Aeqdilmyel e gongyil
3
Xihael laoq ngael aeqnaol naolli'ae gee maoqlye saeziq'ae, ngaeq e aqsseq aeqnilhael, noteel Hhaoqsongl onglci'ae lye hhaol maoqhhae. Ngael saeziq xihael noteel'ae zail cu gil laqngeel siq, ngaeq'ae lye gee'li'laol maeq mulsaeq'ae, ngeelfeiq, noteel'ae lye gee'li'laol hhael meeqyo'lael kiq hhae.2 Noteel laoq aeqkeeq laoqmyel e cholyaeqhael'ae fu'qyedeelzaeq hhei maoqhhae, duqlaq myel zongl e cholyaeqhael'ae fu'qyedeelzaeq hhei maoqhhae, yiqzenlmyel yeqgae gui'liq zongl e cholyaeqhael'ae fu'qyedeelzaeq hhei maoqhhae. 3 Aeqdilmyel yeqgae gui'liq zongl gol e cholyaeq laoq ngaeteel kaollil, aedeeteel laoq, Momil e yohael maellye heel, Jidu Yesu gae'lye hodazaq, ruqtiq'ae maeq kaolzaeq e cholyaeq ngeelvae. 4 Qiqshiq laoq, ngael eiq ruqtiq'ae kaolzaeq hhaeq'ae; ochoq laoq ruqtiq'ae kaolzaeq hhaeq'ae lye kei kaollaoq, ngael nyeq'ei ruqtiq'ae hhael kaolzaeq hhaeq'ae. 5 Ngael dyeqlal e heiq nao laol yeqgae gui'liq zongl aeqwae; ngael laoq Yiqsellyel minqcuq lil, Bianlyaqminq zhipail e cholyaeq lil, Xiboqlaiq cholyaeq lye bo hhei e Xiboqlaiq cholyaeq lil. Lilfaq'ae lye gee'li'laol, ngael laoq Faqlilsail cholyaeq lil; 6 Laqheiqqyel'ae lye gee'li'laol, ngael laoq jiaolhuil'ae guaeq'ei diqqye e cholyaeq lil; lilfaq taq e gongyil'ae lye gee'li'laol, ngael laoq qiqgiq geehhael maqza e cholyaeq lil. 7 Ngael laefuq laoq ngaeq'ae meeqyo'lael kiq hhae lye kei laeq mael, ngael yaeqmeel Jidu gae'lye kui hhae lye nyuq lil. 8 Xilnye maeqcil, ngael gilzuqmyel silqinq mael kui laelkiq hhae lye nyuq lil, ngael laoq ngaeq e Hhaoqsongl Jidu Yesu yaol siqcongl mael laoq hhaelmeeq meeqli mael'ae lye fu kaollil. Ngael yoqhhaeq gae'lye gilzuqmyel silqinq mael beiqgae hheikaol aeqkiq'ae lye fu peq hhei mael laoq, Jidu yaol bi hhae'lael maoqlye lil, 9 Kaol yoqhhaeq onglci vae hhae zhol, aeqyoyoq'ae lilfaq gae'lye gongyil mael za'ae lye kaol maeqngeel'ae, Jidu'ae xiangxinl kaol gongyil mael za gae'lye hhae, gongyil e xilmael laoq, xinlxin gae'lye Momil ae'lye lael hhae, 10 Xilnye laol, ngael laoq Jidu kaol yoqhhaeq dyeqhoqlal e onglzaeq mael hhae siqcongl, kaol yoqhhaeq nyegael saeqlael saeqchoqbo, kaol yoqhhaeq sil laoqmyel bael sil, 11 Xilnye laol, ngael eiq cholsil onglci ae'lye hha dyeqhoqlal maeqhe.
Aelbol duqtul deelhhei myel vae hal ki ongl myel ki li
12 Xilmael laoq ngaeq'ae hhamul hhei laeq vae, qiqgiq geehhael maqza myel wae lye gee maeqngeel yil; ngael hael zonglkeel ongl myel zui'qiuq laol, Jidu Yesu ngaeq'ae bi mul laqngeel lye mael hhamul maeqhe. 13 Aqsseq aeqnilhael o, ngael laoq aeqyoyoq hhamul hhei yaevae lye kei maeqngeel yil; ngaeq'ae silqinq qiq mal maoq maqza'ae, silqinq xilmael laoq, aeqnaolboq mael yelbael hhei, laefuqboq mael'ae hael zonglkeel ongl myel zongl, 14 Kaol aelbol duqtul deelhhei myel vae hal ki ongl myel ki li, kaol Momil lye Jidu Yesu onglci'ae lye aqtaq vae lye ngaeq'ae gul du hhei laq e hhamul e jiangqshangq mael mul maoqlye lil. 15 Tyulkaol, aedeeteel onglci'ae neemae heeqlo'lal e cholyaeqhael, haeqfu eiq xilnye nyuq mael za maoqhhae; aeqchee silqinq mael taq'ae baeqjyelboq e nyuq mael za kaollaoq, Momil eiq silqinq xilmael noteel'ae tyuqmyeq laeq'ae. 16 Aedeeteel haelmillye dilbul vae keel laol, haelmillye dilbul'ae zongl maoq laoqmyel zongl maoqhhae.
17 Aqsseq aeqnilhael, noteel hhaellaelmyel ngael zongl laoqmyel bael zongl maoqhhae, ngaeteel zongl laoqmyel bael zongl e cholyaeq tyuhael vae eiq haelmeeqlye chifu maoqhhae. 18 Ngael noteel'ae hae'nae pu myel geegaeq biq, yaeqmeel ma'eel yul gae'lael aeqmyel noteel'ae yol geegaeq laeqngeel: Haelnaeqmyel cholyaeq silqinq zongl mael laoq, Jidu e shiqziljal e diqrenq peqyil vae. 19 Yoqhhaeteel e jyeqjuq laoq hhae sil ngeelvae. Yoqhhaeteel e momilhael laoq aeqyoyoq e oqma ngeelvae; yoqhhaeteel laoq aeqyoyoq e maduq maqza myel zonglpeq biq mael rongqyaol geiq za, duqlye milcaeq taq e silqinq mael oqlye nyuq hhae. 20 Ngeelfeiq, aedeeteel laoq mqmae taq e Goqja e cholyaeq'ae, kaol laqheiqqyel lye jiulzuq vae doq deelhhei, jiulzuq laoq, Hhaoqsongl Yesu Jidu ngeelvae, yoqhhaeq laoq mqmae ae'lye gaeyi hhae. 21 Yoqhhaeq laoq halza haelzholhael aeqyoyoq e saeziq mael bi naelhaeq e onglzaeq maellye, aedeeteel e qiqgiq boq'ae maeqyo e aeqhhaol e yanglziq mael zonglpael laeq, kaol aeqyoyoq e rongqyaol e aeqhhaol mael nyedullye qiqsheel bi ngeel laeq'ae.