5
Aqsseq aeqnilhael o, shiqshen tyuhael kaol naohaeq tyuhael laoq, ngaeteel noteel'ae xinl maq cu biq kael'ae, 2 Noteel aeqyoyoq loqlilshe'lye loq'ae, Hhaoqsongl e naohaeq keellael mael laoq, mqkiq'ae lolbiq qiqlaqmyel keellael laoqmyel hhae. 3 Cholyaeqhael "yaeqmeel laoq hoqpinq kaol an'quanq hhae" lye gee siq fu, zaihuol mael qiqlaqmyel yoqhhaeteel'ae yo'li biq, albye pi hhei e cholhae aeqmae'ae qiqlaqmyel oqma guaeq'ei koq tullaeq biq laoqmyel hhae, kaol yoqhhaeteel aeqdilmyel maq kihezaq ongl'ae. 4 Ngeelfeiq, aqsseq aeqnilhael o, noteel laoq nahongq vae zhol maeqngeel'ae, kaol naohaeq tyulmael lolbiq laoqmyel noteel'ae maeq yo'lael kiq'ae. 5 Noteel laoq gilzuqmyel aeqcael e yaeqguq'ae, gilzuqmyel mqnao e yaeqguq'ae; aedeeteel laoq mqkiq hhae lye maeqngeel'ae, nahongq hhae lye eiq maeqngeel'ae. 6 Tyulkaol, aedeeteel laoq ochoq laoqmyel haeq yuqxulteeq, duqlye yuqnyuqgeellye ngeel maoqhhae, kaol aeqyae'lye kei maoqhhae. 7 Yuqxul e cholyaeq laoq mqkiq'ae yuqxul hhae, dolbu e cholyaeq laoq mqkiq'ae dolbu kaol'ae. 8 Ngeelfeiq, aedeeteel laoq mqnao hhae lye kaollaoq, aeqyae'lye kei maoqhhae, xiangxinl mael kaol gaeq mael neeto oheiq mael'ae ocongq e sulmba geiqzaq, kaol zonglkaeq hhei, deqjiul e panlwangl deelzaeq hhei mael sulmba vuqcongq geiqzaq kaol congq da hhei. 9 Momil aedeeteel'ae bi chenqfaq maoqlye laefuqmyel gee deelhhei maeqngeel'ae, aedeeteel yaol aedeeteel e Hhaoqsongl Yesu Jidu ae'lye bi deqjiul maoqlye laefuqmyel gee deelhhei hhae. 10 Yoqhhaeq aedeeteel e vuqtu mael bael sil laeq vae, tyulkaol, aedeeteel laoq dyeq haoq, sil haoq, yoqhhaeq nyegael qiqgael hhae bael dyeqdeel'ae. 11 Tyulkaol, noteel haeqfu eiq zongl laoqmyel, qiqhhaeq qiqhhaeq'ae neehongq bi hulm, qiqhhaeq qiqhhaeq'ae aqha bi bo'lael maoqhhae.Neehongq bi hulm mael kaol geeqlongq biq mael
12 Aqsseq aeqnilhael o, ngaeteel laoq noteel'ae noteel onglci'ae duqhee'lye mul hael'ae zunjinl biq maoqhhae lye geezaeq lil, tyuteel laoq, Hhaoqsongl onglci'ae noteel vae tyuqmyeq laeq, haelmeeqlye gee laeq e cholyaeqhael ngeelvae. 13 Yoqhhaeteel mul e mulhhael gae'lye, neegaeqgaeq maellye yoqhhaeteel'ae zhee zunjinl biq maoqhhae. Noteel eiq qiqhhaeq qiqhhaeq nyegael zilzheqlye zhol maoqhhae. 14 Aqsseq aeqnilhael o, ngaeteel noteel'ae haelmeeqlye gee laeqngeel, qiqgiq maeq mulzaeqnaol e cholyaeq'ae jinqgaol biq maoqhhae, maeq zongl gaeyil ongl yaevae lye nyuq hael vae laoq haelmeeqlye gee biq maoqhhae, ruanqroq biq hael vae laoq baelzongl biq maoqhhae, haelzhol cholyaeqhael'ae laoq nailxin za biq maoqhhae. 15 Noteel aeqyae'lye kei maoqhhae, aeqsul eiq duqlaq maellye duqlaq myel haeq zonglhoq, qiqhhaeq qiqhhaeq'ae, kaol cholyaeqhael'ae meeq e silqinq zongl mael'ae zui'qiuq maoqhhae.
16 Duqlye hhaol maoqhhae, 17 Maqqyemyel heeldoq gee maoqhhae, 18 Aeqchee silqinq mael taq vae eiq meeqyaevae lye gee maoqhhae, xilmael laoq, Momil laoq Jidu Yesu onglci vae noteel'ae gee deelhhei biq e zhiqyil mael kaol'ae. 19 Senllinq e mulhhael mael'ae haeq diqqye; 20 Xianzhihael geegaeq gil mael'ae maeq fu'qiq'ongl yae lye haeq zongl. 21 Ngeelfeiq, aeqchee silqinq mael eiq haelmeeqlye nyuq fufu maoqhhae: Meeq e silqinq mael laoq haelmeeqlye zongl gaeyil maoqhhae, 22 Maeq qiqsheel e duqlaq e silqinq mael maeq hhae zongl'ae.
23 Neesaelhhae mael biq e Momil aeqyoyoq noteel'ae aeqchee mael taq vae eiq senljyeq wae lye bi peqlal biq lye nyuqlil! Noteel e yohael, aeqyil kaol aeqhhaol mael'ae hhae bi ocongq, kaol aedeeteel e Hhaoqsongl Yesu Jidu yi fu, gilzuqmyel qiqgiq geehhael maqza myel ngeel biq lye nyuqlil. 24 Noteel yaol gul du hhei laq e tyutaeq laoq haelmillye gee laol haelmillye zongl'ae, kaol yoqhhaeq xilmael aeqdilmyel bi peq lal'ae.
25 Aqsseq aeqnilhael o, ngaeteel'ae heeldoq bael gee laeq.
26 Senljyeq e myeqchilnuq maellye aqsseq aeqnilhael'ae meeqlaeqmaeq lye naelhaeq maoqhhae. 27 Ngael Hhaoqsongl e cholmil maellye noteel'ae moqheilheil laeqngeel, xinl xilmael aqsseq aeqnilhael'ae duq gaeq hhei biq maoqhhae.
28 Aedeeteel e Hhaoqsongl Yesu Jidu e enhuil mael noteel nyegael qiqgael baelzhol biq lye nyuqlil!