Momil hhaol e ssuqhaoq caqzaq mael
4
Aeqnaol naolli laoq, aqsseq aeqnilhael o, ngaeteel Hhaoqsongl Yesu onglci'ae lye noteel'ae geezaeq, noteel'ae haelmeeqlye gee lil, noteel laoq ngaeteel geemyeq mael naelhaeq do zaq hhei vae laol, haelmillye zonglzhol kaol caiq Momil'ae bi hhaol lye loq'ae, qiqshiq laoq, noteel eiq xilnye zongl vae, ngael noteel'ae xilmael taq'ae hhael zongl maoq wae siq lye haelmeeqlye gee lil. 2 Noteel laoq ngaeteel Hhaoqsongl Yesu gae'lye noteel'ae geegaeq hhei gol biq e minllinl mael aeqchee'ae lye loq'ae. 3 Momil e zhiqyil laoq noteel yaol senljyeq wae lye peqlal biq, kaol ochoq nyegael neemaeba mael'ae gaelmaolsae'lye deeltaelzaeq lye hhae; 4 Kaol noteel aeqsul vae eiq haelmillye senljyeq kaol maduq zhee za maellye, aeqyoyoq e aeqhhaol mael zongltyeqzaeq maoqhhae lye bi loq, 5 Kaol Momil'ae maeq siqcongl e baeqjyelboq minqcuq e cholyaeqhael laoqmyel, xinqlalmyel aeqyoyoq zhee mulgoq e nyuq e ochoq nyegael neemaeba mael haeq bael zongl gil. 6 Cholyaeq qiq hhaeq eiq silqinq xilmael'ae maeq hhae jyeq li'ae, kaol yoqhhaeq e aqsseq aeqnil'ae pinqyil maeq hhae zanlzaeq biq'ae; xi qiqsheel silqinq laoq, Hhaoqsongl aeqdilmyel shenqpanl maoqlye hhae, ngaeteel laefuq noteel'ae gee gol biq, kaol noteel'ae yol jinqgaol gol biq laoqmyel hhae. 7 Momil aedeeteel yaol saelpodu hhei laq mael laoq xinqlalmyel zongl lye maeqngeel'ae, aedeeteel yaol senljyeq lye hhae. 8 Tyulkaol, geemyeq xilmael maeq naelhaeq tyuhael laoq cholyaeq yaol maq mul nae maeqngeel'ae, aeqyoyoq e yohael mael noteel'ae biq biq e Momil yaol maq mul nae hhae.
9 Aqsseq aeqnil vae gaeq mael'ae gee keelli laol, cholyaeq noteel'ae xinl maq cu biq kael'ae, Momil noteel'ae qiqhhaeq qiqhhaeq'ae gaeq maoqhhae lye geemyeq gol biq kaol'ae. 10 Noteel Maqqiqdunl e gilzuqmyel milcaeq e aqsseq aeqnilhael'ae xilnye za biq vae, ngeelfeiq, ngaeteel laoq aqsseq aeqnilhael'ae hhael zongl maoq wae siq lye haelmeeqlye gee biq. 11 Haelmeeqlye deiq'oq maeq sael myel ssuqhaoq caqzaq maoqlye nyuqmeeq maoqhhae, kaol aeqyoyoq e silqinq mael guanq meeq hhei, aeqyoyoq e aqlaq maellye mulhhael mul, yilkaefu ngaeteel noteel'ae moqheilheil biq laoqmyel ngeelvae, 12 Xilnye laol, noteel e xinqweiq mael Hhaoqsongl'ae maeq xiangxinl e cholyaeq'ae lye fu'li'laol meeq hhae, kaol noteel'ae maq lo myel qiqgiq maqza'ae.
Hhaoqsongl zail qiq pu yi mael
13 Aqsseq aeqnilhael o, sil e cholyaeqhael'ae gee keelli laol, ngaeteel laoq noteel'ae bi loq goq yae, aeqgael noteel nyuqsaeq biq, kaol chifuzaeq hhael maqza e cholyaeq tyuhael laoqmyel peqyil hhei maeqhe. 14 Aedeeteel laoq Yesu sil vae kaol dyeqhoqlal vae lye xiangxinl'ae, Yesu onglci vae sil e cholyaeq tyuhael, aeqgael Momil laoq yoqhhaeteel yaol Yesu nyegael qiqgael bael sheeqlaeq maoqlye hhae.
15 Ngaeteel Hhaoqsongl e saeziq maellye silqinq qiq mal geegaeq gil laeqngeel: Aedeeteel Hhaoqsongl yi fu'ae dyeqdeel siq e cholyaeq xihael laoq, aeqdilmyel sil e cholyaeq tyuhael laefuq'ae Hhaoqsongl'ae maeq hhae mol'ae. 16 Gul'eeq e minllinl mael zhoq minllinl du hhei'laol, mqmae yosonglhael e yoheeq e yotyel zhoq gul du hhei, kaol Momil e dalhaol mael zhoq zhangq fu, Hhaoqsongl aeqyoyoq laoq mqmae ae'lye gaeyi maoqlye hhae; kaol Jidu onglci'ae sil e cholyaeq tyuhael aeqdilmyel laefuq dyeqhoqlal hhae, 17 Aeqnaol, aedeeteel dyeqdeel kaol zholdeel siq e cholyaeq xihael, yoqhhaeteel nyegael mqdul onglci'ae bi ee da'li, kaol mqmae vae Hhaoqsongl nyegael molli. Xilnye laol, aedeeteel haeqfu keellye Hhaoqsongl nyegael qiqgael hhae baelzhol wae. 18 Tyulkaol, noteel saeziq xihael lye qiqhhaeq qiqhhaeq'ae neehongq bi hulm maoqhhae.