Lilfaq laoqmyel maeq zongl e cholyaeq
2
Aqsseq aeqnilhael o, aedeeteel e Hhaoqsongl Yesu Jidu yi maoqlye mael, kaol aedeeteel yoqhhaeq tyuqvae deel'eeq li mael'ae gee'li'laol, ngaeteel noteel'ae haelmeeqlye gee gil laeqngeel: 2 Yohael ae'lye haoq, saeziq ae'lye haoq, baelyaelmyel ngaeteel e cholmil ae'lye xinl cu haoq, Hhaoqsongl e naohaeq keellael vae lye gee kaollaoq, noteel qiqlaqmyel haeq xiangxinl gil, gu eiq haq gu gil. 3 Cholyaeq lye noteel'ae aeqchee loqho maellye eiq zaqgiq haeq bi giq hhei, naohaeq tyulmael e laefuq'ae laoq, jiaolhuil vae neemae xyelpupu e silqinq za, kaol lilfaq laoqmyel maeq zongl e myeyil e cholyaeq du'lal maoqlye kaol'ae. 4 Yoqhhaeq Hhaoqsongl'ae diqqye, kaol aeqyoyoq yaol momilhael lye gul biq e tyuhael kaol cholyaeqhael heel biq e tyuhael holtaq'ae deiqqei da zaq hhei, Momil e heelhaol vae zhol deelhhei kaol aeqyoyoq laoq Momil lil lye gee hhae.5 Ngael noteel tyuqvae zhol siq fu xihael noteel'ae geegaeq gol biq aeqwae, noteel maeq nyuqdeel gil laeq wae maeq? 6 Yaeqmeel noteel yoqhhaeq'ae diqqye biq mael aeqchee'ae lye loq'ae, yoqhhaeq yaol zae'li kiq e naohaeq keellael fu caiq bi mol du'lal maoqlye hhae. 7 Lilfaq laoqmyel maeq zongl e tyutaeq e duqlaq myel nyuq mael mulhhael mul tullaeq vae, ngeelfeiq, yaeqmeel diqqye biq e qiq hhaeq zhol'ae, diqqye e tyutaeq yaol sheeqsae yil laol, 8 Lilfaq laoqmyel maeq zongl e tyutaeq aeqdilmyel du'lal maoqlye hhae. Hhaoqsongl Yesu laoq aeqyoq e myeqbongq e saeq maellye tyutaeq yaol zonglmye biq, kaol aeqyoyoq yi fu e rongqyaol maellye tyutaeq yaol zonglmye biq maoqlye hhae. 9 Lilfaq laoqmyel maeq zongl e tyutaeq yi mael laoq, Saqdanl e onglzaeq mael'ae kaolzaeq laol, maeq qiqsheel e onglzaeq, shenqjiq kaol gilzuqmyel zaqgiqgiq e maeqdaeqhhaeq e silqinq zongl du hhei, 10 Kaol myeyil e cholyaeq e aeqhhaol taq'ae maeq qiqsheel e maeq gongyil e zaqgiqgiq e loqho zongl, yoqhhaeteel laoq yoqhhaeteel'ae bi deqjiul ongl e zhen'liq mael'ae maq jyeqshel, maeq hhaol biq kaol'ae. 11 Tyulkaol, Momil lye yoqhhaeteel'ae maq hoq myel nyuq e neemae bi za, kaol yoqhhaeteel'ae zaqgiqgiq mael'ae bi xiangxinl mael laoq, 12 Zhen'liq mael'ae maeq xiangxinl, daoldaolmyel maeq gongyil mael'ae hhaol biq e cholyaeqhael'ae golsiq za'ae lye bi gee hhei ngeelvae.
Saelpodu hhei biq kaol jiul'en bi jyeqshel
13 Hhaoqsongl gaeq e aqsseq aeqnilhael o, Momil noteel yaol saelpodu hhei, kaol noteel yaol zhen'liq mael'ae xiangxinl, kaol senllinq e ganqdongl gae'lye senljyeq wae lye bi peqlal kaol bi deqjiul vae, kaol noteel yaol zhoq hhoqlal e jiul'en e aelsiq bi geiq laq'ae. Tyulkaol, ngaeteel laoq duqlye noteel gae'lye Momil'ae meeqyaevae lye gee biq lil. 14 Momil laoq ngaeteel fuqyin geegaeq ae'lye noteel yaol gul du hhei biq, xilnye laol, noteel laoq aedeeteel e Hhaoqsongl Yesu Jidu e rongqyaol mael hhamul'ae. 15 Tyulkaol, aqsseq aeqnilhael o, noteel sseetae'lye haoqtul deel ongl maoqhhae, hael naelhaeq do hhei e geemyeq mael, ngaeteel e myeqbongq maellye geegaeq hael haoq, xinl taq'ae cu hael haoq, gilzuqmyel zongl gaeyil maoqhhae.
16 Aedeeteel e Hhaoqsongl Yesu Jidu aeqyoyoq, aedeeteel'ae gaeq laeq, endianq maellye haeqfu keellye haeq nyuqsaeq lye gee laeq, kaol zhee meeq e panlwangl deelzaeq hhei mael biq laq e Aeqdae Momil laoq, 17 Noteel e neemae mael'ae haeq nyuqsaeq lye gee biq, kaol meeq e zongl, meeq e saeziq taq'ae noteel'ae sseetae'lye bi ngeel lye nyuqlil!