Ge'loqxi Su
Meeqlaeqmaeq lye naelhaeq mael
1
Momil e zhiqyil laoqmyel Jidu Yesu e shiqtuq geiq e Baoqloq, kaol aedeeteel e aqsseq aeqnil Tiqmoqtail laoq, 2 Ge'loqxi e senltuqhael'ae xinl cuq biq; yoqhhaeteel laoq Jidu onglci'ae zhol e neemae xyelpu maqpu e aqsseq aeqnilhael ngeelvae. Enhuil kaol neesaelhhae mael aedeeteel e Aeqdae Momil ae'lye noteel'ae yo'li biq lye nyuqlil!Senltuq gae'lye Momil'ae meeqyaevae lye gee biq
3 Ngaeteel noteel'ae heeldoq bael gee biq fu, duqlye aedeeteel e Hhaoqsongl Yesu Jidu e Aeqdae Momil'ae meeqyaevae lye gee biq mael laoq, 4 Ngaeteel'ae noteel Jidu Yesu onglci'ae xinlxin za mael, kaol haelzhol senltuq'ae neegaeqgaeq biq mael gaeq hhei laeq kaol'ae. 5 Xilmael gilzuqmyel noteel'ae mqmae vae taeq deelhhei biq e panlwangl mael gae'lye hhae, panlwangl xilmael laoq, noteel yilkaefu hael gaeq e zhen'liq e saeziq mael ngeelvae, zhen'liq e saeziq mael laoq fuqyin ngeelvae; 6 Noteel fuqyin mael gaeq hheikaol Momil e enhuil mael aeqdilmyel loq hhei biq e naohaeq'ae lye mael yaeqnao'ae keellye, noteel onglci'ae peqlal e silqinq laoqmyel, fuqyin xilmael noteel e tyuqvae bi geegaeq keelyil, kaol milcaeq taq'ae haeqvae lael'ee myel bi geegaeq keelyil vae, aelbol mael maqqyemyel heeqda lal, kaol nyeq'ei ta nyeq'ei aelsiq siq du hhei laoqmyel hhae. 7 Fuqyin xilmael laoq, noteel laoq ngaeteel gaeq biq e ngaeteel nyegael hhaellaelmyel yaqhacheqzaq e cholyaeq geiq e Yiqbafuq ae'lye xoqdozaq hhei hhae. Yoqhhaeq aedeeteel nyegael Jidu e neemae xyelpu maqpu e yaqhacheqzaq e cholyaeq bal geiq vae, 8 Kaol yoqhhaeq lye noteel senllinq onglci e gaeq mael eiq ngaeteel'ae geegaeq hhei laeq vae.
Jidu kaol yoqhhaeq e mulhhael mael
9 Tyulkaol, ngaeteel'ae gaeq hhei laeq e naohaeq ae'lye aeqnaol laoq maqqyemyel noteel'ae heeldoq bael gee biq kaol geezaeq biq lil, kaol noteel'ae gilzuqmyel senllinq e geel mael kaol loq kiq mael bong'lye za laol, Momil e zhiqyil mael aeqdilmyel loq biq lye nyuqlil, 10 Xilnye laol, noteel haelzongl e silqinq mael taq'ae Hhaoqsongl'ae duilqiq ongl, aeqchee silqinq taq vae eiq yoqhhaeq'ae bi hhaol, kaol gilzuqmyel meeq e silqinq taq'ae aelsiq siq du hhei, kaol Momil'ae siqcongl mael nyeq'ei ta nyeq'ei hhael naeqlael. 11 Kaol noteel'ae yoqhhaeq e rongqyaol e onglzaeq onglci ae'lye, gilzuqmyel silqinq taq'ae aqha hhael bo taq'ae hhael bo lael biq lye nyuqlil, xilnye laol noteel aeqchee silqinq taq vae eiq hhaol gae'lael aeqmyel renqnail kaol baorongq wae, 12 Aeqdae Momil'ae meeqyaevae lye yol gee biq lil, yoqhhaeq noteel'ae senltuqhael nyegael aeqcael onglci vae zaeqdye halngeiq bal mul mael bi zae laeq'ae. 13 Yoqhhaeq lye aedeeteel yaol nahongqlye e laqtaq onglci ae'lye jiul duyi laq, kaol yoqhhaeq gaeq e Yaqyo e goqja vae hhaoqpol bi pol do'li laq. 14 Yoqhhaeq gaeq e Yaqyo ae'lye, aedeeteel yaol jiulsuq laeq, kaol golsiq mael shelmianq laeq.
15 Yaqyo laoq maeq mol laelkiq e
Momil tyutaeq e yanglziq'ae,
yoqhhaeq laoq fuqbo hhei e qiq hhaeq'ae,
kaol gilzuqmyel zongldu hhei biq hael e laefuq ae'lye zhol wae.
16 Halza haelzholhael laoq gilzuqmyel
yoqhhaeq ae'lye zongldu hhei hhae,
mqmae taq'ae hael haoq,
milcaeq taq'ae hael haoq,
mol laelkiq hael haoq,
maeq mol laelkiq hael haoq,
paelsilmyel zongmae zholhhael'ae zhol hael haoq,
guanqliq hael haoq, paelsilmyel zhiqmoqzaeq hael haoq,
laqtaq za hael haoq,
gilzuqmyel yoqhhaeq ae'lye zongldu hhei hhae,
kaol yoqhhaeq'ae zongldu hhei biq hhae.
17 Yoqhhaeq laoq halza haelzholhael
maeq zongldu hhei laefuq ae'lye zhol hhae;
halza haelzholhael laoq yoqhhaeq ae'lye za hhae.
18 Yoqhhaeq laoq jiaolhuil e vuqduq'ae,
jiaolhuil laoq yoqhhaeq e aeqhhaol'ae;
halza haelzholhael laoq yoqhhaeq ae'lye lael hhae,
yoqhhaeq laoq cholsil onglci ae'lye
laefuq fuqli dyeqhoqlal e fuqbo yaqyo'ae,
xilnye laol,
yoqhhaeq halza haelzholhael taq'ae hhael jyeqli aeqwae.
19 Momil laoq gilzuqmyel duqgongqgongqlye mael
yoqhhaeq onglci vae bi zhol mael hhaol biq'ae,
20 Kaol yoqhhaeq ae'lye, Momil laoq halza haelzholhael
aeqyoyoq nyegael bi maoqhoqlael,
milcaeq taq'ae hael haoq,
mqmae taq'ae hael haoq,
yoqhhaeq shiqziljal taq'ae yul e siq ae'lye hoqpinq bi peqlal vae.
21 Yilkaefu laoq noteel Momil nyegael geqtael hhae, neemae nyuq mael taq'ae yoqhhaeq nyegael diqrenq geiq, kaol xinqweiq mael laoq duqlaq hhae; 22 Ngeelfeiq, yaeqmeel yoqhhaeq laoq yoqhhaeq e yaqyo e ruqtiq mael sil hhei ae'lye, noteel yaol aeqyoyoq nyegael bi maoqhoqli laeq vae, kaol noteel yaol yoqhhaeq e yiqsi'ae heelda hhei, kaol senljyeq, maeqmeeqmyel qiqgael eiq maqza, qiqgiq geehhael maqza myel bi peqlal vae. 23 Noteel xinlyangq xilmael xinl gaeyil maoqhhae, congqciq paeqhhael mael sseetae'lye aqni maqni myel laoqmyel ngeel maoqhhae, kaol yilkaefu noteel gaeq hhei e fuqyin e panlwangl mael'ae deelsae maoqlye haeq zongl; fuqyin xilmael laoq mqmae holhhaq'ae gilzuqmyel zongldu hhei biq hael vae eiq geegaeq hhei biq aeqwae, ngael Baoqloq laoq fuqyin xilmael e yaqhacheqzaq e cholyaeq geiq aeqwae.
Baoqloq jiaolhuil gae'lye mulhhael mul mael
24 Yaeqmeel ngael noteel gae'lye shelkuq feiq, zhee hhaol yae; kaol Jidu e aeqhhaol gae'lye, ngael laoq ngaeq e ruqtiq taq'ae Jidu shelkuq gol e maq lo mael zonglbyel maoq, Jidu e aeqhhaol laoq jiaolhuil ngeelvae. 25 Ngael laoq Momil noteel gae'lye ngaeq'ae biq hhei laq e mulhhael maellye jiaolhuil e yaqhacheqzaq e cholyaeq geiq aeqwae, kaol Momil e saeziq mael leza'lye geegaeq du byel yil maoq; 26 Saeziq xilmael laoq hae yiq gol shiqdail vae eiq zonglhhaq deelhhei biq e aolmiq mael ngeelvae, ngeelfeiq, yaeqmeel laoq yoqhhaeq e senltuqhael'ae bi mol hhei aeqwae. 27 Momil laoq yoqhhaeteel'ae bi loq maoqlye hhae, aolmiq xilmael baeqjyelboq minqcuq e cholyaeqhael onglci vae duqgongqgongqlye e rongqyaol mael za hhae; aolmiq xilmael laoq, Jidu noteel e neemae onglci vae rongqyaol hhamul e panlwangl peqlal mael ngeelvae. 28 Ngaeteel yoqhhaeq yaol geegaeq duyil mael laoq, maeq qiqsheel e geel maellye hhae, kaol haetaeq vae eiq haelmeeqlye gee biq, haetaeq vae eiq geemyeq biq mael laoq, haetaeq yaol eiq Jidu onglci vae qiqgiq geehhael maqza myel bi heelda hhei maoqlye hhae. 29 Ngael eiq xilmael gae'lye duqhee'lye mulhhael mul lil, kaol yoqhhaeq ngaeq e onglci vae mulhhael mul e onglzaeq mael laoqmyel hael zonglkeel ongl myel zongl lil.