Baoqloq Tyeqsa'loqniqja vae mul e mulhhael mael
2
Aqsseq aeqnilhael o, noteel aeqyoyoq laoq ngaeteel noteel tyuqvae keellael mael laoq, qiqgiq yilsi maqza myel maeqngeel'ae lye loq'ae. 2 Yilkaefu, ngaeteel'ae Fei'lilbiq vae lye saeqlael yo'lael laeq kaol zonglkyuq laeq, xilmael laoq noteel loq'ae, ngeelfeiq, ngaeteel Momil biq laq e qiqgiq maqguzaq mael'ae kaolzaeq laol, zhee diqqye laq fu Momil e fuqyin mael noteel'ae geegaeq hhei biq aeqwae. 3 Ngaeteel noteel'ae gee biq e neehongq bi hulm e saeziq mael laoq maq hoq ae'lye lael maeqngeel'ae, xinqlalmyel ae'lye lael maeqngeel'ae, zaqgiqgiq ae'lye lael eiq maeqngeel'ae. 4 Ngeelfeiq, Momil ngaeteel laoq shilfu laeq fu haoqtul deel ongl'ae lye cenqrenl laeq laol, fuqyin mael ngaeteel'ae toqshiq hhei laeq, kaol ngaeteel tyulnye geegaeq duyil, cholyaeq'ae bi hhaol maoqlye maeqngeel'ae, ngaeteel e neemae mael'ae shilfu laeq e Momil'ae bi hhaol maoqlye hhae. 5 Ngaeteel naelhaeqsael lael aeqmyel hoda e saeziq qiqzael eiq maeq gee yil, xilmael laoq noteel loq'ae, neemaecuqm e neemae eiq maqza yil, xilmael laoq Momil zoqzenl kael'ae. 6-7 Ngaeteel Jidu e shiqtuq lil, kaol ochoq lye hhae bi zunjinl feiq, ngaeteel laoq noteel'ae paelsilmyel ochoq'ae rongqyaol bi za laq lye maeq geezaeq gol yil, daoldaolmyel, noteel onglci'ae naoqyae'lye za, aeqmae aeqyoyoq e yaeqguq'ae aeqchil bi dol laoqmyel lil. 8 Ngaeteel noteel'ae xilnye gaeq biq laol, Momil e fuqyin mael noteel'ae heil goq dyul maeqcilmyel, aeqyoyoq e aeqyil mael dyel'eiq noteel'ae heil biq kaol'eiq hhaeq lil, noteel laoq ngaeteel zhee gaeq e cholyaeq kaol'ae. 9 Aqsseq aeqnilhael o, ngaeteel duqhee'lye mqkiq mqnao myel mulhhael mul, kaol Momil e fuqyin mael noteel'ae geegaeq hhei biq, xilmael noteel nyuqdeel maoqhhae, xilnye zongl mael laoq, aeqgael noteel onglci e aeqsul qiq hhaeq'ae aeq'yel haecheeq hhei biq maeqhe lye kaollil. 10 Ngaeteel laoq Hhaoqsongl'ae xiangxinl e noteel vae haelmillye senljyeq, zaqgiq maqgiq, qiqgiq geehhael maqza myel za biq mael, xihael noteel zoqzenl kael'ae, Momil eiq zoqzenl kael'ae. 11 Noteel eiq loq'ae, ngaeteel noteel'ae za biq mael laoq, aeqdae aeqyoyoq e yaeqmiq yaqyo'ae za biq laoqmyel hhae. 12 Ngaeteel noteel'ae neehongq bi hulm, noteel'ae haeq nyuqsaeq lye gee biq, noteel'ae moqheilheil biq mael laoq, noteel'ae aeqchee zongl mael taq vae eiq, noteel yaol saelpodu hhei biq, kaol yoqhhaeq e goqja'ae, kaol rongqyaol vae bi do'li laq e Momil'ae duilqiq'ongl maoqhhae lye lil.13 Noteel laoq ngaeteel geegaeq e Momil e saeziq mael gaeq hhei fu, cholyaeq ae'lye lael maeqngeel myel aeqdilmyel Momil ae'lye lael e saeziq'ae lye nyuq biq kaol naelhaeq do hhei vae. Saeziq xihael laoq noteel Hhaoqsongl'ae xiangxinl e cholyaeqhael onglci'ae mulhhael mul hhae. Tyulkaol, ngaeteel xihael gae'lye maqqyemyel Momil'ae meeqyaevae lye gee biq lil. 14 Aqsseq aeqnilhael o, noteel'ae kaol Yoqtail milcaeq e Jidu Yesu onglci e Momil e jiaolhuilhael'ae puqli biq e saeqlael mael laoq qiqsheel'ae, noteel vae eiq yoqhhaeteel'ae Yoqtail cholyaeq lye guaeq'ei diqqye biq laoqmyel, aeqyoyoq minqcuq e cholyaeq lye guaeq'ei bi diqqye kaol'ae. 15 Yoqtail cholyaeq xihael lye Hhaoqsongl Yesu kaol xianzhihael yaol xyeq biq dyul maeqcilmyel, ngaeteel yaol eiq lyeqdu laq. Yoqhhaeteel laoq Momil'ae maeq bi hhaol, kaol cholyaeqhael nyegael diqrenq geiq hhae, 16 Kaol ngaeteel'ae baeqjyelboq minqcuq e cholyaeq'ae Momil e saeziq mael maeq bi geegaeq kaol maeq bi deqjiul lye diqqye laq hhae, kaol duqlye aeqyoyoq'ae golsiq maellye bi byuqbong hhei, ngeelfeiq, Momil e faqhoqkei mael yoqhhaeteel'ae yo'li biq she vae.
Baoqloq Tyeqsa'loqniqja jiaolhuil'ae zail fu yil biq maoqlye nyuq hhae
17 Aqsseq aeqnilhael o, ngaeteel kaol noteel laoq qiq miq qiq jyel'ae qiqtongq maeq zhol maeq hhaeq'ae, aeqhhaol laoq deelsae feiq, neemae laoq maeq deelsae yil; ngaeteel noteel yaol zhee mol goq laq kaol loqho zhee nyuq lil. 18 Tyulkaol, ngaeteel laoq noteel tyuqvae zhee yi goq yae. Ngael Baoqloq yi maoqlye qiqniq zael zongl wae, ngeelfeiq, Saqdanl lye ngaeteel yaol diqqye laq hhae. 19 Aedeeteel e Hhaoqsongl Yesu zail qiq pu yi, kaol ngaeteel yoqhhaeq e yiqsi'ae haoqtul deelhhei fu, ngaeteel e panlwangl deelzaeq hhei mael, hhaol mael, kaol hodazaq e zongmae vuqcongq mael aeqchee maeq? Aeqdilmyel noteel maeqngeel maeq? 20 Noteel laoq ngaeteel e rongqyaol kaol hhaol mael ngeelvae!