhhaeq'ae hhaoqsaeqsaeq biq hhae, yoqhhaeq'ae hhaoqsaeqsaeq biq dyul maeqcil, aeqgael ngaeq'ae nyuqsaeq taq'ae hhael nyuqsaeq biq maeqhe lyekaol, ngaeq vae eiq hhaoqsaeqsaeq laeq'ae. 28 Tyulkaol, ngael nae'naemyel yoqhhaeq yaol noteel tyuqvae bi hoqyi maoq, xilnye laol, noteel laoq yoqhhaeq yaol zail hhae mol hhei gae'lye hhae hhaol'ae, kaol ngael eiq maeq hhael nyuqsaeq kael wae. 29 Kaol noteel Hhaoqsongl onglci'ae lye zhee hhaol gae'lael aeqmyel yoqhhaeq'ae sheeqcaq biq maoqhhae, kaol xilnye cholyaeq'ae zunjinl biq maoqhhae, 30 Yoqhhaeq Jidu e mulhhael mul gae'lye aeqyil za maqza lye maeq guanq wae, aeqpoqlaeqlye sil aeqwae, yoqhhaeq laoq noteel ngaeq'ae heil laeq mael taq'ae maeq heil lo hhei laq mael zongl lo hhei maoqlye zongl hhae.