3
Ngaeteel zail eiq maeq zityeq ongl vae laol, ngaeteel Yaqdianq vae zholdeelsaeq maoqlye nyuqmeeq aeqwae, 2 Tyulkaol, ngaeteel lye ngaeteel nyegael Jidu e fuqyin taq'ae Momil e mulhhael qiqgael mul e aqsseq aeqnil Tiqmoqtail yaol moqheilheil du hhei, kaol noteel'ae noteel xiangxinl e Momil e saeziq taq'ae xinlxin hhael bi za, kaol noteel'ae haeqnyuqsaeq lye gee lil, 3 Aeqgael qiqhhaeq laelhhaeq laoq saeqlael xihael onglci'ae aeqyoyoq e xinlyangq mael beiqgae hhei maeqhe. Noteel aeqyoyoq laoq, aedeeteel'ae saeqlael puqlael mael laoq Momil hhaeq'ae lye kaol caiq puqlael hhae lye loq kaol'ae. 4 Ngaeteel noteel tyuqvae zhol fu, aedeeteel aeqdilmyel saeqlael hhae pi'ae lye noteel'ae laefuqmyel geegaeq gol biq aeqwae; noteel laoq xilmael aeqdilmyel peqlal vae lye loq'ae. 5 Tyulkaol, ngael maeq zityeq ongl vae laol, cholyaeq yaol moqheilheil du hhei, xilnye laol noteel e xinlxin mael haelmillye hhaemaeq lye hhae loq wae, aeqgael cholyaeq'ae cheeqmuhael lye aeqdilmyel noteel yaol bi cheeqmu hhei, kaol ngaeteel duqhee'lye mul mael alngeiqmyel peqyil hhei maeqhe.6 Ngeelfeiq, Tiqmoqtail noteel tyuqvae lye zhoq hoqlal laol, noteel e xinlxin mael kaol neegaeqgaeq e meeq e xiaoxiq mael ngaeteel'ae geegaeq hoqlael laeq, kaol noteel ngaeteel'ae duqlye nyuqdu mael, kaol ngaeteel yaol zhee mol goq mael, ngaeteel noteel'ae mol goq laoqmyel hhae lye yol geegaeq hoq lael laeq. 7 Tyulkaol, aqsseq aeqnilhael o, ngaeteel laoq gilzuqmyel saeqlael kaol zonglkyuq laeq e onglci'ae, noteel e xinlxin gae'lye neehongqhulm yaevae. 8 Yaeqmeel noteel Hhaoqsongl gae'lye sseetae'lye haoqtul deel ongl kaollaoq, ngaeteel'ae laoq aeqyil yosheq za lal laoqmyel oqyaevae. 9 Ngaeteel Momil e yiqsi'ae, noteel gae'lye zhee hhaol yae. Gilzuqmyel hhaol xihael gae'lye, ngaeteel haelmillye meeqyaevae lye maellye, noteel gae'lye Momil'ae meeqhoq biq laeq? 10 Ngaeteel noteel e maduq mael mol maoq, kaol noteel'ae maq lo e xinlxin mael bi lo lal maoqlyekaol mqkiq mqnao myel maqqyemyel heeldoq gee lil.
11 Aedeeteel e Aeqdae Momil aeqyoyoq kaol aedeeteel e Hhaoqsongl Yesu laoq, ngaeteel'ae noteel tyuqvae yil e gaelmae paeqgaelsael meeq hhei laeq lye nyuqlil. 12 Hhaoqsongl laoq noteel'ae qiqhhaeq qiqhhaeq'ae bi gaeq kaol cholyaeqhael'ae bi gaeq mael, ngaeteel noteel'ae gaeq biq laoqmyel, hhael bi naeqlael kaol bong'lye bi za biq lye nyuqlil, 13 Yoqhhaeq noteel'ae xinlxin hhael bi za lal, kaol noteel'ae aedeeteel e Hhaoqsongl Yesu kaol yoqhhaeq e senltuqhael nyegael yi fu, aedeeteel e Aeqdae Momil e yiqsi'ae, senljyeq wae lye bi peqlal, kaol qiqgiq geehhael maqza myel bi ngeel lye nyuqlil. Amen!