4
Noteel hhaoqsongl geiq hael o, yaqhacheqzaq e cholyaeq'ae neemae qiqboq'ae eiq maeq pol myel za biq maoqhhae, noteel laoq noteel vae eiq mqmae vae Hhaoqsongl qiq hhaeq zhol'ae lye loq kaol'ae.Haelmeeqlye geemyeq mael
2 Noteel maqqyemyel heeldoq gee maoqhhae, kaol heeldoq gee fu, meeqyaevae lye za maoqhhae kaol yuqnyuqgeel maoqhhae. 3 Noteel heeldoq gee fu, ngaeteel vae eiq heeldoq bael gee laeq, Momil'ae ngaeteel vae Momil e saeziq mael geegaeq duyil e oheiq pong hhei laeq, kaol Jidu e aolmiq mael bi geegaeq duyil lye bael geezaeq biq, 4 Xilnye laol, ngael hael gee maoq e saeziq laoqmyel aolmiq mael yotyel ha'lye geedu hhei, ngaeq yaol kaltoq laq mael laoq silqinq xilmael gae'lye hhae. 5 Noteel jihuil za fu nae'nae kei maoqhhae, kaol geel maellye baeqjyelboq e cholyaeq nyegael yilyil laellael mul maoqhhae. 6 Noteel e saeziq mael haeqfu eiq naoqyae'lye, caqdeq heil myel zaeq laoqmyel ngeel maoqhhae, xilnye laol noteel laoq aeqsul qiq hhaeq'ae laoq haelmillye geehoq biq maoqlye loq wae.
Meeqlaeqmaeq lye naelhaeq mael
7 Tuijiguq laoq ngael gaeq e aqsseq aeqnil'ae, neemae xyelpu maqpu e yaqhacheqzaq e cholyaeq'ae, ngaeq nyegael Hhaoqsongl e yaqhacheqzaq e cholyaeq qiqgael geiq hhae; yoqhhaeq ngaeq e gilzuqmyel silqinqhael noteel'ae geegaeq laeqngeel lye hhae. 8 Ngael baelyaelmyel yoqhhaeq yaol noteel tyuqvae yil lye moqheilheil du hhei mael laoq, noteel'ae ngaeteel e qinqkuangl mael bi loq, kaol yoqhhaeq yaol noteel e neemae mael'ae haeq nyuqsaeq lye bi gee maoqlye lil. 9 Ngaeq lye ngael gaeq e neemae xyelpu maqpu e aqsseq aeqnil Ou'niqximuq yaol qiqgael bal yil lye moqheil yol heil du hhei lil; yoqhhaeq eiq noteel tyuqvae e cholyaeq'ae. Yoqhhaeteel laoq noteel'ae saeqvae e gilzuqmyel silqinqhael geegaeq hhei laeqngeel lye hhae.
10 Ngaeq nyegael laoqgaiq qiqgael bael kei gol e Yalliqdaqguq noteel'ae meeqlaeqmaeq lye naelhaeq hhae. Ba'naqba e biaoqdil Maqkeq eiq noteel'ae meeqlaeqmaeq lye naelhaeq hhae. Maqkeq'ae gee keelli laol, ngael noteel'ae moqheilheil gol biq aeqwae; yoqhhaeq noteel tyuqvae keelyi kaollaoq, noteel yoqhhaeq'ae sheeqcaq biq maoqhhae. 11 Yoqshildu lye gul biq e Yesul eiq noteel'ae meeqlaeqmaeq lye naelhaeq hhae. Yeqgae gui'liq zongl gol e cholyaeqhael onglci'ae, Momil e goqja gae'lye ngaeq nyegael mulhhael qiqgael mul, kaol ngaeq e neemae mael'ae haeq nyuqsaeq lye gee laeq mael laoq xi qiqniq nulhhaeq wae. 12 Noteel e tyuqvae e cholyaeq qiq hhaeq, Yesu Jidu e yaqhacheqzaq e cholyaeq geiq e Yiqbafuq noteel'ae meeqlaeqmaeq lye naelhaeq hhae. Yoqhhaeq heeldoq gee fu duqlye noteel gae'lye hael geezaeq keel ongl myel geezaeq hhae, yoqhhaeq laoq noteel haoqtul deel ongl, kaol neemae heeqlo'lal biq, kaol Momil e gilzuqmyel zhiqyil mael'ae aeqdilmyel xiangxinl biq lye nyuq biq hhae. 13 Yoqhhaeq laoq noteel kaol Laoqdiqja, kaol Xi'lapo'liq e aqsseq aeqnilhael gae'lye duqhee'lye mulhhael zhee mul hhae, xilmael laoq ngael yoqhhaeq'ae bal zoqzenl peq lil. 14 Ngael gaeq e cholnael zonglmeeq e cholyaeq Lulja kaol Diqmaq laoq noteel'ae meeqlaeqmaeq lye naelhaeq hhae. 15 Laoqdiqja e aqsseq aeqnilhael'ae, Ninqfaq'ae kaol yoqhhae toq e jiaolhuil e cholyaeqhael'ae meeqlaeqmaeq lye bael naelhaeq hhei biq. 16 Xinl xilmael noteel duq hhei'laol, Laoqdiqja e jiaolhuil'ae duq lye heilmoq hhei biq maoqhhae; noteel Laoqdiqja ae'lye heil laeq e xinl mael eiq duq maoqhhae. 17 Noteel Yaljibul'ae xilnye gee biq maoqhhae: "Nol laoq Hhaoqsongl ae'lye hhae'lael e mulhhael mael neemae'ae haelmeeqlye nyuqtongq deelhhei maoqhhae, kaol mulhhael mael mul byel hhei."
18 Baoqloq ngaeq lye zil cu hheikaol noteel'ae meeqlaeqmaeq lye naelhaeq lil. Noteel ngaeq yaol laoq kaltoq biq wae siq lye nyuqdeel laeq maoqhhae. Enhuil mael noteel nyegael qiqgael baelzhol biq lye nyuqlil.