Tyeqsa'loqniqja Houlsu
Meeqlaeqmaeq lye naelhaeq mael
1
Baoqloq, Xi'la kaol Tiqmoqtail laoq Tyeqsa'loqniqja milcaeq e, aedeeteel e Aeqdae Momil kaol Hhaoqsongl Yesu Jidu onglci e jiaolhuil'ae xinl cu biq. 2 Enhuil mael, kaol neesaelhhae mael aedeeteel e Aeqdae Momil kaol Hhaoqsongl Yesu Jidu ae'lye noteel'ae yo'li biq lye nyuqlil!Jidu zail yi fu e shenqpanl mael
3 Aqsseq aeqnilhael o, ngaeteel duqlye noteel gae'lye Momil'ae meeqyaevae lye gee biq lil, xilmael laoq aeqdilmyel zae'li kiq hhae; noteel e xinlxin mael hhal za lal vae, kaol noteel haelzhol cholyaeqhael qiqhhaeq qiqhhaeq'ae gaeq biq mael hhael naeqlael vae kaol'ae. 4 Tyulkaol, ngaeteel Momil e jiaolhuilhael vae lye noteel'ae hoda lil, noteel laoq saeqlael hael puqlael, kaol guaeq'ei diqqye onglci'ae nailxin kaol xinlxin mael haelmeeqlye za gayil kaol'ae.
5 Xilmael laoq Momil gongyil gae'lael aeqmyel shenqpanl e zenljul ngeelvae, kaol noteel yaol yoqhhaeq e goqja'ae bi zae'li ongl, noteel laoq goqja xilmael gae'lye saeq hhae. 6 Momil laoq gongyil hhae, kaol yoqhhaeq saeqlael maellye noteel'ae saeqlael bi puqlael e cholyaeq'ae zonglhoq biq maoqlye hhae, 7-8 Kaol noteel saeqlael pi e cholyaeq xihael laoq ngaeteel nyegael hhaellaelmyel neesaelhhae mael bi bal mul laq'ae. Tyuqfu, Hhaoqsongl Yesu laoq yoqhhaeq e laqtaq za e mqmae yosonglhael nyegael mqmae ae'lye aeqzaeq miqhulm onglci'ae mol du'lal, kaol Momil'ae maeq siqcongl, aedeeteel e Hhaoqsongl Yesu e fuqyin mael maeq naelhaeq e cholyaeq tyuhael'ae zonglhoq biq maoqlye hhae. 9 Momil yoqhhaeteel'ae chenqfaq biq maoqlye hhae, kaol haeqfu keellye zonglmye biq, kaol Hhaoqsongl e maduq kaol yoqhhaeq e laqtaq za e rongqyaol nyegael geqtael hhei. 10 Hhaoqsongl zail yi fu, Yesu'ae xinlzaeq e cholyaeqhael'ae gaqmaq bi zuq li e tyu qiq nao'ae, yoqhhaeq laoq senltuqhael e aeqhhaol taq ae'lye rongqyaol mul maoqlye hhae. Noteel laoq tyuhael onglci'ae bal zoq hhae, ngaeteel noteel'ae zoqzenlkei biq mael xiangxinl vae kaol'ae. 11 Xilmael gae'lye, ngaeteel duqlye noteel'ae heeldoq xilnye bael gee lil: Aedeeteel e Momil vae noteel laoq yoqhhaeq lye gul du hhei mael'ae zae she lye mol hhei biq, kaol yoqhhaeq e onglzaeq maellye, noteel meeq e nyuq mael kaol xinlxin gae'lye mul e mulhhael mael bi peqlal, 12 Kaol aedeeteel e Hhaoqsongl Yesu e cholmil mael, aedeeteel e Momil kaol Hhaoqsongl Yesu Jidu e endianq laoqmyel, noteel e aeqhhaol taq'ae rongqyaol hhamul, noteel eiq yoqhhaeq e aeqhhaol taq'ae rongqyaol hhamul hhei biq lye nyuqlil.