Tyeqsa'loqniqja Qianqsu
Meeqlaeqmaeq lye naelhaeq mael
1
Baoqloq, Xi'la kaol Tiqmoqtail laoq Aeqdae Momil kaol Hhaoqsongl Yesu Jidu onglci'ae zhol e Tyeqsa'loqniqja milcaeq e jiaolhuil'ae xinl cu biq. Enhuil kaol neesaelhhae mael noteel'ae yo'li biq lye nyuqlil!Xinlxin kaol zonglmyeq du hhei gil biq mael
2 Ngaeteel laoq noteel haelzhol cholyaeq gae'lye Momil'ae duqlye meeqyaevae lye gee biq lil, heeldoq gee fu noteel'ae heeldoq bael gee lil. 3 Noteel e xinlxin gae'lye mulhhael mul, neegaeqgaeq gae'lye duqhee'lye mul, kaol aedeeteel e Hhaoqsongl Yesu Jidu'ae panlwangl deelzaeq hhei gae'lye xinlxin zhee za laol, ngaeteel laoq aedeeteel e Aeqdae Momil e yiqsi ae'lye meeqyaevae lye gee biq lil.
4 Momil gaeq e aqsseq aeqnilhael o, ngael laoq Momil lye noteel yaol saelpodu hhei biq hhae lye loq lil; 5 Ngaeteel e fuqyin mael noteel tyuqvae geegaeq keelyil mael laoq, saeziq mael lye dyul maeqcil'ae, onglzaeq mael, senllinq mael kaol bong'lye e xinlxin maellye hhae. Noteel laoq ngaeteel noteel tyuqvae zhol fu, noteel gae'lye haelmillye zongl hhae lye loq'ae. 6 Noteel laoq senllinq lye biq biq e hhaol mael gae'lye saeqlael laelmae onglci'ae zhen'liq mael jyeqshel hhei'laol, ngaeteel kaol Hhaoqsongl zongl laoqmyel bael zongl gil'ae, 7 Tyulkaol, noteel laoq Maqqiqdunl, kaol Yalgaiyal vae haelzhol e senltuqhael vae, zonglmyeq du hhei gil biq e cholyaeq geiq vae. 8 Hhaoqsongl e saeziq mael noteel tyuqvae lye geegaeq duyil vae, noteel Momil'ae xinlxin za mael, Maqqiqdunl kaol Yalgaiyal vae geegaeq duyil dyul maeqcilmyel, haeqvae lael'ee myel milcaeq vae eiq geegaeq duyil vae, tyulkaol, ngaeteel qiqgiq saeziq maeq gee kael vae. 9 Yoqhhaeteel aeqyoyoq laoq, noteel ngaeteel'ae haelmillye sheeqcaq laq, cholyaeq lye zongldu hhei e momilhael haelmillye beiqgae hhei'laol, Momil boq'ae pollael kaol aeqdilmyel zhol e dyeqdeel e Momil'ae fuqsil lael, 10 Kaol yoqhhaeq e Yaqyo yaol mqmae ae'lye gaeyi biq lye doq deelhhei e silqinq mael geegaeq duyil vae; Yaqyo tyutaeq laoq, Momil lye yoqhhaeq yaol cholsil onglci ae'lye bi dyeqhoqlal, kaol aedeeteel yaol aeqgael faqhoqkei myel vae lye jiul duyi laq e Yesu ngeelvae.