3
Tyulkaol, noteel Jidu nyegael qiqgael dyeqhoqlal vae laol, altaq e silqinq mael'ae saelpozaeq maoqhhae; tyuqvae laoq Jidu zhol'ae, yoqhhaeq Momil e laqsseq boq'ae zhol deelhhei hhae. 2 Noteel altaq e silqinq mael haelmeeqlye nyuq maoqhhae, milcaeq taq e silqinq mael'ae haeq nyuq. 3 Noteel laoq sil aeqwae, kaol noteel e aeqyil mael Jidu nyegael Momil onglci vae qiqgael zonglhhaq deelhhei kaol'ae. 4 Jidu laoq noteel e aeqyil'ae, kaol yoqhhaeq mol du'lal fu, noteel eiq yoqhhaeq nyegael rongqyaol onglci vae qiqgael mol du'lal maoqlye hhae.5 Tyulkaol, noteel e milcaeq taq'ae hhae lye e zhitiq mael zonglsil maoqhhae; xihael laoqmyel: Ochoq nyegael neemaeba, xinqlalmyel zongl, ruqtiq'ae zhee mulgoq yae lye tyulmael, duqlaqmyel nyuq kaol neemaecuqm, neemaecuqm mael laoq cholyaeq lye zongl du hhei e momilhael'ae baqheel mael ngeelvae. 6 Silqinq xihael gae'lye, Momil e faqhoqkei mael laoq saeziq maeq naelhaeq e cholyaeq tyuhael'ae yo'li biq maoqlye hhae. 7 Noteel silqinq xihael onglci vae dyeqdeel fu, laefuq noteel e xinqweiq mael eiq xilnye hhae. 8 Ngeelfeiq, yaeqmeel noteel silqinq xihael gilzuqmyel beiqgae maoqhhae, beiqgae maoq e silqinqhael laoq, neemasu zaq mael, faqhoqkei mael, duqlaq mael, geekyuq mael kaol myeqbongq onglci'ae maeqshol e saeziq mael ngeelvae. 9 Noteel qiqhhaeq qiqhhaeq'ae zaqgiq haq giq gil, noteel cholgeil yaol kaol cholgeil e xinqweiq mael heiga vae kaol'ae, 10 Kaol cholsheq yaol dumda hhei, cholsheq laoq yoqhhaeq yaol zongldu hhei biq e Hhaoqsongl nyedullye qiqsheel laoqmyel zhishiq taq'ae maqqyemyel yosheqsheq lal maoqhhae. 11 Silqinq xihael taq'ae Xi'lal cholyaeq, Yoqtail cholyaeq, yeqgae gui'liq zongl e cholyaeq, yeqgae gui'liq maeq zongl e cholyaeq, suqhhaq maeq loq e cholyaeq, Xiguqtiq cholyaeq, hhaeq'ongq ongqzaeq e cholyaeq kaol zilyoq e cholyaeq lye maeq zonglqyel'ae; Jidu laoq gilzuqmyel hael ngeelvae, kaol gilzuqmyel hael onglci vae zhol mael laoq yoqhhaeq dyul wae.
12 Tyulkaol, noteel laoq Momil lye saelpodu hhei e cholyaeq'ae, senljyeq kaol gaeq mael hhamul e cholyaeq'ae, kaol hhaoqsaeqsaeq kiq mael, ochoq'ae meeq biq mael, maeq dilqeizaeq mael, naoqyae'lye mael kaol renqnail mael dumda hhei maoqhhae. 13 Xitaeq kaol yultaeq qiqhhaeq qiqhhaeq'ae buqzaq kaollaoq, duqlye qiqhhaeq qiqhhaeq'ae baorongq, qiqhhaeq qiqhhaeq'ae yuanqliangl maoqhhae; Hhaoqsongl noteel'ae haelmillye yuanqliangl laeq laol, noteel eiq ochoq'ae haelmillye yuanqliangl biq maoqhhae. 14 Xihael dyul maeqcil, neegaeqgaeq mael dumda hhei maoq wae siq, gaeq maellye gilzuqmyel eecaq hheikaol qiqgiq geehhael maqza myel dilbul'ae keel vae kaol'ae. 15 Noteel Jidu lye biq e hoqpinq mael noteel e neemae onglci vae bi guanq maoqhhae, noteel yaol gul du hhei biq kaol aeqhhaol qiq siq laoqmyel bi peqlal mael eiq xilmael gae'lye hhae. Noteel meeqyaevae lye e neemae za maoq wae siq. 16 Noteel Jidu e saeziq mael duqgongqgongqlye neemae onglci vae bi zoq maoqhhae, kaol maeq qiqsheel e geel maellye qiqhhaeq qiqhhaeq'ae geemyeq, kaol qiqhhaeq qiqhhaeq'ae jinqgaol, kaol shipian, laqma deiqqei biq e shigo, kaol yohael hhae lye e shigo maellye meeqyaevae lye e neemae lye Momil'ae changlgo changl biq maoqhhae. 17 Noteel aeqchee zongl haoq, saeziq gee mael taq'ae haoq, paelsilmyel silqinq zongl mael taq'ae haoq, gilzuqmyel Hhaoqsongl Yesu e cholmil maellye zongl maoqhhae, kaol yoqhhaeq ae'lye Aeqdae Momil vae meeqyaevae lye gee biq.
Ssuqhaoq haoqsheq caqzaq
18 Noteel haeqmiq geiq hael o, aeqyoyoq e haqyo e saeziq mael naelhaeq maoqhhae, xilmael Hhaoqsongl onglci'ae laoq hoqshil hhae. 19 Noteel haqyo geiq hael o, noteel e haeqmiq'ae gaeq biq maoqhhae, yoqhhaeteel'ae maeq hhae zonglkyuq biq'ae.
20 Noteel yaeqguq geiq hael o, aeqchee silqinq mael taq vae eiq aeqdae aeqmae e saeziq mael naelhaeq maoqhhae, xilmael laoq Hhaoqsongl hhaol biq kaol'ae. 21 Noteel aeqdae geiq hael o, yaeqguq'ae haeq haehol biq, aeqgael yoqhhaeteel maeq zongl gaeyil ongl yaevae lye kei li biq maeqhe.
22 Noteel yaqhacheqzaq e cholyaeq geiq hael o, aeqchee silqinq mael taq vae eiq noteel e ruqtiq e hhaoqsongl e saeziq mael naelhaeq maoqhhae, cholyaeq'ae bi hhaol maoqlyekaol cholyaeq e ma'ne yiqsi'ae oqlye haeq fuqsil, duqlye zaqgiq maqgiq e neemae za maoqhhae, noteel laoq Hhaoqsongl'ae zun eiq zunjinl gu eiq gu kaol'ae. 23 Noteel aeqchee zongl haoq, gilzuqmyel neemae onglci ae'lye zongl maoqhhae, Hhaoqsongl gae'lye zongl laoqmyel ngeel maoqhhae, cholyaeq gae'lye zongl laoqmyel haeq ngeel; 24 Noteel laoq aeqgael noteel'ae Hhaoqsongl tyuqvae lye lael e zaeqdye halngeiq hhamul kaol shangqcil hha geiqzaq'ae lye loq kaol'ae. Noteel fuqsil maoq mael laoq Hhaoqsongl Jidu'ae. 25 Maeqmeeqmyel zongl e cholyaeq vae laoq maeqmeeqmyel bi zonglhoq hhei ngeelvae; Hhaoqsongl laoq cholyaeq'ae qiqboq eiq maeq polzaeq'ae.