Noteel ngaeteel'ae heeldoq bael gee laeq
3
Aeqnaol naolli laoq, aqsseq aeqnilhael o, ngaeteel'ae heeldoq bael gee laeq, cholyaeqhael Hhaoqsongl e saeziq mael'ae noteel onglci'ae hael peqlal laoqmyel bi zunjinl kaol hhaol gae'lael aeqmyel bi jyeqshel, 2 Kaol ngaeteel yaol yo'liq maq mul kaol duqlaq e cholyaeq e aqlaq ae'lye bi jiul du'laq, haetaeq myel xinlyangq za maeqngeel kaol'ae. 3 Ngeelfeiq, Hhaoqsongl laoq zaqgiq maqgiq'ae, yoqhhaeq noteel'ae xinlxin hhael bi za lal maoqlye hhae, kaol noteel'ae ocongq biq, kaol duqlaq e tyutaeq zael ae'lye jiul du'laq'ae. 4 Ngaeteel Hhaoqsongl gae'lye noteel'ae xinlxin za lil, yaeqmeel noteel zongl yil'ae, aeqgael eiq ngaeteel moqheil hael heil mael laoqmyel zongl yil'ae lye xiangxinl lil. 5 Hhaoqsongl laoq noteel e neemae mael Momil'ae bi gaeq lye sheeqmyeq biq, kaol Jidu e renqnail mael bi xoqxiq lye nyuqlil!Qiqgiq maeq mulzaeqnaol e cholyaeq'ae jinqgaol biq
6 Aqsseq aeqnilhael o, aedeeteel Hhaoqsongl Yesu Jidu e cholmil maellye noteel'ae moqheilheil laeqngeel, aqsseq aeqnilhael onglci'ae aeqsul qiqgiq maeq mulzaeqnaol, kaol aedeeteel geegaeq e geemyeq mael maeq zongl gaeyil kaollaoq, yoqhhaeq'ae deeltaelzaeq maoqhhae. 7 Noteel aeqyoyoq laoq haelmillye ngaeteel zongl laoqmyel bael zongl maoqhhae lye loq'ae. Ngaeteel noteel onglci'ae qiqgiq maeq mulzaeqnaol myel qiqzael eiq maeq zongl yil, 8 Kaol ochoq e aelhoq mael alngeiqmyel qiqzael eiq maeq zaeq gol yil, daoldaolmyel, duqhee'lye mul, mqkiq mqnao myel mulhhael mul, aeqgael noteel onglci e cholyaeq'ae aeq'yel haecheeq hhei biq maeqhe lye kaollil. 9 Xilmael laoq ngaeteel laqtaq maqza kaol maeqngeel'ae, ngaeteel aeyoyoq noteel'ae zonglmyeq biq maoqlye lil, noteel vae laoq ngaeteel zongl laoqmyel bi bael zongl maoqlye kaollil. 10 Ngaeteel noteel tyuqvae zhol fu noteel'ae moqheilheil gol biq, gee: Qiqhhaeq laelhhaeq mulhhael maq mul nae kaollaoq, aelhoq maeq hhae zaeq'ae. 11 Ngaeteel'ae laoq, noteel onglci e qiqhhaeq laelhhaeq laoq qiqgiq maeq mulzaeqnaol, qiqgiq mulhhael eiq maq mul, daoldaolmyel, duqlye yoqhhaeq'ae maeq guanqyo e silqinq mael guanq'ae lye gaeq hhei laeq kaol'ae. 12 Ngaeteel laoq Hhaoqsongl Yesu Jidu onglci'ae lye xilnye cholyaeq'ae laoq, yotyel maqdumyel mulhhael mul, kaol aeqyoyoq lye mul du hhei mael zaeq maoqhhae lye moqheilhei biq, kaol haelmeeqlye gee biq lil. 13 Aqsseq aeqnilhael o, noteel meeq mael zongl fu, maeq zongl gaeyil ongl yaevae lye haeq kei.
14 Qiqhhaeq laelhhaeq ngaeteel xinl mael taq'ae cu e saeziq mael maeq naelhaeq kaollaoq, xitaeq yaol nyuqdeel maoqhhae, kaol yoqhhaeq nyegael yelchoq haq geiq, kaol yoqhhaeq'ae bi saqdol li; 15 Ngeelfeiq, yoqhhaeq yaol diqrenq'ae lye haeq zongl biq, yoqhhaeq'ae aqsseq aeqnil'ae laoqmyel haelmeeqlye gee biq maoqhhae.
Geeqlongq biq mael
16 Neesaelhhae mael biq e Hhaoqsongl haeqfu eiq, aeqchee silqinq mael taq vae eiq aeqyoyoq noteel'ae neesaelhhae mael biq hhei biq lye nyuqlil! Hhaoqsongl laoq noteel haelzhol cholyaeqhael nyegael qiqgael baelzhol biq lye nyuqlil! 17 Ngael Baoqloq aeqyoyoq lye cu hheikaol noteel'ae meeqlaeqmaeq lye naelhaeq lil. Ngael cu e xinl mael laoq haeqfu eiq xilnye hhae, kaol xilmael laoq ngael xinl cu e jilhaol ngeelvae. 18 Aedeeteel e Hhaoqsongl Yesu Jidu e enhuil mael, noteel haelzhol cholyaeqhael nyegael qiqgael baelzhol biq lye nyuqlil!