2
Ngael laoq noteel kaol Laoqdiqja cholyaeq kaol ngaeq nyegael maduq maeq mol gol e cholyaeqhael gae'lye, haelmillye hael zonglkeel ongl myel zongl hhae lye xihael noteel'ae bi loq goq yae; 2 Xilnye zongl mael laoq, yoqhhaeteel e neemae mael'ae neehongq bi hulm, kaol neegaeqgaeq gae'lye hhaellaelmyel yilyil laellael mul maoqhhae, kaol aeqdilmyel loq kiq onglci ae'lye hal du'lal e duqgongqgongqlye mael za, xilnye laol, Momil e aolmiq mael aeqdilmyel hhae loq, aolmiq xilmael laoq Jidu ngeelvae; 3 Yoqhhaeq onglci vae gilzuqmyel geel mael kaol zhishiq mael zonglhhaq deelhhei hhae. 4 Ngael saeziq xilmael gee mael laoq, aeqgael qiqhhaeq laelhhaeq lye naelhaeqsael lael aeqmyel geesilzaeq ongl e saeziq maellye noteel yaol zaqgiq bi giq hhei maeqhe lye kaollil. 5 Ngaeq e aeqhhaol laoq noteel nyegael maeq baelzhol feiq, neemae laoq noteel nyegael baelzhol lil, ngael laoq noteel guigui juqjuq myel zongl, Jidu'ae za biq e xinlxin eiq sseetae'lye she lye mol hhei laeq laol, zhee hhaol yae.Jidu onglci e duqgongqgongqlye mael
6 Noteel laoq Jidu Yesu yaol jyeqshel kaol Hhaoqsongl bi geiq vae laol, Jidu'ae kaolzaeq kaol haelmeeqlye zonglzhol maoqhhae, 7 Kaol noteel naelhaeq dozaq hhei e geemyeq mael laoqmyel, yoqhhaeq e onglci'ae aelcil sseeyil kaol zongltul hhei, kaol xinlxin sseetae'lye za, kaol meeqyaevae lye e neemae mael bong'lye za. 8 Noteel aeqyae'lye kei maoqhhae, aeqgael qiqhhaeq laelhhaeq lye yoqhhaeq e zheqxoq kaol yilsi maqza e saeziq maellye, kaol Jidu ae'lye lael laoqmyel maeqngeel myel, cholyaeqhael onglci ae'lye lael e beideelhhei mael kaol milcaeq taq e jibenq yo'liq laoqmyel, noteel yaol eezaeq yil laeqngeel. 9 Momil aeqyoyoq'ae za e gilzuqmyel duqgongqgongqlye mael, yanglziq za aeqhhaol eiq za aeqmyel Jidu onglci vae zhol kaol'ae. 10 Noteel yoqhhaeq onglci vae duqgongqgongqlye za aeqmyel peqlal aeqwae. Yoqhhaeq laoq laqtaq za e zhiqmoqhael e hhaelheeq heeqli qiq hhaeq'ae. 11 Noteel eiq yoqhhaeq onglci vae yeqgae gui'liq zongl mael laoq, cholyaeq e aqlaq maellye zongl maeqngeel, ruqtiq vae saqdol lal aeqmyel mulgoq tyulmael bi heilgae hhei e Jidu e yeqgae gui'liq maellye hhae. 12 Noteel ciq e gui'liq onglci'ae lye yoqhhaeq nyegael qiqgael bi baqduqm hhei vae, ciq e gui'liq onglci vae, Jidu yaol cholsil onglci ae'lye bi dyeqhoqlal e Momil haelzongl e silqinq mael'ae xiangxinl gae'lye yoqhhaeq nyegael qiqgael bal dyeqhoqlal. 13 Yilkaefu noteel laoq zonglzhil kaol yeqgae gui'liq maeq zongl e ruqtiq onglci'ae lye sil aeqwae, ngeelfeiq, Momil lye aedeeteel e gilzuqmyel zonglzhil mael shelmianq vae, kaol noteel yaol Jidu nyegael qiqgael bi dyeqhoqlal, 14 Kaol tiaoqlil taq'ae hal cuda hhei mael hega hhei, kaol aedeeteel'ae diqqye laq kaol zongltyeq laeq e cu deelhhei e zenljul mael heil yil kaol shiqziljal taq'ae diqcheeq da biq vae. 15 Yoqhhaeq shiqziljal maellye haelzhol e zhiqmoqzaeq hael kaol laqtaq za hael yaol yinqzaeq biq vae, kaol yoqhhaeteel e laqtaq mael heilgae biq vae, kaol yinqzaeq aeqwae lye deelfuzaeq gil onglci'ae lye yoqhhaeteel yaol cholyaeqhael yiqsi ae'lye cholyaeqhael'ae bi fu hhei.
16 Tyulkaol, cholyaeq qiq hhaeq lye eiq noteel'ae zaeq dol taq'ae, paelsilmyel zaeqnao, cuyiq, anxiqriq e silqinq xihael taq'ae haeq bi panlduanl hhei. 17 Xihael laoq naeshoq aeqnao e silqinq e aelbillaelbael dyul wae, ngeelfeiq, silqinq aeqyoyoq laoq Jidu hhae lye hhae. 18 Cholyaeq lye baelyaelmyel maeq dilqeizaeq yil lye zongl mael, kaol mqmae yosongl'ae heel biq ae'lye, noteel e jiangqshangq mael haeq bi diqkoqzaeq yil. Cholyaeq xihael laoq yoqhhaeteel mol gol mael'ae gaesil, kaol qiqgiq'ae lye maqza myel aeqyoyoq e ruqtiq'ae zhee mulgoq maellye, zhee henq lil lye dilqeizaeq hhae, 19 Kaol hhaelheeq heeqli qiq hhaeq'ae niqza'lye maeq cho'lyeq'ae; qiqshiq laoq, tyutaeq gae'lye aeqhhaol qiq siq laoq saeq'yuq yuqcheq kaol saeqguq ae'lye bi yanq li, kaol hhaellaelmyel eecaq hhei hhae, kaol Momil biq e heeqda'lal maellye heeqda'lal hhae.
Jidu onglci'ae paellael e zonglzhol mael
20-21 Noteel Jidu nyegael qiqgael sil hheikaol shilgail taq e jibenq yo'liq mael'ae taelyil vae laol, aeqcheekaol shilgail taq e beideelhhei maellye zonglzhol siq laoqmyel, "Maq hha pa'ae, maeq hhae zaeqfufu'ae kaol maq hha so'ae" lye tiaoqlil mael'ae fuqcongq yil lilmaeq? 22 Xihael laoq gilzuqmyel cholyaeq e minllinl mael kaol geemyeq maellye lael hhae, xihael'ae gee keelli laol, zhoq mul laol ba byel yil vae. 23 Tiaoqlil xihael laoq cholyaeq'ae geel'ae lye alngeiqmyel miqyil bi za, kaol aeqyoyoq e yilsi maellye heel, aeqyoyoq maeq dilqeizaeq yil lye zongl, kaol aeqyoyoq e aeqhhaol'ae zonglkyuqzaeq hoq hhae, qiqshiq laoq, ruqtiq e saqdol lal aeqmyel mulgoq tyulmael'ae zongltyeqzaeq mael taq'ae qiqgiq zoqyongl maeq qiq'ae.