4
Ngael gaeq e, nyuqdu laq e aqsseq aeqnilhael o, noteel laoq ngaeq e hhaol mael, kaol ngaeq e zongmae vuqcongq mael ngeelvae. Ngael gaeq hael o, noteel laoq Hhaoqsongl onglci vae sseetae'lye haoqtul deel ongl maoqhhae.Baoqloq e geemyeq mael
2 Ngael Yoq'adyeq kaol Xunqduji'ae Hhaoqsongl onglci vae, neemae qiq siq laoqmyel ngeel maoqhhae lye haelmeeqlye gee biq lil. 3 Ngael eiq noq'ae geezaeq lil, aeqdilmyel nuqkeeq qiqgael bael pi e yelchoq o, haeqmiyaeq xi niq nulhhaeq'ae baelzongl biq, yoqhhaeteel fuqyin taq'ae ngael, Geqlilmianq kaol ngaeq e baeqjyelboq e mulhhael qiqgael bal mul e cholyaeqhael nyegael duqhee'lye mulhhael bal mul gol'ae, yoqhhaeteel e cholmil mael aeqyil e suqhhaq taq'ae cuda deelhhei vae kaol'ae. 4 Noteel Hhaoqsongl onglci'ae duqlye hhaol maoqhhae. Ngael zail gee maoq siq, noteel hhaol maoqhhae. 5 Cholyaeqhael'ae noteel e maeq dilqeizaeq e neemae mael bi loq maoqhhae. Hhaoqsongl niqlael aeqwae. 6 Qiqgiq haeq caoxin, aeqchee silqinq mael vae eiq heeldoq gee, geezaeq, kaol meeqyaevae lye gee ae'lye, noteel mul maoqlye mael Momil'ae geegaeq hhei biq. 7 Momil laoq cholyaeq loq ongl mael'ae jyeqli e neesaelhhae mael biq laq'ae, kaol Jidu Yesu onglci'ae lye noteel e neemae, kaol neemae onglci'ae nyuq mael'ae ocongq laeq'ae.
8 Aeqnaol naolli, aqsseq aeqnilhael o, gilzuqmyel aeqdilmyel e silqinqhael, gilzuqmyel zunjinl maoq e silqinqhael, gilzuqmyel gongyil e silqinqhael, gilzuqmyel shol e neemae onglci'ae nyuq e silqinqhael, gilzuqmyel aelgaeqgaeq lael aeqmyel silqinqhael, gilzuqmyel meeq e miqyil za hael, aeqchee meeq e xinqweiq za kaollaoq, aeqchee hoda e silqinq za kaollaoq, noteel laoq xihael'ae haelmeeqlye chifu deelhhei maoqhhae. 9 Noteel laoq ngaeq ae'lye hal xoqdozaq hhei e, hal hhamul hhei e, haelgaeq hhei e, kaol haelmol e silqinqhael, xihael noteel laoq zail zongl yil maoq wae siq, xilnye laol, neesaelhhae mael biq e Momil laoq aeqdilmyel noteel nyegael qiqgael baelzhol laeq'ae.
Baoqloq Fei'lilbiq e aqsseq aeqnilhael'ae meeqyaevae lye gee biq
10 Ngael Hhaoqsongl onglci'ae lye guaeq'ei hhaol yae, noteel ngaeq'ae meeq laeq e neemae mael yaeqmeel yol mol du'lal vae kaol'ae; qiqshiq laoq, noteel ngaeq'ae haeqfu eiq meeq laeq'ae, ngeelfeiq, jihuil maqza biq hhae. 11 Ngael laoq aeqchee maq lo laq gae'lye saeziq xihael gee maeqngeel yil, ngael laoq haelmillye qinqkuangl vae eiq lo yaevae lye loq mael xoqdoqzaq hhei aeqwae. 12 Ngael laoq maq zacongl fu haelmillye zonglzhol lye loq, zacongl fu haelmillye zonglzhol lye eiq loq; dye haoq, myeq haoq, maq mul byel ongl myel za siq haoq, maq lo haoq, aeqchee silqinq mael taq'ae, aeqchee qinqkuangl taq'ae, ngael laoq zhee meeq e loqho za lil vae. 13 Ngael laoq ngaeq'ae aqha biq da hhei laq e tyutaeq'ae kaolzaeq laol, aeqchee silqinq eiq zongl ongl lil. 14 Ngeelfeiq, noteel ngaeq nyegael saeqlael saeqchoqbo mael laoq meeq e silqinq'ae.
15 Fei'lilbiq e cholyaeqhael o, noteel eiq loq'ae, ngael fuqyin zhoq geegaeq, Maqqiqdunl ae'lye deelsae fu, dyuqbaq heil laeq kaol heilzaeq e silqinq mael taq'ae, noteel maoqlaol, baeqjyelboq e jiaolhuil laoq ngaeq'ae maeq heil gol laq'ae. 16 Ngael Tyeqsa'loqniqja vae zhol fu, noteel eiq qiqzael maeqcilmyel cholyaeq yaol moqheilheil du hheikaol ngaeq'ae mulyo mael heil yi laeq'ae. 17 Ngael laoq noteel ngaeq'ae aeqchee liqvuq heil laeq lye geezaeq maeqngeel yil, noteel e aelsiq mael nyeq'ei ta nyeq'ei hhael naeqlael biq, kaol noteel e zanglmuq mael'ae cuda hhei biq lye geezaeq dyul oqyil. 18 Ngael gilzuqmyel heil yo hhei aeqwae, kaol naeq du'lal e za siq; ngaeq'ae lo laq vae, ngael laoq noteel lye heil laeq e liqvuq mael Yiqbafoqtiq e aqlaq ae'lye heil yo hhei aeqwae. Liqvuq tyuhael laoq, Momil neemae onglci ae'lye jyeqshel laeq, kaol hhaol biq e zhee nulsael lael aeqmyel e zaelheel ngeelvae. 19 Ngaeq e Momil laoq aeqdilmyel yoqhhaeq e rongqyaol e duqgongqgongqlye mael laoqmyel, Jidu Yesu onglci vae noteel'ae hal mulyo biq mael bi naeq du'lal biq. 20 Rongqyaol mael aedeeteel e Aeqdae Momil vae haeqfu keellye biq biq lye nyuqlil. Amen!
Geeqlongq biq biq
21 Jidu Yesu onglci'ae zhol e senltuqhael'ae meeqlaeqmaeq lye naelhaeq biq. Ngaeq nyegael qiqgael baelzhol e aqsseq aeqnilhael gilzuqmyel noteel'ae meeqlaeqmaeq lye naelhaeq hhae. 22 Haelzhol e senltuqhael noteel'ae meeqlaeqmaeq lye naelhaeq hhae, Kaiqsa toq e cholyaeqhael noteel'ae meeqlaeqmaeq lye nyeq'ei hhael naelhaeq hhae. 23 Hhaoqsongl Yesu Jidu e endianq mael noteel e yohael nyegael qiqgael baelzhol biq lye nyuqlil!